വാടക ഗര്ഭധാരണത്തിലൂടെ ജനിച്ച കുഞ്ഞിനെ അനാഥാലയത്തിലാക്കാനുള്ള നീക്കത്തിനെതിരെ സുഷമ സ്വരാജ്
ബ്രിട്ടീഷ് ദമ്പതികള്ക്ക് വാടക ഗര്ഭധാരണത്തിലൂടെ പിറന്ന കുഞ്ഞിനെ പാസ്പോര്ട്ട് ഉള്പ്പെടെയുള്ള യാത്രാരേഖകള് അനുവദിക്കുന്നതിലെ സാങ്കേതിക തടസങ്ങള് നിമിത്തം അനാഥാലയത്തിലാക്കാനുള്ള നീക്കത്തിനെതിരെ കേന്ദ്ര വിദേശകാര്യമന്ത്രി സുഷമ സ്വരാജ്. ബ്രിട്ടീഷ് ദമ്പതികളായ ക്രിസ്, മിഷേല് ന്യൂമാന് എന്നിവര്ക്ക് ഇന്ത്യയില് വച്ച് വാടക ഗര്ഭധാരണത്തിലൂടെ പിറന്ന പെണ്കുഞ്ഞിനെ നാട്ടിലേക്ക് കൊണ്ടുപോകുന്നതിന് പാസ്പോര്ട്ട് അനുവദിക്കാത്ത ബ്രിട്ടീഷ് എംബസിയുടെ തീരുമാനത്തിനെതിരെയാണ് സുഷമയുടെ പ്രതിഷേധം.
വാടക ഗര്ഭധാരണത്തിന് വ്യാവസായിക മുഖം നല്കിയവര്തന്നെ ഈ പ്രശ്നത്തിന് പരിഹാരം കാണണമെന്നും സുഷമ ആവശ്യപ്പെട്ടു. കേന്ദ്രസര്ക്കാരിന്റെ പുതിയ വാടക ഗര്ഭധാരണ നിയന്ത്രണ ബില്ലിനെതിരെ വിമര്ശനങ്ങള് ഉയരുന്ന പശ്ചാത്തലത്തിലാണ് സുഷമയുടെ വാക്കുകളെന്നത് ശ്രദ്ധേയമാണ്. വ്യാവസായികാടിസ്ഥാനത്തിലുള്ള വാടക ഗര്ഭധാരണത്തിന് ഇന്ത്യയില് നിയന്ത്രണം വരുന്നതിനു മുന്പാണ് ബ്രിട്ടീഷ് ദമ്പതികള് കുഞ്ഞിനായി ഇന്ത്യയിലെത്തിയത്.
ട്വിറ്ററിലൂടെയായിരുന്നു സുഷമ സ്വരാജിന്റെ വിമര്ശനം. വാടക ഗര്ഭധാരണത്തിലൂടെ പിറന്ന കുഞ്ഞിന് അനാഥാലയമാണോ അഭയസ്ഥാനമാകേണ്ടതെന്നായിരുന്നു സുഷമയുടെ ട്വീറ്റ്.
കുഞ്ഞിന്റെ ജനനവുമായി ബന്ധപ്പെട്ട് മെഡിക്കല് വീസയിലാണ് ക്രിസും മിഷേലും ഇന്ത്യയിലെത്തിയത്. മെഡിക്കല് വീസയുടെ കാലാവധി ഒക്ടോബര് ഏഴിന് അവസാനിക്കുകയാണ്.
എന്നാല്, ഇതുവരെയും കുഞ്ഞിന് പാസ്പോര്ട്ട് അനുവദിക്കാന് ബ്രിട്ടീഷ് എംബസി തയാറായിട്ടില്ല. ഒക്ടോബര് ഏഴിന് മുന്പ് കുഞ്ഞിന്റെ പാസ്പോര്ട്ട് ഉള്പ്പെടെയുള്ള യാത്രാരേഖകള് ശരിയാക്കാനാകില്ലെന്നാണ് അവരുടെ നിലപാട്. മതിയായ പരിശോധനകള് പൂര്ത്തിയാക്കിയശേഷമേ യാത്രാരേഖകള് അനുവദിക്കാനാകൂ എന്ന കടുംപിടുത്തത്തിലാണ് എംബസി. ഇതോടെയാണ് കുഞ്ഞിനെ അനാഥാലയത്തില് ഏല്പ്പിച്ച് മടങ്ങാന് ദമ്പതികള് നിര്ബന്ധിതരായത്.
https://www.facebook.com/Malayalivartha
