നോട്ട് പിന്‍വലിച്ച നടപടിയെ കുറിച്ച് പ്രതികരിച്ച് പ്രധാനമന്ത്രി നരേന്ദ്ര മോഡി. രാജ്യത്തെ സത്യസന്ധരായ ജനങ്ങളെ സഹായിക്കാനായിരുന്നു നടപടി. തെറ്റ് ചെയ്തിട്ടുണ്ടെങ്കില്‍ എന്ത് ശിക്ഷയും അഭിമുഖീകരിക്കാന്‍ താന്‍ തയ്യാറാണെന്ന് പ്രധാനമന്ത്രി നരേന്ദ്ര മോഡി പറഞ്ഞു. ജനങ്ങള്‍ ഈ സര്‍ക്കാരിനെ തിരഞ്ഞെടുക്കുമ്പോള്‍ അവര്‍ക്കൊരുപാട് പ്രതീക്ഷകളുണ്ടായിരുന്നു. രാജ്യത്തെ അഴിമതി വിമുക്തമാക്കാനായിരുന്നു 2014ല്‍ ജനം വോട്ട് ചെയ്തതെന്നും മോഡി പറഞ്ഞു.

ഇന്ത്യയില്‍ നിന്നും പണം വിദേശങ്ങളിലേയ്ക്ക് കടത്തിയിട്ടുണ്ടെങ്കില്‍ അത് കണ്ടെത്തേണ്ടത് നമ്മുടെ കടമാണ്. വലിയ ഓഫീസില്‍ കസേരയില്‍ വെറുതെ ഇരിക്കാനല്ല ഞാന്‍ ജനിച്ചത്. എനിക്കുണ്ടായിരുന്നതെല്ലാം, എന്റെ കുടുംബം, വീട് എല്ലാം ഞാന്‍ രാജ്യത്തിനായി ഉപേക്ഷിച്ചു. നമ്മുടെ വിദേശനയങ്ങളില്‍ മാറ്റം വരുത്തേണ്ടത് അത്യാവശ്യമാണെന്നും പ്രധാനമന്ത്രി പറഞ്ഞു.
നിലവിലെ സാഹചര്യത്തില്‍ എനിക്കും വേദനയുണ്ട്. ധിക്കാരം കാണിക്കാനല്ല ഈ നടപടികള്‍ സ്വീകരിച്ചത്. ഞാനും ദാരിദ്ര്യം കണ്ട് വളര്‍ന്നവനാണ്. ജനങ്ങളുടെ പ്രശ്‌നങ്ങള്‍ എനിക്കറിയാം. 50 ദിവസത്തെ പ്രയാസമേയുള്ളു. ശുദ്ധികലശത്തിന് ശേഷം ഒരു ഈച്ച പോലും പറക്കില്ല. 2ജി അഴിമതിയില്‍ അകപ്പെട്ടവര്‍ പോലും നാലായിരം രൂപയ്ക്ക് വേണ്ടി ക്യൂ നില്‍ക്കുകയാണെന്നും മോഡി പറഞ്ഞു.

ദയവു ചെയ്ത് 50 ദിവസത്തേയ്ക്ക് തന്നോട് സഹകരിക്കണമെന്നും മോഡി ജനങ്ങളൊട് ആവശ്യപ്പെട്ടു. ഗോവയില്‍ തന്ത്രപ്രധാനമായ പദ്ധതികള്‍ ഉല്‍ഘാടനം ചെയ്ത ശേഷം ജനങ്ങളെ അഭിസംബോധന ചെയ്യുകയായിരുന്നു മോഡി.