പിന്‍വലിക്കപ്പെട്ട 500, 1000 രൂപയുടെ നോട്ടുകള്‍ മാറ്റിയെടുക്കുന്നതിനായി വന്‍ തുകകള്‍ ബാങ്കുകളില്‍ അടക്കുമ്പോള്‍ നികുതി ഇളവ് ലഭിക്കില്ലെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി. അക്കൗണ്ടുകളില്‍ നിക്ഷേപിക്കപ്പെടുന്ന തുകക്ക് നിലവിലുള്ള നികുതി വ്യവസ്ഥകള്‍ ബാധകമായിരിക്കും. വന്‍ തുകകള്‍ നിക്ഷേപിക്കുമ്പോള്‍ പണത്തിന്റെ ഉറവിടം വെളിപ്പെടുത്തേണ്ടിവരുമെന്നും അദ്ദേഹം പറഞ്ഞു.

കുറഞ്ഞ സമയത്തിനുള്ളില്‍ നോട്ടുകള്‍ പിന്‍വലിച്ചത് കള്ളപ്പണക്കാര്‍ നികുതി അടക്കുന്നതില്‍ നിന്നും രക്ഷപ്പെടാതിരിക്കുന്നതിനാണ്. കയ്യിലുള്ള പണം നിയമപരമായി സംമ്പാദിച്ചതാണെങ്കില്‍ പേടിക്കേണ്ടതില്ല. ബാങ്കുകളില്‍നിന്ന് പിന്‍വലിച്ചതോ നിക്ഷേപം നടത്തിയതോ ആയ തുകയാണെങ്കില്‍ അതിന് നഷ്ടം സംഭവിക്കില്ലെന്നും ജെയ്റ്റ്‌ലി പറഞ്ഞു.

നിയമപരമല്ലാത്ത പണം കയ്യിലുള്ളവര്‍ക്ക് അതിന്റെ ഉറവിടം വെളിപ്പെടുത്തേണ്ടിവരുമ്പോള്‍ ചില പ്രശ്‌നങ്ങളുണ്ടായേക്കാം.വീട്ടാവശ്യങ്ങള്‍ക്ക് വേണ്ടിയോ മറ്റ് ആവശ്യങ്ങള്‍ക്കോ സൂക്ഷിച്ചുവെച്ച ചെറിയ തുകകളുടെ കാര്യത്തില്‍ ഇത്തരം പ്രശ്‌നങ്ങളുണ്ടാവില്ല. 25,000 മുതല്‍ 50,000 വരെയുള്ള പണത്തെ സാധാരണ വീട്ടാവശ്യങ്ങള്‍ക്കായി കരുതിയ തുകയായി കണക്കാക്കി അവയെ ഇത്തരം പ്രശ്‌നങ്ങളില്‍നിന്ന് ഒഴിവാക്കുമെന്നും കുറഞ്ഞ തുക നിക്ഷേപിക്കുന്നവര്‍ക്ക് ഭയപ്പെടാനില്ലെന്നും അദ്ദേഹം വ്യക്തമാക്കി.

നോട്ടുപിന്‍വലിക്കുന്ന ആദ്യ ഒന്നോ രണ്ടോ ആഴ്ചകളില്‍ 4000 രൂപയുടെ നോട്ടുകളേ മാറ്റിയെടുക്കാന്‍ സാധിക്കൂ. എന്നാല്‍ അതിനു ശേഷം മാറ്റിയെടുക്കാവുന്ന തുക വര്‍ധിപ്പിക്കും. കൂടുതല്‍ പുതിയ കറന്‍സികള്‍ വിപണിയിലെത്തുന്നതോടെ നോട്ടുകള്‍ മാറ്റിയെടുക്കല്‍ ആയാസരഹിതമാകുമെന്നും മന്ത്രി വ്യക്തമാക്കി.

നോട്ടുകള്‍ പിന്‍വലിക്കാനുള്ള പുതിയ നീക്കം കൂടുതല്‍ പേരെ ഡിജിറ്റല്‍ ഇടപാടുകളിലേക്ക് നയിക്കും. കൂടുതല്‍ പേര്‍ നികുതി വെളിപ്പെടുത്താന്‍ മുന്നോട്ടുവരും. ഇത് രാജ്യത്തിന്റെ സാമ്പത്തിക വ്യവസ്ഥക്ക് അനുകൂലമായി മാറുമെന്നും ജെയ്റ്റ്‌ലി പറഞ്ഞു.