യാത്രയ്ക്കിടെ ഭാര്യ മരിച്ച യുവാവിനെയും അഞ്ച് മാസം പ്രായമുള്ള മകളെയും ബസില്‍ നിന്നും ഇറക്കിവിട്ടു. മധ്യപ്രദേശിലെ ദമോ ജില്ലയിലാണ് സംഭവം. ഛത്രാപൂര്‍ സ്വദേശിയായ രാംസിംഗിനേയും മകളേയുമാണ് ബസില്‍ നിന്ന് പുറന്തള്ളിയത്. അസുഖം ബാധിച്ച ഭാര്യ മല്ലി ഭായിയെ ദമോ ജില്ലാ ആശുപത്രിയിലേയ്ക്ക് കൊണ്ടുപോവുകയായിരുന്നു രാംസിംഗ്. മല്ലിഭായ് യാത്രക്കിടെ മരിച്ചു. മൃതദേഹവുമായി രാംസിംഗിനേയും മകളേയും ബസില്‍ നിന്ന് ബലം പ്രയോഗിച്ച് ഇറക്കിവിടുകയായിരുന്നു.

വനപ്രദേശത്ത് ബസ് എത്തിയപ്പോഴാണ് കണ്ടക്ടര്‍ ബലം പ്രയോഗിച്ച് ഇവരെ പുറത്താക്കിയത്. ഈ സമയത്ത് ശക്തമായ മഴയും പെയ്യുന്നുണ്ടായിരുന്നു. മൃതദേഹവുമായി യാത്ര ചെയ്യുന്നതിന് മറ്റ് യാത്രക്കാര്‍ക്ക് ബുദ്ധിമുട്ടുണ്ടായിരുന്നത് കൊണ്ട് ഇറക്കിവിട്ടു എന്നാണ് ഈ മനുഷ്യത്വവിരുദ്ധമായ പ്രവൃത്തിക്ക് കണ്ടക്ടര്‍ ശാര്‍ദ സെന്‍ നല്‍കുന്ന വിശദീകരണം.

ഇവരെ വഴിയില്‍ കണ്ട രണ്ട് അഭിഭാഷകരാണ് പോലീസിനെ വിളിക്കുകയും ഇവര്‍ക്ക് സഹായം നല്‍കുകയും ചെയ്തത്. എന്നാല്‍ പോലീസ് എത്തി വിവരങ്ങള്‍ എഴുതിയെടുത്ത് ഒരു സഹായവും ചെയ്യാതെ പോയി എന്ന് അഭിഭാഷകരിലൊരാളായ രാജേഷ് പട്ടേല്‍ പറയുന്നു. പിന്നീട് അഭിഭാഷകര്‍ ഒരു ആംബുലന്‍സ് വിളിച്ചുവരുത്തി മൃതദേഹം രാംസിംഗിന്റെ വീട്ടിലെത്തിക്കുകയായിരുന്നു. അതേസമയം ഇത്തരമൊരു സംഭവമേ നടന്നിട്ടില്ലെന്നാണ് പോലീസിന്റെ വിശദീകരണം.

കഴിഞ്ഞ ദിവസം ഒഡീഷയിലെ കാലഹണ്ടിയില്‍ ആംബുലന്‍സിന് നല്‍കാന്‍ പണമില്ലാത്തതിനാല്‍ ഭാര്യയുടെ മൃതദേഹവും വഹിച്ച് മകളോടൊപ്പം 10 കിലോമീറ്റര്‍ നടക്കേണ്ടി വന്ന ദന മാഞ്ചിയുടെ അനുഭവം വാര്‍ത്തകളില്‍ നിറയുന്നതിന് ഇടയിലാണ് മധ്യപ്രദേശില്‍ നിന്നും മറ്റൊരു വാര്‍ത്ത കൂടി.