ഹംഗറിയില്‍ മദ്യലഹരിയില്‍ അനിയന്ത്രിത മേഖലയിലൂടെ മോഷ്ടിച്ച ചെറുവിമാനവുമായി പറന്ന 24കാരന്‍ അറസ്റ്റില്‍. രാജ്യത്തെ ഏക ആണവനിലയമായ പാക്‌സിന് സമീപമാണ് യുവാവ് വിമാനവുമായി എത്തിയത്. തുടര്‍ന്ന് ആണവനിലയത്തിന് നാല് മൈല്‍ അകലെയുള്ള സൂര്യമുഖിപ്പാടത്ത് അടിയന്തരമായി വിമാനമിറക്കി. സമീപത്തെ കലോച്ച വിമാനത്താവളത്തില്‍നിന്ന് അനുമതിയില്ലാതെ ഇയാള്‍ വിമാനം കൈക്കലാക്കിയതാകാമെന്നാണ് പ്രാഥമിക നിഗമനം. വിമാനത്തില്‍ ഇയാള്‍ എങ്ങനെ പ്രവേശിച്ചെന്നും വിമാനം മോഷ്ടിക്കാന്‍ കാരണമെന്തെന്നും പൊലീസ് അന്വേഷിച്ചുവരികയാണ്.

സി172 സെസ്‌ന എന്ന വിമാനമാണ് യുവാവ് അനുമതിയില്ലാതെ പറത്തിയത്. ആണവനിലയത്തിന് സമീപമുള്ള നിരോധിത വ്യോമമേഖലയില്‍ പ്രവശിച്ചപ്പോള്‍തന്നെ സൈനിക റഡാര്‍ വിവരം നല്‍കി. ആണവനിലയത്തിന്റെ രണ്ട് മൈല്‍ ചുറ്റളവില്‍ 20,000 അടി ഉയരത്തിന് താഴെ സിവിലിയന്‍ വിമാനങ്ങള്‍ക്ക് പറക്കാന്‍ അനുമതിയില്ല. ഈ പ്രദേശത്ത് വിമാനം പറക്കുന്നതായി കണ്ടെത്തിയതിന് പിന്നാലെതന്നെ ഹംഗറി രണ്ട് ഗ്രിപന്‍ യുദ്ധവിമാനങ്ങള്‍ ഇവിടേക്കയച്ചു.

യുദ്ധവിമാനങ്ങള്‍ സെസ്‌നയെ നിരീക്ഷിക്കാന്‍ തുടങ്ങി. വിമാനം തകര്‍ന്നുവീണതായി സംശയിച്ചെങ്കിലും നിമിഷങ്ങള്‍ക്കകം സൂര്യമുഖിപ്പാടത്ത് വിമാനം അടിയന്തരമായി ഇറക്കിയതായി കണ്ടെത്തുകയായിരുന്നു. വിമാനത്തിന് സാരമായ കേടുപാടുകള്‍ സംഭവിച്ചെങ്കിലും യുവാവിന് പരിക്കേറ്റില്ല.

വിമാനത്തില്‍നിന്ന് പുറത്തിറങ്ങിയ യുവാവ് സ്ഥലത്തുനിന്ന് ഓടി രക്ഷപ്പെടാന്‍ ശ്രമിച്ചു. സമീപത്തെ റോഡിലൂടെ പോയ വാഹനമോടിച്ചിരുന്നയാളെയും ഇയാള്‍ ആക്രമിച്ചു. കാര്‍ കൈക്കലാക്കി കടന്നുകളയാനായിരുന്നു ശ്രമം. എന്നാല്‍, സ്ഥലത്തെത്തിയ പൊലീസ് യുവാവിനെ കസ്റ്റഡിയിലെടുത്തു. പ്രാഥമിക പരിശോധനയില്‍ ഇയാള്‍ മദ്യപിച്ചിരുന്നതായി കണ്ടെത്തി. മറ്റ് ലഹരിവസ്തുക്കളെന്തെങ്കിലും ഉപയോഗിച്ചിരുന്നോയെന്ന് കണ്ടെത്തുന്നതിനുള്ള പരിശോധനകള്‍ നടത്തിവരികയാണ്.