മധുരയില്‍ യുവാവിനെ കുത്തിക്കൊന്ന ആറംഗ സംഘത്തിന് ജീവപര്യന്തം തടവും പിഴയും. മധുര ജുഡീഷ്യല്‍ മജിസ്്‌ട്രേറ്റ് കോടതിയാണ് ശിക്ഷ വിധിച്ചത്. 2011ലാണ് കേസിനാസ്പദമായ സംഭവം നടന്നത്. 27 കാരനായ ശരവണനാണ് പട്ടാപ്പകല്‍ ക്രൂരമായി കൊല്ലപ്പെട്ടത്. ദിവസങ്ങള്‍ക്കുള്ളില്‍ പൊലിസ് പ്രതികളെ പിടികൂടി. സമീപവാസികളായ സതീഷ് കുമാറും സംഘവുമാണ് കൃത്യത്തിന് പിന്നില്‍. കൊലപാതക കാരണത്തെക്കുറിച്ച് പൊലിസ് പറയുന്നത് ഇങ്ങനെ. ക്ഷേത്രോല്‍സവങ്ങള്‍ക്കായി സ്ഥിരമായി ശരവണന്‍ പിരിവ് നടത്തുമായിരുന്നു.
ഒരിയ്ക്കല്‍ ഇതിനെച്ചൊല്ലി സതീഷും കൂട്ടാളികളുമായി ശരവണന്‍ വഴക്കിട്ടു. ഇതിന്റെ വൈരാഗ്യമായാണ് കൊലപാതകം ആസൂത്രണം ചെയ്തത്. പട്ടാപകല്‍ ഒട്ടേറെ പേരുടെ മുന്നില്‍ വച്ചായിരുന്നു കൊലപാതകം. തുടര്‍ന്ന് ഓടി രക്ഷപ്പെട്ട പ്രതികളെ പൊലിസ് പിടികൂടുകയായിരുന്നു. അഞ്ച് വര്‍ഷം നീണ്ട വിചാരണയ്‌ക്കൊടുവിലാണ് പ്രതികള്‍ കുറ്റക്കാരെന്ന് കണ്ടെത്തി ശിക്ഷ വിധിച്ചത്. ജീവപര്യന്തം തടവിനൊപ്പം ഏഴായിരം രൂപ വീതം പിഴയുമടക്കണം. ഈ തുക ശരവണന്റെ കുടുംബത്തിന് കൈമാറണമെന്നും കോടതി നിര്‍ദേശം നല്‍കി.