ജമ്മുകശ്മീരില് സൈനികരുടെ സുരക്ഷയ്ക്കായി പ്രത്യേകതരം വസ്ത്രങ്ങള് ഒരുങ്ങുന്നു
കശ്മീരില് സൈനികര് നേരിടുന്ന കല്ലേറ്, കുപ്പി ബോംബ് തുടങ്ങിയ ആക്രമണങ്ങളെ പ്രതിരോധിക്കാനായി 'ഫുള് ബോഡി പ്രോട്ടക്ടറുകള്' ഒരുങ്ങുന്നു. ഇത്തരത്തിലുള്ള രണ്ടായിരം സംരക്ഷിതകവചങ്ങള് നിര്മിക്കാന് സി.ആര്.പി.എഫ് ടെന്ഡര് ക്ഷണിച്ചു.
കല്ല്, കത്തി പോലെയുള്ള ചെറിയ ആയുധങ്ങള്, ആസിഡ് ആക്രമണങ്ങള് തുടങ്ങിയവ പ്രതിരോധിക്കാന് ഇത്തരത്തില് ഡിസൈന് ചെയ്ത വസ്ത്രങ്ങള്ക്ക് സാധിക്കും. കൂടാതെ തീപിടുത്തവും പ്രതിരോധിക്കും. ജമ്മുകാശ്മീര് താഴ്്വരകളില് ഉണ്ടാവുന്ന ഇത്തരം ആക്രമണങ്ങള് ഈയിടെ സര്വസാധാരണമാണ്. അതുകൊണ്ടുതന്നെ ശരീരം മുഴുവന് മറയ്ക്കുന്ന ഇത്തരം കവചങ്ങള് അനിവാര്യമായി വന്നിരിക്കുകയാണ്.
ഭീകരന് ബുര്ഹാന് വാനിയുടെ കൊലപാതകത്തോടനുബന്ധിച്ച് ഏകദേശം രണ്ടായിരത്തോളം സൈനികര്ക്ക് ആക്രമണമേറ്റിരുന്നു. ആക്രമണകാരികളില് നിന്നും രക്ഷ നേടാന് പുതിയ സംവിധാനം സഹായിക്കുമെന്ന് സുരക്ഷാസേനയിലെ ഒരു മുതിര്ന്ന ഉദ്യോഗസ്ഥന് പറഞ്ഞു. നെഞ്ചിന്റെ ഭാഗത്ത് സംരക്ഷണത്തിനായി ചെസ്റ്റ് ഗാര്ഡ്, മുട്ടിനെ സംരക്ഷിക്കാന് എല്ബോ പാഡ്, ഷിന് ഗാര്ഡ്, ഗ്രോയിന്, തൈ ഗാര്ഡ് തുടങ്ങിയവ അടങ്ങിയിട്ടുള്ള ഈ കവചത്തിന്റെ ഭാരം ഏകദേശം ആറു കിലോ വരും.
എത്തിലീന് വിനൈല് അസറ്റിലിന് ബേസ്ഡ് പോളിമറും സോഫ്റ്റ് പ്ലാസ്റ്റിക്കും ഉപയോഗിച്ചാവും ഈ പുതിയ വസ്ത്രം നിര്മിക്കുകയെന്നു കശ്മീര് താഴ്്വരയിലെ മറ്റൊരു സി.ആര്.പി.എഫ് ഓഫീസര് പറഞ്ഞു. ഉപയോഗിക്കുന്ന ആള്ക്ക് സുഖകരമായ രീതിയിലായിരിക്കും ഇതിന്റെ രൂപകല്പ്പന. എന്നുമാത്രമല്ല, സുഖകരമായ വായു സഞ്ചാരം ഉറപ്പു വരുത്തുന്നതിനായി ചെറിയ ദ്വാരങ്ങളും ഇതില് കാണും. ഒരിക്കല് നിര്മ്മിച്ചു കിട്ടിക്കഴിഞ്ഞാല് ഇവ പരീക്ഷണാര്ത്ഥം കശ്മീര് താഴ്്വരയിലെ സൈനികര്ക്ക് നല്കും. അവരുടെ നിര്ദേശങ്ങളും അഭിപ്രായങ്ങളും അനുസരിച്ചായിരിക്കും ബാക്കി വസ്ത്രങ്ങളുടെ നിര്മ്മാണം.
2013ലാണ് ഇത്തരം വസ്ത്രങ്ങളുടെ പ്രത്യേകതകള് എന്തൊക്കെയാവണം എന്നു തീരുമാനിച്ചത്. എന്നാല് ഈ തീരുമാനങ്ങളിലും മാറ്റങ്ങള് സ്വീകാര്യമാണ്. സ്റ്റേറ്റ് പോലീസിനും ആര്മിക്കുമൊപ്പം ജമ്മുകശ്മീരിലെ നിയമസംരക്ഷണം ഉറപ്പുവരുത്തേണ്ട ചുമതല സി.ആര്.പി.എഫിനുണ്ട്. എഴുപതു ബറ്റാലിയനുകളിലായി ഏകദേശം എഴുപതിനായിരത്തോളം സൈനികരെയാണ് ഇവിടെ വിന്യസിച്ചിരിക്കുന്നത്.
https://www.facebook.com/Malayalivartha
