അമ്മമാരെ വൃദ്ധസദനങ്ങളിലാക്കി സുഖവാസത്തിന് പോകുന്നവര്‍ അറിയുക, നിങ്ങളുടെ അമ്മമാര്‍ എങ്ങനെ കഴിയുന്നുവെന്ന്. അവര്‍ ചിലപ്പോള്‍ ലൈംഗിക പീഢനങ്ങള്‍ പോലുള്ള ശാരീരിക,മാനസിക പീഡനങ്ങള്‍ ഏറ്റുവാങ്ങി നിങ്ങള്‍ സമ്മാനിച്ച ദുരിതം ഓര്‍മിച്ച് കരയുന്നുണ്ടാകം. കഴിഞ്ഞ ദിവസം നിയമസഭയില്‍ ഇതു സംബന്ധിച്ച വിശദാംശങ്ങള്‍ നിരത്തി എം.കെ. മുനീര്‍ അവതരിപ്പിച്ച ശ്രദ്ധക്ഷണിക്കല്‍ പ്രമേയമാണ് അന്വേഷണത്തിലേക്ക് കാര്യങ്ങള്‍ എത്തിച്ചത്. സ്വകാര്യ വയോധികസദനങ്ങള്‍ കേന്ദ്രീകരിച്ചു വയോജനങ്ങള്‍ക്കെതിരെ നടക്കുന്ന ലൈംഗിക അതിക്രമങ്ങളെക്കുറിച്ച് ഉന്നതതല അന്വേഷണം നടത്താന്‍ സര്‍ക്കാര്‍ നടപടി തുടങ്ങി. 
സ്വകാര്യ വയോധികസദനങ്ങള്‍ കേന്ദ്രീകരിച്ചു സ്ത്രീകള്‍ക്കെതിരെ ഗുരുതര പീഡനങ്ങള്‍ നടക്കുന്നതായി എം കെ മുനീര്‍ പറഞ്ഞു. ഇക്കാര്യം രഹസ്യമായി അന്വേഷിച്ച ഒരു സംഘം തനിക്കു റിപ്പോര്‍ട്ട് നല്‍കിയതായും അദ്ദേഹം അറിയിച്ചു. വയോധികകളെ മയക്കിക്കിടത്തിയാണു വൈകൃതങ്ങള്‍ക്കു വിധേയമാക്കുന്നത്. മുത്തശ്ശിയെ പീഡിപ്പിച്ച സംഭവവും എണ്‍പത്തിയഞ്ചുകാരിയെ ബന്ധു നിരന്തര പീഡനത്തിനു വിധേയമാക്കിയതുമെല്ലാം മുനീര്‍ സഭയില്‍ വിശദീകരിച്ചു. ഈ റിപ്പോര്‍ട്ടും അതു തയാറാക്കിയവരുടെ വിശദാംശങ്ങളും മന്ത്രി കെ.കെ. ശൈലജയുടെ ആവശ്യപ്രകാരം അദ്ദേഹം അവര്‍ക്കു കൈമാറി. മാറുന്ന ജീവിതശൈലിയുടെ ഭാഗമായി കേരളീയ ജീവിതത്തില്‍ പ്രത്യക്ഷപ്പെടുന്ന ഞെട്ടിപ്പിക്കുന്ന പ്രവണതകളാണ് ഇതെന്നു മന്ത്രി ശൈലജ അഭിപ്രായപ്പെട്ടു.
മുനീറിന്റെ വെളിപ്പെടുത്തലുകള്‍ വെളിപ്പെടുത്തലുകള്‍ ഞെട്ടിക്കുന്നവയാണെന്നു മുഖ്യമന്ത്രി പറഞ്ഞിരുന്നു. അന്വേഷണത്തിന് സാമൂഹിക വകുപ്പ് നടപടിയെടുക്കുകയും ചെയ്തു. 577 സ്വകാര്യ വയോധികസദനങ്ങള്‍ കേരളത്തിലുണ്ട്. മാര്‍ഗരേഖകളെല്ലാം ഇവര്‍ പാലിക്കുന്നുവെന്ന് ഉറപ്പാക്കും. സര്‍ക്കാര്‍ വയോധികസദനങ്ങളിലെ സൗകര്യം മെച്ചപ്പെടുത്തും. വയോജനങ്ങളുടെ പരാതികള്‍ ശ്രവിക്കാന്‍ ആര്‍ഡിഒമാര്‍ തയാറാകുന്നില്ല എന്ന ആക്ഷേപം പരിശോധിച്ചു കുറ്റക്കാര്‍ക്കെതിരെ നടപടിയെടുക്കാനും സര്‍ക്കാര്‍ തീരുമാനിച്ചു. 
നിയമസഭയില്‍ മുനീറിന്റെ സബ്മിഷനോട് പിണറായിയുടെ പ്രതികരണം ഇങ്ങനെയായിരുന്നു അതു കേട്ടതില്‍ നിന്നു പെട്ടെന്നു മുക്തരാകാന്‍ പോലും ആര്‍ക്കും കഴിയില്ല. ഇക്കാര്യം അതീവ ഗൗരവത്തോടെ കാണുന്നു പിണറായി വ്യക്തമാക്കി. വയോജനങ്ങള്‍ അനുഭവിക്കുന്ന പ്രശ്‌നങ്ങളെക്കുറിച്ച് അന്വേഷിച്ചു റിപ്പോര്‍ട്ട് നല്‍കാന്‍ പ്രത്യേക സംഘത്തെ നിയോഗിച്ചതായി മന്ത്രി കെ.കെ. ശൈലജയും അറിയിച്ചു.