നോട്ടുകെട്ടുകളെ പ്രണയിച്ച് അവസാനം അവകൊണ്ടു തന്നെ ജീവിതം ഹോമിക്കേണ്ടിവന്നവര്‍. നോട്ടുകള്‍ അസാധുവാക്കിയ നടപടിയിലെ ആശയക്കുഴപ്പം രാജ്യത്തു രണ്ടു ജീവന്‍ കവര്‍ന്നതായി റിപ്പോര്‍ട്ട്. ഉത്തര്‍പ്രദേശിലെ കുശിനഗര്‍, മഹുവമാഫി ജില്ലകളിലാണ് ഓരോ മരണം.
ചില്ലറ ലഭിക്കാത്തതിനെ തുടര്‍ന്ന് സമയത്ത് ആശപത്രിയിലെത്തിക്കാനാവാതെയാണു മഹുവമാഫിയില്‍ എട്ടു വയസുകാരി മരിച്ചത്. പെണ്‍കുട്ടിയെ ആശുപത്രിയിലേക്ക് കൊണ്ടു പോകുന്നതിനിടയില്‍ പെട്രോള്‍ അടിക്കാന്‍ വാഹനം പമ്പിലെത്തിയെങ്കിലും ആയിരം രൂപയായതിനാല്‍ പമ്പ് ജീവനക്കാര്‍ പെട്രോള്‍ നല്‍കിയില്ല. ഇതു മൂലം പെണ്‍കുട്ടിയും കുടുംബവും പമ്പില്‍ കുടുങ്ങുകയായിരുന്നു.
രാത്രിയാത്ര കഴിഞ്ഞു റെയില്‍വേ സ്‌റ്റേഷനില്‍ എത്തിയ യാത്രക്കാര്‍ നട്ടം തിരിഞ്ഞു; 500 രൂപ നല്‍കി പ്ലാറ്റ്‌ഫോം ടിക്കറ്റെടുക്കാന്‍ തയ്യാറായി നിരവധി; ചില്ലറയില്ലാതെ കുഴങ്ങി കൗണ്ടര്‍ ജീവനക്കാര്‍; 500, 1000 നോട്ടുകള്‍ എടുക്കില്ലെന്ന് ബോര്‍ഡ് വച്ച് വ്യാപാരികള്‍; മദ്യം വാങ്ങാന്‍ എത്തിയ മദ്യപാനികളും വലഞ്ഞു: നോട്ടുകള്‍ പിന്‍വലിച്ച അപ്രതീക്ഷിത തീരുമാനത്തില്‍ സാധാരണക്കാര്‍ ദുരിതത്തിലായത് ഇങ്ങനെ
മറ്റൊരു സംഭവത്തില്‍ ബാങ്കിലെത്തിയ സ്ത്രീ ആയിരം രൂപയുടെ നോട്ടുകള്‍ സ്വീകരിക്കില്ലെന്ന് അറിഞ്ഞതിനെ തുടര്‍ന്ന് കുഴഞ്ഞുവീണു മരിച്ചു. കുശിനഗര്‍ ജില്ലയിലാണു സംഭവം. ആയിരം രൂപയുടെ നോട്ടുകള്‍ സ്വീകരിക്കില്ലെന്ന് അറിഞ്ഞതിന്റെ ആഘാതത്തില്‍ മരിച്ചെന്നാണ് റിപ്പോര്‍ട്ടു പുറത്തുവന്നത്.
നാല്‍പതുകാരിയായ തീര്‍ത്ഥരാജിയാണ് മരിച്ചത്. ശുചീകരണ തൊഴിലാളിയായ ഇവര്‍ ആയിരം രൂപയുടെ രണ്ടു നോട്ടുകളും പാസ്ബുക്കുമായി നിലത്തു കിടക്കുന്ന ചിത്രം സോഷ്യല്‍മീഡിയില്‍ പ്രചരിക്കുന്നുണ്ട്. സംഭവത്തെക്കുറിച്ച് സ്ത്രീയുടെ വീട്ടിലെത്തി അന്വേഷിക്കുന്നതിന് റവന്യൂ വിഭാ ഗത്തെ ചുമതലപ്പെടുത്തിയതായും പണം സ്വീകരിക്കില്ലെന്നതിന്റെ ആഘാതത്തിലാണ് മരണം സംഭവിച്ചതെങ്കില്‍ ആവശ്യമായ നടപടി സ്വീകരിക്കുമെന്നും ജില്ലാ മജിസ്‌ട്രേറ്റ് അറിയിച്ചു.
ഹൈദരാബാദില്‍ 500,1000 രൂപ നോട്ടുകളായി 50 ലക്ഷത്തോളം രൂപ വീട്ടില്‍ സൂക്ഷിച്ചുവെച്ചിരുന്ന സ്ത്രീ ജീവനൊടുക്കി
തന്റെ സമ്പാദ്യം മുഴുവന്‍ പാഴായെന്ന് കരുതി തെലുങ്കാനയില്‍ 55 കാരി ജീവനൊടുക്കി. അഞ്ഞൂറിന്റെയും ആയിരത്തിന്റെ നോട്ടുകളായി അമ്പത് ലക്ഷം രൂപയോളം കൈവശം വച്ചിരുന്ന വിനോദ എന്ന സ്ത്രീയാണ് മരിച്ചത്. തെലങ്കാനയിലെ മഹാബുദാബാദ് ജില്ലയിലാണ് സംഭവം. അഞ്ഞൂറിന്റെയും ആയിരത്തിന്റെ നോട്ടുകള്‍ അസാധുവാക്കിയതിനെ തുടര്‍ന്ന് തന്റെ പണം നഷ്ടപ്പെടുമെന്ന് ആശങ്കയെ തുടര്‍ന്നാണ് വിനോദ തൂങ്ങിമരിച്ചത്. 12 ഏക്കര്‍ ഭൂമിയുള്ള വിനോദ തന്റെ സമ്പാദ്യം മുഴുവന്‍ പണമായി വീട്ടില്‍ തന്നെയാണ് സൂക്ഷിച്ചിരുന്നത്. ഇവര്‍ വീട്ടില്‍ സൂക്ഷിച്ചിരുന്ന പണത്തിന്റെ കൃത്യമായ കണക്ക് വ്യക്തമല്ല. അമ്പത് ലക്ഷം രൂപയോളം വരുമെന്നാണ് ബന്ധുക്കള്‍ പറയുന്നത്.
എന്നാല്‍ പരസ്പര വിരുദ്ധമായ മൊഴി ലഭിച്ചതിനെ തുടര്‍ന്ന് പൊലീസ് അന്വേഷണം ആരംഭിച്ചിട്ടുണ്ട്. പണം നഷ്ടപ്പെടുമോ എന്ന് ഭയന്നാണ് വിനോദ ആത്മഹത്യ ചെയ്തതെന്ന് കുടുംബാംഗങ്ങള്‍ പറയുമ്പോള്‍ വീട്ടിലെ കലഹത്തെ തുടര്‍ന്നാണെന്ന് ചില ബന്ധുക്കള്‍ ആരോപിക്കുന്നു.മരിച്ച സ്ത്രീക്ക് ഒരു മകനും രണ്ട് പെണ്‍മക്കളുമാണ് ഉള്ളത്. ഇവരെല്ലാം വിവാഹിതരാണ്. സ്വത്ത് ആവശ്യപ്പെട്ട് ഇവര്‍ സ്ത്രീയെ നിരന്തരം ശല്യപ്പെടുത്തിയിരുന്നുവെന്നാണ് ബന്ധുക്കള്‍ പറയുന്നത്. അന്വേഷണം തുടരുകയാണ്.