ഉത്തര് പ്രദേശില് ആയോധ്യ പ്രധാനവിഷയമാക്കി തെരഞ്ഞെടുപ്പിനെ നേരിടാന് ബിജെപി, രാമക്ഷേത്രം ഉടന് നിര്മിക്കുമെന്ന് ആര്എസ്എസ്
ഉത്തര്പ്രദേശ് തെരഞ്ഞെടുപ്പ് പ്രചാരണരംഗത്ത് അയോധ്യ പ്രധാനവിഷയമാക്കി മാറ്റാന് ആര്.എസ്.എസ്. തീരുമാനം. കഴിഞ്ഞ പത്തു വര്ഷത്തോളമായി സംഘപരിവാറിന്റെ പ്രചാരണ അജന്ഡയില്നിന്ന് പുറത്തായിരുന്ന അയോധ്യ ഇത്തവണ കൂടുതല് സജീവമാക്കി ഉള്പ്പെടുത്താനാണ് ആര്.എസ്.എസ്. നിര്ദേശം. ഉത്തര്പ്രദേശ് തെരഞ്ഞെടുപ്പിലെ ജയപരാജയം അടുത്ത ലോക്സഭാ തെഞ്ഞെടുപ്പിനെ സ്വാധീനിക്കുമെന്നിതിനാലാണ് തീവ്ര നിലപാടുകാരെ തൃപ്തിപ്പെടുത്താന് അയോധ്യ മുഖ്യവിഷയമാക്കി മാറ്റുന്നത്.
എന്നാല്, തെരഞ്ഞെടുപ്പ് പ്രകടനപത്രികയില് ഇടംപിടിക്കാറുണ്ടെങ്കിലും പത്തുവര്ഷത്തിലധികമായി ബി.ജെ.പി. അയോധ്യ പ്രശ്നത്തില് താല്പര്യം കാട്ടിയിരുന്നില്ല. പശുസംരക്ഷണം തെരഞ്ഞെടുപ്പ് വിഷയമായി ഉയര്ത്തിക്കൊണ്ടുവരാന് സംഘപരിവാര് ശ്രമിച്ചിരുന്നെങ്കിലും ഗുജറാത്തിലെ ദളിതുകളുടെ പ്രതിഷേധംമൂലം അതുഫലം കണ്ടിരുന്നില്ല. 14 വര്ഷം മുമ്പ് കൈവിട്ട ഉത്തര്പ്രദേശ് ഏതു വിധേനയും പിടിച്ചെടുക്കാനുള്ള ഒരുക്കത്തിലാണ് ബി.ജെ.പി. ഈ സാഹചര്യത്തില് രാമക്ഷേത്ര വിഷയവുമായി വിനയ് കത്യാരെപ്പോലുള്ള നേതാക്കള് വീണ്ടും സജീവമായിട്ടുണ്ട്. തീവ്രനേതാക്കളെ കയറൂരി വിടാന്തന്നെയാണ് സംഘ നേതൃത്വത്തിന്റെ തീരുമാനവും. വികസന അജന്ഡയുമായി പ്രധാന നേതാക്കള് പര്യടനം നടത്തുമ്പോള് സംഘപരിവാറിലെ രണ്ടാം നിര നേതാക്കളാകും അയോധ്യാ വിഷയം ഉന്നയിച്ച് രംഗത്തുവരിക.
അയോധ്യയില് ബാബ്റിമസ്ജിദ് തകര്ക്കപ്പെട്ട സ്ഥലത്തുതന്നെ രാമക്ഷേത്രം നിര്മിക്കാന് തീരുമാനമായതായി ആര്.എസ്.എസ്. അറിയിച്ചു. നിര്മാണം ഏതുസമയത്തും നടന്നേക്കാമെന്നും സംഘപരിവാരും ഹിന്ദും സമാജും ചേര്ന്നാണ് ഇത്തരത്തിലൊരു തീരുമാനമെടുത്തതെന്നും ആര്.എസ്.എസ്. നേതാവ് പ്രഫ. രാകേശ് സിന്ഹ പറഞ്ഞു. അയോധ്യയിലെ രാമക്ഷേത്ര നിര്മാണം ഹൈന്ദവവിശ്വാസികളുടെ വികാരമാണ്. അതു നിര്മിക്കുകതന്നെ ചെയ്യുമെന്നും അദ്ദേഹം പറഞ്ഞു.രാമനും അയോധ്യയും തെരഞ്ഞെടുപ്പ് രംഗത്ത് മുഖ്യവിഷയമാക്കി സംഘപരിവാര് മാറ്റുമെന്ന സാഹചര്യത്തില് സമാജ്വാദി പാര്ട്ടിയും സമാന ആവശ്യമുന്നയിച്ച് രംഗത്തുണ്ട്. തീവ്ര ഹിന്ദുത്വ വോട്ടുകള് ചോരാതിരിക്കാനുള്ള നീക്കമാണ് സമാജ്വാദി പാര്ട്ടിയുടേത്.
കഴിഞ്ഞ ദിവസം അയോധ്യയില് സന്ദര്ശനം നടത്തിയ കേന്ദ്രമന്ത്രി മഹേഷ് ശര്മ്മ അയോധ്യയില് രാമായണ മ്യൂസിയം സ്ഥാപിക്കണമെന്ന ആവശ്യമുന്നയിച്ചപ്പോള് സരയൂ നദിക്കരയില് രാംലീലാ തീം പാര്ക്ക് സ്ഥാപിക്കണമെന്നതാണ് ഉത്തര്പ്രദേശിലെ ഭരണകക്ഷിയായ സമാജ് വാദി പാര്ട്ടിയുടെ ആവശ്യം. ശര്മ്മയുടെ അയോധ്യാസന്ദര്ശനത്തിന് ഒരു ദിവസം മുമ്പാണ് സരയൂ നദിക്കരയില് രാംലീലാ തീം പാര്ക്ക് സ്ഥാപിക്കുകയെന്ന പദ്ധതിയുമായി സമാജ്വാദി പാര്ട്ടി നേതാവും മുഖ്യമന്ത്രിയുമായ അഖിലേഷ് യാദവ് എത്തിയത്. 1992 ഡിസംബറില് ബാബ്റി മസ്ജിദ് തകര്ക്കപ്പെടുന്നതിന് ഏറെ മുമ്പുതന്നെ രാമനും അയോധ്യയും ബി.ജെ.പിയുടെ പ്രചാരണ വിഷയമാണ്.
സുബ്രഹ്മണ്യം സ്വാമിയും ആര്.എസ്.എസും ഒരുപോലെ ക്ഷേത്രനിര്മ്മാണമെന്ന ആവശ്യത്തിലുമാണ്. ലഖ്നൗയില് ദസറ ആഘോഷത്തില് പങ്കെടുത്ത പ്രധാനമന്ത്രി നരേന്ദ്രമോഡി ജയ്ശ്രീരാം വിളിയോടെയാണ് പ്രസംഗം അവസാനിപ്പിച്ചത്. രാമക്ഷേത്രം പണിയാനുള്ള നടപടികള് എത്രയും വേഗം തുടങ്ങണമെന്ന് ശിവസേനയും സുബ്രഹ്മണ്യം സ്വാമിയും മോഡിയോട് ആവശ്യപ്പെട്ടിട്ടുണ്ട്. സമാജ് വാദി പാര്ട്ടിയാകട്ടെ നിര്ണായകമായ മുസ്ലിംവോട്ടുകള് കൈവിട്ടു പോകാതെ ഹിന്ദു വോട്ടുകള് വരുതിയിലാക്കുകയെന്ന ലക്ഷ്യത്തോടെ സൂക്ഷ്മതയോടെയാണ് നീങ്ങുന്നത്. കേന്ദ്ര ടൂറിസം സാംസ്കാരിക മന്ത്രി മഹേഷ് ശര്മ്മ അയോധ്യയില് സന്ദര്ശനം നടത്തിയതു പ്രതിപക്ഷ വിമര്ശനത്തിനിടെയാണ്. അയോധ്യയിലെ ഹനുമാന് ഗരാഹി ക്ഷേത്രം സന്ദര്ശിച്ച ശര്മ്മ രാമായണ മ്യൂസിയം സ്ഥാപിക്കാനുള്ള നടപടികള് വേഗത്തിലാക്കുമെന്ന് പ്രഖ്യാപിക്കുകയായിരുന്നു.
https://www.facebook.com/Malayalivartha
