വിജിലന്‍സ് ഡയറക്ടര്‍ ജേക്കബ് തോമസ് സത്യസന്ധനായ ഉദ്യോഗസ്ഥനെന്ന് ഭരണപരിഷ്‌കാര കമ്മീഷന്‍ ചെയര്‍മാന്‍ വിഎസ് അച്യുതനാന്ദന്‍. അഴിമതി ആരോപണങ്ങള്‍ ഉയര്‍ന്നതിനെ തുടര്‍ന്ന് വിജിലന്‍സ് ഡയറക്ടര്‍ പദവി ഒഴിയാനുള്ള തീരുമാനത്തെ സിപിഎം എതിര്‍ത്തിരുന്നു.

ഇതിനു പിന്നാലെയാണ് ജേക്കബ് തോമസിന് പിന്തുണയുമായി വി.എസും രംഗത്തെത്തിയത്. ജേക്കബ് തോമസ് സത്യസന്ധനായ ഉദ്യോഗസ്ഥനാണ്, അദ്ദേഹത്തിന് പദവിയില്‍ തുടരുന്നതിനുള്ള സൗകര്യങ്ങള്‍ സര്‍ക്കാര്‍ ചെയ്തു നല്‍കുമെന്നാണ് താന്‍ കരുതുന്നതെന്നും വി.എസ് പറഞ്ഞു.

മുന്‍ മന്ത്രിമാരായ കെ.എം.മാണിയുടേയും ബാബുവിന്റേയും കൂട്ടത്തില്‍പെട്ടവരാണ് ജേക്കബ് തോമസിനെതിരെ അപവാദ പ്രചരണം നടത്തുന്നത്. ഇതെല്ലാം അര്‍ഹിക്കുന്ന അവജ്ഞയോടെ തള്ളുകയാണ് വേണ്ടതെന്ന് വി.എസ് പറഞ്ഞു. ഇ.പി.ജയരാജനെതിരായ ആരോപണമാണോ ജേക്കബ് തോമസിനെ സമ്മര്‍ദ്ദത്തിലാക്കിയതെന്ന ചോദ്യത്തിന് അതെല്ലാം തള്ളുന്നതായി വി.എസ് മറുപടി നല്‍കി.

ഇന്നലെയാണ് വിജിലന്‍സ് പദവി ഒഴിയുന്നതായി കാണിച്ച് ജേക്കബ് തോമസ് മുഖ്യമന്ത്രിക്ക് രാജിക്കത്ത് സമര്‍പ്പിച്ചത്. മുഖ്യമന്ത്രിക്കും ആഭ്യന്തര സെക്രട്ടറിക്കുമാണ് കത്ത് നല്‍കിയത്. വ്യക്തിപരമായ കാരണങ്ങളാല്‍ ഒഴിയാന്‍ അനുവദിക്കണമെന്ന് സര്‍ക്കാരിന് നല്‍കിയ കത്തില്‍ ജേക്കബ് തോമസ് പറയുന്നു. കത്ത് ലഭിച്ചതായി സ്ഥിരീകരിച്ച അഭ്യന്തരസെക്രട്ടറി നളിനി നെറ്റോ കത്ത് ഉടന്‍ മുഖ്യമന്ത്രിക്ക് കൈമാറുമെന്നും ഇക്കാര്യത്തില്‍ അന്തിമതീരുമാനമെടുക്കേണ്ടത് മുഖ്യമന്ത്രിയാണെന്നും അറിയിച്ചിരുന്നു.

തുറമുഖ വകുപ്പ് ഡയറക്ടറായിരിക്കെ സോളാര്‍ പാനല്‍ സ്ഥാപിക്കുന്നതില്‍ ക്രമക്കേട് നടത്തിയെന്നും, ഇതുവഴി സര്‍ക്കാരിന് ലക്ഷക്കണക്കിന് രൂപയുടെ നഷ്ടം വരുത്തിയെന്നും അദ്ദേഹത്തിനെതിരെ അച്ചടക്ക നടപടിയെടുക്കണമെന്നുമുള്ള ധനകാര്യ പരിശോധനാ വിഭാഗത്തിന്റെ റിപ്പോര്‍ട്ട് കഴിഞ്ഞ ദിവസം പുറത്തുവന്ന സാഹചര്യത്തിലാണ് ജേക്കബ് തോമസിന്റെ തീരുമാനമെന്നാണ് സൂചന.

വാര്‍ത്ത പുറത്തുവന്നതിനു പിന്നാലെ പ്രതിപക്ഷവും ജേക്കബ് തോമസിനെതിരെ രംഗത്തെത്തി. ആദ്യം ആരോപണത്തെ എതിര്‍ത്ത് രംഗത്തെത്തിയ ജേക്കബ് തോമസ് പിന്നീട് പദവി ഒഴിയാന്‍ സന്നദ്ധത പ്രകടിപ്പിക്കുകയായിരുന്നു. ഐഎഎസ് ഉദ്യോഗസ്ഥര്‍ അടക്കമുള്ളവര്‍ തന്റെ വിശ്വാസ്യതയെ ചോദ്യം ചെയ്യുന്ന വിധത്തില്‍ വാര്‍ത്തകള്‍ നല്‍കുന്നുവെന്നും ഇത് തനിക്ക് മനോവേദനയുണ്ടാക്കുന്ന കാര്യമാണെന്നും ജേക്കബ് തോമസ് മുഖ്യമന്ത്രിക്ക് നല്‍കിയ കത്തില്‍ വിശദീകരിച്ചു.