ജഡ്ജിമാരെ നിയമിച്ചില്ലെങ്കില് കോടതികള് അടച്ച് പൂട്ടേണ്ടിവരുമെന്ന് സുപ്രീം കോടതി, ജഡ്ജിമാരുടെ നിയമന നടപടികള് വേഗതയില് ആക്കിയില്ലെങ്കില് പ്രധാനമന്ത്രിയുടെ ഓഫീസ് സെക്രട്ടറിയെ വിളിച്ചുവരുത്തും
കോടതികളിലെ ജഡ്ജിമാരുടെ ഒഴിവുകള് നികത്താത്തതില് കേന്ദ്രസര്ക്കാരിന് സുപ്രീം കോടതിയുടെ വിമര്ശനം. ജഡ്ജിമാരുടെ നിയമന നടപടികള് വേഗതയില് ആക്കിയില്ലെങ്കില് പ്രധാനമന്ത്രിയുടെ ഓഫീസ് സെക്രട്ടറിയെ വിളിച്ചുവരുത്താന് മടിക്കില്ലെന്നും മുന്നറിയിപ്പ് നല്കി.നിയമനം വൈകുകയാണെങ്കില് കോടതികള് അടച്ചുപൂട്ടേണ്ടിവരുമെന്നും ചീഫ് ജസ്റ്റീസ് ടി.എസ് താക്കൂര് അടങ്ങിയ ബെഞ്ച് സര്ക്കാരിനു വേണ്ടി ഹാജരായ അറ്റോര്ണി ജനറല് മുകുള് റോത്തഗിയ്ക്ക് നിര്ദേശം നല്കിയത്.
എന്നാല് നിയമനത്തില് സര്ക്കാരും കോടതിയും തമ്മില് എന്തെങ്കിലും ഭിന്നതയില്ലെന്ന് റോത്തഗി അറിയിച്ചു. പുതിയ മെമ്മോറാണ്ടം ഓഫ് പ്രൊസിജിയര് വേഗതയിലാകുന്നതോടെ നടപടികള് വേഗത്തിലാകുമെന്നും അലഹബാദ് കോടതിയിലേക്കുള്ള 18 ജഡ്ജിമാരുടെ പാനലിന് അംഗീകാരം നല്കിയതായും എ.ജി വ്യക്തമാക്കി. കോടതികളില് സുതാര്യത ഉറപ്പുവരുത്താനാണ് കേന്ദ്രസര്ക്കാര് ശക്തമായ നിലപാട് സ്വീകരിച്ചതിനാലാണ് നിയമനങ്ങളില് ഉത്തരവ് വൈകുന്നതെന്നും എ.ജി അറിയിച്ചു. എന്നാല് ഇതിന്റെ പേരില് ജഡ്ജി നിയമനം വൈകുന്നത് ന്യായീകരിക്കാന് കഴിയില്ലെന്നായിരുന്നു ചീഫ് ജസ്റ്റീസിന്റെ മറുപടി.
വിവിധ ഹൈക്കോടതികളില് ജഡ്ജിമാരുടെ നിയമനം വൈകുന്നതില് ആശങ്കപ്രകടിപ്പിച്ച് സമര്പ്പിച്ച ഹര്ജി പരിഗണിക്കുമ്പോഴാണ് കോടതിയുടെ വിമര്ശനം. അലഹബാദ് ഹൈക്കോടതിയില് 160 ജഡ്ജിമാര് വേണ്ട സ്ഥാനത്ത് 77 പേരെ വച്ചാണ് പ്രവര്ത്തനം നടക്കുന്നതെന്നും ഹര്ജിയില്പറയുന്നു.നവംബര് 11ന് കേസ് വീണ്ടും പരിഗണിക്കുമ്പോള് സര്ക്കാര് നിലപാട് വ്യക്തമാക്കണം.
കഴിഞ്ഞ ഒന്പത് മാസമായി ജഡ്ജി നിയമനത്തിനുള്ള പേരുകളില് നിങ്ങള് അടയിരിക്കുകയാണ്. എന്നാല് അവ നശിപ്പിക്കാന് നിങ്ങളെ അനുവദിക്കില്ലെന്നും കോടതി ചൂണ്ടിക്കാട്ടി. ജഡ്ജിമാര് ഇല്ലാത്തതിനാല് കര്ണാടക കോടതിയിലെ മുറികള് അടച്ചിട്ടിരിക്കുകയാണ്. കൊളീജിയം നല്കുന്ന ശിപാര്ശകളില് കേന്ദ്രസര്ക്കര് തീരുമാനം എടുക്കുന്നില്ല. കൊളീജിയത്തിന്റെ തീരുമാനത്തില് വിയോജിപ്പുണ്ടെങ്കില് അവ തിരിച്ചയക്കുകയാണ് വേണ്ടത്. ജഡ്ജിമാരെ നിയമിക്കാന് തയ്യാറായില്ലെങ്കില് കോടതികള് അടച്ചുപൂട്ടണമെന്നും എ.ജിയോട് ചീഫ് ജസ്റ്റീസ് ആവശ്യപ്പെട്ടു.
https://www.facebook.com/Malayalivartha
