സൗമ്യ കൊലക്കേസില്‍ നിയമസഹായമഭ്യര്‍ത്ഥിച്ച് എഡിജിപി ബി.സന്ധ്യ സുപ്രീം കോടതി മുന്‍ ജസ്റ്റിസ് മാര്‍ക്കേണ്ഡേയ കട്ജുവുമായി കൂടിക്കാഴ്ച നടത്തി. കേസിലെ പ്രതി ഗോവിന്ദച്ചാമിയുടെ വധശിക്ഷ റദ്ദാക്കിയ വിധി പുനപരിശോധിക്കണമെന്ന് ആവശ്യപ്പെട്ട് സമര്‍പ്പിച്ച ഹര്‍ജിയിലാണ് ജസ്റ്റീസ് കട്ജുവിന്റെ നിയമസഹായം അഭ്യര്‍ഥിച്ചിരിക്കുന്നത്. നായിഡയിലുള്ള കട്ജുവിന്റെ വസതിയില്‍ വെച്ച് തിങ്കളാഴ്ച വൈകുന്നേരമായിരുന്നു കൂടിക്കാഴ്ച. സൗമ്യ വധക്കേസിലെ വിചാരണ കോടതി ജഡ്ജിയായിരുന്ന കെ.രവീന്ദ്രബാബുവും കേസിലെ പബ്ലിക് പ്രോസിക്യൂട്ടറായിരുന്ന സുരേഷനും എഡിജിപിക്കൊപ്പം ഉണ്ടായിരുന്നു.

സംസ്ഥാന സര്‍ക്കാര്‍ ഔദ്യോഗികമായി ആവശ്യപ്പെട്ടാല്‍ നിയമസഹായം നല്‍കാമെന്ന് കട്ജു അറിയിച്ചിട്ടുണ്ട്. സൗമ്യ വധക്കേസിലെ പ്രതി ഗോവിന്ദച്ചാമിയുടെ വധശിക്ഷ റദ്ദാക്കിയ സുപ്രീം കോടതി വിധിക്കെതിരേ രൂക്ഷ വിമര്‍ശനം നേരത്തെ കട്ജു നടത്തിയിരുന്നു. കേസില്‍ പ്രതി ഗോവിന്ദച്ചാമിയെ കൊലക്കുറ്റത്തില്‍നിന്ന് ഒഴിവാക്കി വധശിക്ഷ റദ്ദാക്കിയ വിധി തെറ്റാണെന്ന നിലപാടു കോടതിയില്‍ നേരിട്ടു ഹാജരായി വിശദീകരിക്കാന്‍ കട്ജുവിനോട് സുപ്രീംകോടതിയുടെ മൂന്നംഗ ബെഞ്ച് ആവശ്യപ്പെട്ടിരുന്നു.

ഇതിനു പിന്നാലെയാണ് എഡിജിപി: ബി. സന്ധ്യ കട്ജുവുമായി കൂടിക്കാഴ്ച നടത്തിയത്. സൗമ്യവധക്കേസില്‍ കഴിഞ്ഞമാസം 15നു നല്‍കിയ വിധി പുനഃപരിശോധിക്കണമെന്നും പരസ്യവാദം വേണമെന്നുമുള്ള ജസ്റ്റിസ് കട്ജുവിന്റെ ഫെയ്‌സ്ബുക് പോസ്റ്റ് പുനഃപരിശോധനാ ഹര്‍ജിയാക്കി മാറ്റാന്‍ സ്വമേധയാ തീരുമാനിച്ച കോടതി, അടുത്ത മാസം 11നു ഹാജരാകുന്നതിനു നോട്ടിസ് അയയ്ക്കാനും തീരുമാനിക്കുകയായിരുന്നു.