രാജീവ് ഗാന്ധി വധക്കേസ് ശിക്ഷാ ഇളവ് തേടി പ്രതി നളിനി വനിതാ കമ്മീഷനെ സമീപിച്ചു
രാജീവ് ഗാന്ധി വധക്കേസ് പ്രതി നളിനി ശ്രീഹരന് ശിക്ഷാ ഇളവ് തേടി ദേശീയ വനിതാ കമ്മീഷനെ സമീപിച്ചു. 25 വര്ഷത്തോളം തടവ് ശിക്ഷ അനുഭവിച്ച് കഴിഞ്ഞ തനിക്ക് ഇക്കാര്യം പരിഗണിച്ച് ജയില്മോചനം നല്കണമെന്നാണ് നളിനിയുടെ അഭ്യര്ത്ഥന. അഭിഭാഷകന് പി. പുകഴേന്തി വഴിയാണ് നളിനി വനിതാ കമ്മീഷനെ സമീപിച്ചത്.
രാജ്യത്ത് ഏറ്റവുമധികം കാലം തടവ് ശിക്ഷ അനുഭവിച്ച സ്ത്രീ തടവുകാരിയാണ് താനെന്ന് നളിനി കത്തില് ചൂണ്ടിക്കാട്ടി. തമിഴ്നാട് മുന് മുഖ്യമന്ത്രിയും ഡി.എം.കെ സ്ഥാപകനുമായ സി.എന് അണ്ണാദുരൈയുടെ ജന്മദിനത്തിലും മറ്റ് വിശേഷാവസരങ്ങളിലും തടവുകാര്ക്ക് ശിക്ഷാ ഇളവ് നല്കാറുണ്ട്. എന്നാല് ഇക്കൂട്ടത്തിലൊന്നും തന്നെ പരിഗണിക്കാറില്ലെന്ന് നളിനി കത്തില് ചൂണ്ടിക്കാട്ടി.
ജയില്മോചനത്തിന് അര്ഹതയുണ്ടെങ്കിലും തന്നെ പരിഗണിക്കാറില്ല. തനിക്ക് എന്നെങ്കിലും ജയില്മോചനമുണ്ടാകുമെന്ന പ്രതീക്ഷ തന്നെ നഷ്ടപ്പെട്ടിരിക്കുകയാണെന്നും നളിനി പറഞ്ഞു. നേരത്തെ വനിതാ കമ്മീഷന്റെ ഇടപെടലിനെ തുടര്ന്ന് തന്റെ വധശിക്ഷ ജീവപര്യന്തമായി കുറച്ചത് ചൂണ്ടിക്കാട്ടിയാണ് നളിനി കത്തയച്ചിരിക്കുന്നത്.
രാജീവ് വധക്കേസില് നളിനിയുടെ ഭര്ത്താവ് മുരുകനും ജീവപര്യന്തം തടവ് ശിക്ഷ അനുഭവിക്കുകയാണ്. ശാന്തന്, പേരറിവാളന് എന്നിവരാണ് രാജീവ് വധക്കേസില് ശിക്ഷ അനുഭവിക്കുന്ന മറ്റ് പ്രതികള്.
https://www.facebook.com/Malayalivartha
