കനത്ത മഞ്ഞിനും തണുപ്പിനും ഇടയില്‍ ത്രികോണ മത്സര ചൂടില്‍ ഡല്‍ഹിയില്‍ വോട്ടെടുപ്പ്‌. രാവിലെ എട്ടുമണിയോടെയാണ്‌ വോട്ടെടുപ്പ്‌ ആരംഭിച്ചത്‌. 70 നിയമസഭാ മണ്ഡലങ്ങളിലേക്ക്‌ നടക്കുന്ന തെരഞ്ഞെടുപ്പില്‍ 810 സ്ഥാനാര്‍ഥികളാണ്‌ ജനവിധി തേടുന്നത്‌. കോണ്‍ഗ്രസ്‌, ബി.ജെ.പി എന്നീ കക്ഷികള്‍ക്കു പുറമേ ആം ആദ്‌മി പാര്‍ട്ടിയും ശക്തമായ നിലയില്‍ തെരഞ്ഞെടുപ്പിനെ നേരിടുന്നു എന്ന പ്രത്യേകതയാണ്‌ ഈ തെരെഞ്ഞെടുപ്പില്‍ ഉള്ളത്‌.

80 വനിതാ സ്ഥാനാര്‍ഥികളാണ്‌ മത്സരരംഗത്തുള്ളത്‌. വോട്ടെടുപ്പുമായി ബന്ധപ്പെട്ട്‌ 64000 പോലീസുകാരെയാണ്‌ സുരക്ഷയ്‌ക്കായി നിയോഗിച്ചിരിക്കുന്നത്‌.നിലവിലെ മന്ത്രിസഭയില്‍ കോണ്‍ഗ്രസിന്‌ 43 സീറ്റും ബി.ജെ.പിക്ക്‌ 23 സീറ്റുമാണ്‌ ഉള്ളത്‌. കഴിഞ്ഞ തെരഞ്ഞെടുപ്പില്‍ 57.58 ശതമാനമായിരുന്നു പോളിംഗ്‌. എന്നാല്‍ ഇത്തവണ പോളിംഗ്‌ ശതമാനം വര്‍ധിക്കുമെന്നാണ്‌ രാഷ്‌ട്രീയ പാര്‍ട്ടികള്‍ കണക്കു കൂട്ടുന്നത്‌.

ന്യൂഡല്‍ഹിയില്‍ മുഖ്യമന്ത്രി ഷീലാ ദീക്ഷിത്‌, ബി.ജെ.പിയുടെ ഹര്‍ഷ വര്‍ധന്‍, ആം ആദ്‌മി നേതവ്‌ അരവിന്ദ്‌ കെജ്‌രിവാള്‍ എന്നിവര്‍ മാറ്റുരയ്‌ക്കുന്ന പോരാട്ടമാണ്‌ രാജ്യം ഉറ്റുനോക്കുന്നത്‌. മൂന്നു പേര്‍ക്കും ഇത്‌ അഭിമാന പോരാട്ടം കൂടിയാണ്‌.

ഒരു കോടി പന്ത്രണ്ട്‌ ലക്ഷം വരുന്ന വോട്ടര്‍മാരാണ്‌ ഡല്‍ഹിയില്‍ ഉള്ളത്‌. തെരെഞ്ഞെടുപ്പില്‍ ആം ആദ്‌മി പാര്‍ട്ടി കരുത്തുകാട്ടും എന്നാണ്‌ അഭിപ്രായ സര്‍വേകള്‍ പറയുന്നത്‌. കൂടാതെ തൂക്കുമന്ത്രിസഭക്കാണ്‌ സാധ്യതയെന്നും പ്രവചനങ്ങള്‍ ഉണ്ട്‌.