ഒത്തുചേരാന്‍ സമയമായി എല്ലാവരും അണിചേരൂ. കൊതുകിനെ തുരത്തൂ. കൊതുകുകള്‍ക്കെതിരായ 'യുദ്ധ'ത്തില്‍ എല്ലാവരും ഒന്നിക്കണമെന്ന് ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍. ദില്ലിയില്‍ ചിക്കുന്‍ഗുനിയ ഡെങ്കി രോഗങ്ങള്‍ വ്യപകമായി പടരുന്ന സാഹചര്യത്തില്‍ കൊതുക് നിര്‍മാര്‍ജ്ജനത്തില്‍ ദില്ലി നേതൃത്വം രാഷ്ട്രീയം മറന്ന് കൈകോര്‍ക്കണമെന്ന് കെജ്‌രിവാള്‍ അഭിപ്രായപ്പെട്ടു. കഴിഞ്ഞ ആറ് വര്‍ഷത്തിനിടെ ഇതാദ്യമായാണ് ദില്ലിയില്‍ ചിക്കുന്‍ഗുനിയ രോഗം വ്യാപകമായത്.
ചിക്കുന്‍ഗുനിയഡെങ്കി രോഗങ്ങളാല്‍ ഇത്തവണ 33 മരണങ്ങളാണ് ആശുപത്രികളില്‍ റിപ്പോര്‍ട്ട് ചെയ്യപ്പെട്ടിട്ടുള്ളത്. 2,800 ല്‍ അധികം ജനങ്ങള്‍ക്കാണ് രോഗം സ്ഥിരീകരിച്ചിരിക്കുന്നത്. ബംഗലൂരുവില്‍ നിന്നും ഞായറാഴ്ച ദില്ലിയിലെത്തിയ കെജ്‌രിവാള്‍ രാഷ്ട്രീയ താത്പര്യങ്ങളെ മാറ്റി നിര്‍ത്തി കൊതുകുകള്‍ക്കെതിരായ യുദ്ധത്തില്‍ പങ്ക് ചേരണമെന്ന് വീഡിയോ സന്ദേശത്തിലൂടെ ആഹ്വാനം ചെയ്യുകയായിരുന്നു. ദില്ലിയിലെ മുന്‍സിപ്പല്‍ കോര്‍പ്പറേഷനാണ് കൊതുക നിര്‍മാര്‍ജ്ജനത്തിന്റെ ഉത്തരവാദിത്വമുള്ളതെന്നും എന്നാല്‍ മുനിസിപ്പല്‍ കോര്‍പ്പറേഷന്‍ നടപടികള്‍ സ്വീകരിക്കാത്തതിനാല്‍ എല്ലാവരും ഒരുമിച്ച് പ്രവര്‍ത്തിക്കാന്‍ സന്നദ്ധരാകണമെന്നും കെജ്‌രിവാള്‍ വ്യക്തമാക്കി.
രോഗങ്ങള്‍ വ്യാപകമായ പശ്ചാത്തലത്തില്‍ നേരത്തെ ഡല്‍ഹി ലഫ്. ഗവര്‍ണര്‍ നജീബ് ജങ്ങും ദില്ലിയിലെ ആശുപത്രികളില്‍ സന്ദര്‍ശനം നടത്തിയിരുന്നു. രോഗങ്ങളെ കുറിച്ച് ജനങ്ങളെ ബോധവാന്മാരാക്കാന്‍ ദില്ലി സര്‍ക്കാരിന്റെ നേതൃത്വത്തില്‍ പദ്ധതികള്‍ ആവിഷ്‌കരിച്ച് വരികയാണ്. ചിക്കുന്‍ഗുനിയ കാരണം ആരും മരണപ്പെടില്ലെന്ന ദില്ലി ആരോഗ്യ വകുപ്പ് മന്ത്രി സത്യന്ദര്‍ ജയിനിന്റെ പ്രസ്താവന നിരുത്തരവാദപരമാണെന്നും വിഷയത്തെ കുറിച്ചുള്ള അജ്ഞതയാണ് ഇത് കാണിക്കുന്നതെന്നും ദില്ലി കോണ്‍ഗ്രസ് നേതാവ് അജയ് മാക്കന്‍ പ്രതികരിച്ചു. ലോക ആരോഗ്യ സംഘടനയുടെ റിപ്പോര്‍ട്ടുകള്‍ പ്രകാരം 2015 ല്‍ 191 പേരാണ് അമേരിക്കയില്‍ മരണപ്പെട്ടതെന്ന് അജയ് മാക്കന്‍ വ്യക്തമാക്കി.