സ്വര്‍ണ്ണത്തില്‍ മുത്തമിട്ട് സ്പാനിഷ് താരം കരോലിന്‍. മത്സരത്തിലെ മുന്‍പരിചയങ്ങള്‍ കരോലിന് തുണയായി. പി.വി സിന്ധുവിലൂടെ ഇന്ത്യയ്ക്ക് രണ്ടാം ഒളിംപിക്‌സ് മെഡല്‍. വനിതാ ബാഡ്മിന്റണ്‍ ഫൈനലില്‍ സ്‌പെയിന്റെ കരോളിന മരിനോട് പരാജയപ്പെട്ട പി.വി സിന്ധു വെള്ളി മെഡല്‍ നേടി. ലോക ഒന്നാം നമ്പര്‍ താരമാണ് മരിന്‍. വനിതകളുടെ 58 കിലോഗ്രാം ഫ്രീ സ്‌റ്റൈല്‍ ഗുസ്തിയില്‍ വെങ്കല മെഡല്‍ നേടിയ സാക്ഷി മാലിക്കിലൂടെയാണ് ഇന്ത്യ മെഡല്‍ പട്ടികയില്‍ ഇടം നേടിയത്.
ആദ്യ സെറ്റില്‍ ആധികാരികമായ ജയമാണ് സിന്ധു നേടിയത്. സ്‌കോര്‍ 2119. ആദ്യ ഗെയിമില്‍ മരിന്റെ പിന്നിലായ ശേഷം തുടര്‍ച്ചയായ ആറ് പോയിന്റുകള്‍ നേടിയാണ് സിന്ധു ലീഡ് നേടിയത്. രണ്ടാം സെറ്റില്‍ മരിന്‍ വിജയിച്ചു. രണ്ടാം സെറ്റ് 2112ന് ആണ് മരിന്‍ സ്വന്തമാക്കിയത്. രണ്ടാം സെറ്റില്‍ സിന്ധു പോയിന്റുകള്‍ കണ്ടെത്താന്‍ ബുദ്ധിമുട്ടിയപ്പോള്‍ അവിശ്വസനീയമായ തിരിച്ചു വരവാണ് മരിന്‍ നടത്തിയത്.
മൂന്നാം സെറ്റ് മരിന്‍ 2115ന് സ്വന്തമാക്കി. രണ്ടാം സെറ്റ് വ്യക്തമായ ആധിപത്യത്തോടെയാണ് മരിന്‍ തുടങ്ങിയത്. 20ന് പിന്നിട്ട് നിന്നതിന് ശേഷമാണ് സിന്ധു ആദ്യ പോയിന്റ് നേടിയത്. ഏറെ നേരം പിന്നിട്ട് നിന്നതിന് ശേഷമാണ് സിന്ധു തിരിച്ചടിച്ചത്. അഞ്ചിലധം പോയിന്റുകള്‍ക്ക് പിന്നില്‍ നിന്ന സിന്ധു പോയിന്റ് വ്യത്യാസം 2 പോയിന്റ് ആയി ചുരുക്കി. പത്താമത്തെ പോയിന്റില്‍ സിന്ധു സമനില പിടിച്ചു. എന്നാല്‍ പിന്നീട് സിന്ധുവിന് തിരിച്ചു വരാനായില്ല.
വ്യാഴാഴ്ച നടന്ന മത്സരത്തില്‍ ജപ്പാന്റെ നൊകോമി ഒകുഹാരയെ പരാജയപ്പെടുത്തിയാണ് സിന്ധു ഫൈനലില്‍ കടന്നത്. ലോക ആറാം നമ്പര്‍ താരമാണ് ഒകുഹാര. 2119, 2110 എന്ന സ്‌കോറിനായിരുന്നു സിന്ധുവിന്റെ സെമി ജയം. ജയിച്ച കരോലിനെ അഭിനന്ദിച്ച് വാരിപ്പുണര്‍ന്ന് സിന്ധു അവിടെയും താരമായി.