ഉറി ഭീകരാക്രമണം: ആര്എസ്എസ് നിലപാട് എന്ഡിഎ സര്ക്കാരിനെ സ്വാധീനിക്കുമോ
18 സൈനികര് കൊല്ലപ്പെട്ട ഉറി ഭീകരാക്രമണത്തില് ഇന്ത്യ എന്ത് നടപടിയാകും സ്വീകരിക്കുക എന്നാണ് രാജ്യം ഉറ്റ് നോക്കുന്നത്. തിരിച്ചടി നല്കാന് വന് സമ്മര്ദ്ദമാണ് പ്രധാനമന്ത്രിക്ക് നരേന്ദ്ര മോദിക്ക് മേല്. എന്നാല് ഇക്കാര്യത്തില് ആര്എസ്എസ് നിലപാട് കേന്ദ്ര സര്ക്കാരിനെ സ്വാധീനിക്കുമോ എന്ന ചോദ്യവും ഉയരുന്നുണ്ട്.
പാകിസ്താനെതിരെ ശക്തമായ വിമര്ശനങ്ങളാണ് ബിജെപിയും ആര്എസ്എസും സ്വീകരിക്കുന്നത്. ആഗോള ഭീകരതയുടെ ആസ്ഥാനമായി പാകിസ്താന് മാറിയെന്നാണ് ആര്എസ്എസ് മുതിര്ന്ന നേതാവും ബി.ജെ.പി ദേശീയ ജനറല് സെക്രട്ടറിയുമായ രാംമാധവ് പറഞ്ഞത്. പാകിസ്താന് ഇന്ത്യക്ക് മാത്രമല്ല ലോകത്തിന് മുഴുവന് ഭീഷണിയായി മാറി. തീവ്രവാദം ദേശീയ അജണ്ടയായി സ്വീകരിച്ച രാജ്യമാണ് പാകിസ്താന്. പാകിസ്താനെ തീവ്രവാദ രാഷ്ട്രമായി പ്രഖ്യാപിക്കാന് ലോകരാജ്യങ്ങള് തയ്യാറാകണമെന്നും രാംമാധവ് ആവശ്യപ്പെട്ടു.
ഭീകരര്ക്കു തക്ക തിരിച്ചടി നല്കുമെന്നു പ്രധാനമന്ത്രി ഉറപ്പുനല്കിയിട്ടുണ്ടെന്നും അദ്ദേഹം വ്യക്തമാക്കുന്നു. 'ഒരു പല്ലു നഷ്ടപ്പെട്ടാല് പകരം എതിരാളിയുടെ താടിയെല്ലു തകര്ക്കണം.സംയമനത്തിന്റെ സമയം കഴിഞ്ഞു. ഭീരുക്കളും ദുര്ബലരുമാണ് ഭീകരത കൊണ്ട് നിഴല്യുദ്ധം നടത്തുന്നതെങ്കില്, അതിനു നേരേ നിരന്തരം സംയമനം പുലര്ത്തുന്നതു കഴിവില്ലായ്മയുടെ ലക്ഷണമാണ്'. ഇന്ത്യ അതല്ലെന്നു തെളിയിക്കണമെന്നും രാം മാധവ് പറഞ്ഞു.
ആര്എസ്എസ് ജനറല് സെക്രട്ടറി സുരേഷ് ബയ്യാജി ജോഷിയും പാകിസ്താനെതിരെ ശക്തമായ വിമര്ശനങ്ങളുമായി രംഗത്തെത്തി. പാക് സൈന്യത്തിന്റെ പിന്തുണയോടെ ഭീകരര് ഇന്ത്യയില് നിരന്തര ആക്രമണങ്ങള് നടത്തുകയാണ്. മുംബൈ സ്ഫോടനം, പത്താന്കോട്ട് ആക്രമണം തുടങ്ങിയവയക്കെല്ലാം പിറകില് പാകിസ്താനാണെന്ന് ഇന്ത്യ ആരോപിക്കുന്നു.ആര്എസ്എസ് ശക്തമായ നിലപാട് സ്വീകരിക്കുമ്പോള് പാകിസ്താനെതിരെ കേന്ദ്ര സര്ക്കാര് ഇനി എന്ത് നടപടിയാകും സ്വീകരിക്കുക എന്നത് നിര്ണ്ണായകമാണ്.
https://www.facebook.com/Malayalivartha
