ഇതിലൊന്നും ഞങ്ങള്‍ തളരില്ല. അച്ഛന്റെ മരണത്തില്‍ വേദനയുണ്ട്. പക്ഷേ അച്ഛന്‍ നാടിന് വേണ്ടിയാണ് വീരമൃത്യുവരിച്ചത്. അച്ഛന്റെ മരണത്തിന് കാരണമായ ഭീകരരോട് കടുത്ത വിദ്വേഷമുണ്ട്. അവരോട് പ്രതികാരം വീട്ടുക തന്നെ ചെയ്യും. ഉറച്ച നെഞ്ചോടെ പിതാവിനെപ്പോലെ സൈന്യത്തില്‍ ചേര്‍ന്നു പോരാടിക്കൊണ്ടാവും ആ പ്രതികാരം വീട്ടല്‍. പറയുന്നത് മറ്റാരും അല്ല. ഉറി ആക്രമണത്തില്‍ കൊല്ലപ്പെട്ട ഹവില്‍ദാര്‍ രവി പോള്‍ സലോത്രയുടെ മകനായ പത്തുവയസ്സുകാരന്‍ വാന്‍ഷ് ആണ്.

കഴിഞ്ഞ 23 വര്‍ഷമായി സൈന്യത്തില്‍ ചേര്‍ന്നു രാജ്യത്തിനു വേണ്ടി പോരാടിയ രവി പോള്‍ ഉറി ആക്രമണത്തില്‍ ജീവന്‍ വെടിഞ്ഞ 18 ധീരരക്തസാക്ഷികളില്‍ ഒരാളായിരുന്നു. പത്തു വയസ്സുകാരന്‍ വാന്‍ഷിനു പുറമേ ഭാര്യ ഗീത, ഇളയമകനായ സുദന്‍ശീഷ്, 80 വയസ്സുകാരിയായ അമ്മ എന്നിവരടങ്ങുന്നതാണ് രവി പോളിന്റെ കുടുംബം.

എന്നും അതിരാവിലെ വിളിച്ച് വിശേഷങ്ങള്‍ തിരക്കിയിരുന്ന പിതാവ് കൊല്ലപ്പെട്ടതിന്റെ തലേദിവസവും തന്നെ വിളിച്ച് വിശേഷങ്ങള്‍ തിരക്കിയിരുന്നു. തന്നെ ഒരു ഡോക്ടര്‍ ആക്കണമെന്നായിരുന്നു അച്ഛന്റെ ആഗ്രഹം. ഇനി മിലിട്ടറി ഡോക്ടര്‍ ആയി താന്‍ ആ ആഗ്രഹം നിറവേറും. വാന്‍ഷ് പറയുന്നു.

ജമ്മുവിലെ സാംബ ജില്ലയിലെ ഡോഗ്ര പ്രദേശത്താണ് രവി പോളിന്റെ കുടുംബം താമസിക്കുന്നത്.