അന്താരാഷ്ട്ര സമിതികളില് നിന്ന് പാക്കിസ്ഥാനെ ഒറ്റപ്പെടുത്താന് ഇന്ത്യ ഒരുങ്ങുന്നു
ഉറി സൈനികതാവളം ആക്രമണത്തിന്റെ പശ്ചാത്തലത്തില് അന്താരാഷ്ട്ര സമിതികളില് നിന്ന് പാക്കിസ്ഥാനെ ഒറ്റപ്പെടുത്താന് ഇന്ത്യ ഒരുങ്ങുന്നു. ഭീകരാക്രമണത്തില് പാക് പങ്ക് വ്യക്തമാക്കുന്ന തെളിവുകള് ഇന്ത്യ അന്താരാഷ്ട്ര സമിതികള്ക്ക് നല്കും. പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന യോഗത്തിലാണ് തീരുമാനം. സെപ്റ്റംബര് 26ന് നടക്കുന്ന യുഎന് ജനറല് അസംബ്ലിയിലും നവംബറില് ഇസ്ലാമാബാദില് നടക്കുന്ന സാര്ക്ക് ഉച്ചകോടിയിലും തെളിവുകള് നിരത്താണ് ഇന്ത്യ തയാറെടുക്കുന്നത്. പ്രധാനമന്ത്രി നരേന്ദ്ര മോദി സാര്ക്കില് പങ്കെടുക്കില്ലെന്ന് കേന്ദ്രസര്ക്കാര് വ്യക്തമാക്കിയിരുന്നു.
ദേശീയ അന്വേഷണ ഏജന്സിയും മിലിട്ടറി ഇന്റലിജന്സും ചേര്ന്ന് പാക് പങ്ക് സംബന്ധിച്ച് തെളിവുകള് ശേഖരിക്കാന് ആരംഭിച്ചു. ഭീകരാക്രമണത്തിന് പിന്നില് ജയഷ് ഇ മുഹമ്മദ് ഭീകര സംഘടനയാണെന്ന് മിലിട്ടറി ഓപ്പറേഷന്സ് ഡയറക്ടര് ജനറല് ലഫ്. ജനറല് രണ്ബീര് സിങ് മാധ്യമങ്ങളോട് പറഞ്ഞു. പാക് അടയാളമുള്ള ആയുധങ്ങള് ഉപയോഗിച്ചാണ് ഭീകരര് ആക്രമണം നടത്തിയത്. പാക് ഭരണകൂടത്തിന്റെ പിന്തുണയോടെ ആയിരുന്നു ആക്രമണമെന്നും സംഭവത്തില് ഇന്ത്യയുടെ പ്രതികരണം പാക് സൈനിക മേധാവികളെ അറിയിച്ചുവെന്നും അദ്ദേഹം പറഞ്ഞു.
വടക്കന് കാഷ്മീരിലെ ഉറി സെക്ടറില് സൈനികതാവളത്തിനു നേരേ ഞായറാഴ്ച പുലര്ച്ചെയുണ്ടായ ഭീകരാക്രമണത്തില് 17 സൈനികരാണ് കൊല്ലപ്പെട്ടത്. 20 ഓളം പേര്ക്കു പരിക്കേറ്റു. നിയന്ത്രണരേഖയ്ക്കടുത്തുള്ള ഡോഗ്ര 10 റെജിമെന്റിന്റെ അഡ്മിനിസ്ട്രേറ്റീവ് ബേസില് പട്ടാളവേഷത്തിലെത്തിയ നാലു ഭീകരരാണ് ആക്രമണം നടത്തിയത്. മൂന്നു മണിക്കൂര് നീണ്ടുനിന്ന പോരാട്ടത്തില് സൈന്യം നാലു ഭീകരരെയും വധിച്ചിരുന്നു.
https://www.facebook.com/Malayalivartha
