12,500 രൂപ നഷ്ടപരിഹാരം കിട്ടണമെങ്കില് 3000 രൂപ കൈക്കൂലി നല്കണം; പതിനഞ്ചുകാരന് യാചകനായി
അച്ഛന്റെ അന്ത്യകര്മങ്ങള്ക്കായി വാങ്ങിയ പണം തിരിച്ചടയ്ക്കാന് പോലും വഴിയില്ല. സംസ്ഥാന് സര്ക്കാര് പ്രഖ്യപിച്ച നഷ്ടപരിഹാര തുക ലഭിക്കണമെങ്കില് ഉദ്യോഗസ്ഥര്ക്ക് കൊക്കൂലി നല്കണമെന്ന അവസ്ഥ. അവസാനം ഉദ്യോഗസ്ഥനു കൈക്കൂലി നല്കാനുള്ള പണം കണ്ടെത്താന് പതിനഞ്ചുകാരനായ മകന് യാചകനായി. തമിഴ്നാട്ടിലെ വില്ലുപുരം ജില്ലയിലെ കുന്നത്തൂരിലാണ് സംഭവം.
കഴിഞ്ഞ വര്ഷം ഫെബ്രുവരിയിലാണ് കര്ഷകനായ കൊലാഞ്ചി (45) മരിച്ചത്. കര്ഷകര്ക്കായുള്ള സാമൂഹിക സുരക്ഷാ പദ്ധതി പ്രകാരം സംസ്ഥാന സര്ക്കാര് 12,500 രൂപ നഷ്ടപരിഹാരം പ്രഖ്യാപിച്ചു. ഒന്നരവര്ഷത്തോളം ഈ തുകയ്ക്കായി മകന് അജിത് കാത്തിരുന്നു. ഒടുവില് വില്ലേജ് ഓഫിസറെ സമീപിച്ചു. 3000 രൂപ കൈക്കൂലി നല്കിയാന് നഷ്ടപരിഹാരത്തുകയ്ക്കുള്ള ചെക്ക് നല്കാമെന്നു പറഞ്ഞു.
കൈക്കൂലിക്കുള്ള പണം കണ്ടെത്താന് കഴിയാതെ വന്നതോടെ ബാനറുമായി അജിത് നാട്ടുകാരുടെ സഹായം തേടി തെരുവിലിറങ്ങി. അച്ഛന്റെ അന്ത്യകര്മങ്ങള്ക്കായി വാങ്ങിയ പണം തിരിച്ചടയ്ക്കാന് വഴിയില്ല. സര്ക്കാരിന്റെ നഷ്ടപരിഹാരത്തുകയായ 12,500 രൂപ ലഭിച്ചാല് മാത്രമേ കടം തീര്ക്കാന് കഴിയൂ. ഈ തുക ലഭിക്കണമെങ്കില് കൈക്കൂലി നല്കണമെന്നു ഉദ്യോഗസ്ഥന് ആവശ്യപ്പെട്ടെന്നും ബാനറില് എഴുതിയിട്ടുണ്ട്.
മാധ്യമങ്ങള് സംഭവം റിപ്പോര്ട്ട് ചെയ്തതോടെ ജില്ലാ ഭരണകൂടം അന്വേഷണത്തിനു ഉത്തരവിട്ടു. ആരോപണവിധേയനായ വില്ലേജ് ഓഫിസറെ താല്ക്കാലികമായി സ്ഥാനത്തുനിന്നും മാറ്റി.
https://www.facebook.com/Malayalivartha
