ചെയര്‍മാനായിരുന്ന സൈറസ് മിസ്ത്രിയെ രത്തന്‍ ടാറ്റ ഇടപെട്ട് പുറച്ചാക്കിയതോടെ ലോകം അറിയപ്പെടുന്ന ടാറ്റാ കമ്പനി പതനത്തിലേക്കെന്ന് സൂചന. കഴിഞ്ഞ ദിവസം ചെയര്‍മാനായി സ്ഥാനമേറ്റെടുത്ത രത്തന്‍ ടാറ്റക്കെതിരെ രൂക്ഷ വിമര്‍ശനം ഉന്നയിച്ച് മിസ്ത്രി രംഗത്തുവന്നതോടെ കമ്പനിയുടെ ഓഹരകളില്‍ കനത്ത ഇടിവാണ് രേഖപ്പെടുത്തിയത്. ലാഭകരമല്ലാത്ത അഞ്ച് ബിസിനസുകതള്‍ നടത്തിക്കൊണ്ട് പോകുന്നതിന് ടാറ്റ വലിയ വിലകൊടുക്കേണ്ടി വരുമെന്നാണ് മിസ്ത്രിയുടെ മുന്നറിയിപ്പ്. മൊത്തം മൂല്യത്തിന്റെ മൂന്നില്‍ രണ്ടും ഇതിനായി ത്യജിക്കേണ്ട അവസ്ഥയാണെന്ന മുന്നറിയിപ്പാണ് മിസ്ത്രി നല്‍കിയിരിക്കുന്നത്. ഇതോടെ ടാറ്റ കടുത്ത സാമ്പത്തിക ബാധ്യതയിലാണെന്ന് റിപ്പോര്‍ട്ടുകള്‍ പ്രചരിക്കുന്നുണ്ട്.
പുതിയ സംഭവ വികാസങ്ങളുടെ പേരില്‍ ആശങ്കയിലായ ടാറ്റ ഗ്രൂപ്പ് ഓഹരികളില്‍ മൂന്നാം ദിവസവും ഇടിവ് തുടര്‍ന്നു. ആകെ 44,000 കോടി രൂപയുടെ നഷ്ടമാണ് ഓഹരികളില്‍ ഉണ്ടായിട്ടുള്ളത്. ടാറ്റ സണ്‍സ് ഡയറക്ടര്‍ ബോര്‍ഡിന് മിസ്ത്രി അയച്ച മെയില്‍ പരസ്യമായതും ഓഹരി വിലയിടിവിന് ആക്കം കൂട്ടി. ഇന്ത്യന്‍ ഹോട്ടല്‍സ് കമ്പനിയാണ് ഏറ്റവുമധികം നഷ്ടം നേരിട്ടത്5.8 ശതമാനം. ടാറ്റ പവര്‍ 1.4 ശതമാനവും ടാറ്റ ഗ്ലോബല്‍ ബിവറേജസ് 5.1 ശതമാനവും ഇടിഞ്ഞു. ടാറ്റ മോട്ടോഴ്‌സ് 1.4 ശതമാനം, ടാറ്റ സ്റ്റീല്‍ 0.44 ശതമാനം, ടാറ്റ കമ്യൂണിക്കേഷന്‍സ് 1.7 ശതമാനം എന്നിങ്ങനെയാണ് നഷ്ടത്തിലായത്.
അതേസമയം ടാറ്റ കണ്‍സള്‍ട്ടന്‍സി സര്‍വീസസ് മാത്രം 0.7 ശതമാനം ഉയര്‍ന്ന് പിടിച്ചുനിന്നു. വരും ദിവസങ്ങളിലും ഓഹരികളില്‍ സമ്മര്‍ദമുണ്ടാകുമെന്നാണ് വിലയിരുത്തല്‍. ടാറ്റ ഗ്രൂപ്പിനു കീഴിലുള്ള വിവിധ ലിസ്റ്റഡ് കമ്പനികളില്‍ നിന്ന് ബി.എസ്.ഇ.യും എന്‍.എസ്.ഇ.യും വിശദീകരണം തേടിയിട്ടുണ്ട്. 1.18 ലക്ഷംകോടി രൂപയുടെ മൂല്യശോഷണമുണ്ടാകുമെന്ന മിസ്ത്രിയുടെ വെളിപ്പെടുത്തലിന്റെ അടിസ്ഥാനത്തിലാണിത്. ടിസിഎസ് ഒഴികെ മറ്റു പ്രധാന കമ്പനികളുടെ ഓഹരികളില്‍ ഇടിവ് രേഖപ്പെടുത്തി. ബോംബെ സ്‌റ്റോക് എക്‌സ്!ചേഞ്ചില്‍ ടിസിഎസ് ഓഹരിയില്‍ 0.68 ശതമാനം ഉയര്‍ച്ചയാണ് രേഖപ്പെടുത്തിയത്.
സൈറസിന്റെ ആരോപണങ്ങള്‍ അടിസ്ഥാന രഹിതവും അസത്യവുമാണ്. ടാറ്റ സണ്‍സ് ബോര്‍ഡ് ചെയര്‍മാന് എല്ലാ സ്വാതന്ത്ര്യവും നല്‍കിയിരുന്നു. എന്നാല്‍, മുന്‍ ചെയര്‍മാന്റെ സംസ്‌കാരവും ധാര്‍മികതയും കമ്പനിയുമായി ചേരുന്നതല്ലായിരുന്നുവെന്നും ടാറ്റാ ഗ്രൂപ്പ് വാര്‍ത്തക്കുറിപ്പില്‍ ആരോപിച്ചു.ബോര്‍ഡ് മെംബര്‍മാര്‍ക്ക് അദ്ദേഹത്തിലുള്ള വിശ്വാസം നഷ്ടപ്പെട്ടിരുന്നുവെന്നും മിസ്ത്രി ഉന്നയിച്ച ആരോപണങ്ങള്‍ അടിസ്ഥാന രഹിതമാണെന്നും ടാറ്റ ഗ്രൂപ്പ് വാര്‍ത്താക്കുറിപ്പില്‍ അറിയിച്ചു. മിസ്ത്രി ബോര്‍ഡ് അംഗങ്ങള്‍ക്ക് അയച്ച കത്ത് ചോര്‍ന്നതിലും അവര്‍ പ്രതിഷേധം രേഖപ്പെടുത്തി. സുപ്രധാനമായ ഇക്കാര്യങ്ങളില്‍ പൊതുവായ സംവാദം ആഗ്രഹിക്കുന്നില്ലെന്നും അത് ടാറ്റ ഗ്രൂപ്പിന്റെ അന്തസ്സിന് ചേരുന്നതല്ലെന്നും അവര്‍ അറിയിച്ചു.