രാജ്യത്തെങ്ങും പണം എടുക്കാനും മാറ്റാനും എത്തിയ ഇടപാടുകാരുടെ തിരക്കാണ് നോട്ട് നിരോധനത്തിന്റെ പതിമൂന്നാം നാളിലും ബാങ്കുകളില്‍ അനുഭവപ്പെടുന്നത്. പ്രതിസന്ധിക്ക് തെല്ലും അയവുവരാത്ത സ്ഥിതിയാണ് ഇപ്പോഴും. പണം എടുക്കാന്‍ മണിക്കൂറുകള്‍ വരിനില്‍ക്കുന്നത് ഇടപാടുകാരെ ബുദ്ധിമുട്ടിക്കുന്നത് ചില്ലറയൊന്നുമല്ല.

എ.ടി.എമ്മുകളില്‍ തിരക്ക് കുറഞ്ഞിട്ടുണ്ട്. കാരണം രണ്ടായിരത്തിന്റെ നോട്ടുകളാണ് മിക്ക എ.ടി.എമ്മുകളിലും ഉള്ളത്. നൂറിന്റെ നോട്ടുകള്‍ കിട്ടുന്ന എടിഎമ്മുകള്‍ കുറവാണ്. ഇതോടെ ചില്ലറക്ഷാമവും രൂക്ഷമായി. അഞ്ഞൂറിന്റെ നോട്ട് സംസ്ഥാനത്ത് എത്തിയെങ്കിലും ഇടപാടുകാര്‍ക്ക് കിട്ടിയിട്ടില്ല. വിപണികളിലെ മാന്ദ്യവും തുടരുകയാണ്.

11 ബാങ്ക് ഓഫീസര്‍മാരാണ് രാജ്യത്ത് ജോലി സമ്മര്‍ദ്ദം സഹിക്കാനാവാതെ മരിച്ചതെന്ന് ബാങ്ക് ജീവനക്കാരുടെ സംഘടനയായ ഓള്‍ ഇന്ത്യ ബാങ്ക് ഓഫീസേഴ്‌സ് കോണ്‍ഫെഡറേഷന്‍ സീനിയര്‍ വൈസ് പ്രസിഡന്റ് ഡി. തോമസ് ഫ്രാങ്കോ പറഞ്ഞു. അപ്രതീക്ഷിതമായി രാജ്യത്ത് 500, 1000 നോട്ടുകള്‍ പിന്‍വലിച്ചതിനെ തുടര്‍ന്ന് നോട്ടുകള്‍ മാറ്റിവാങ്ങാന്‍ ബാങ്കുകള്‍ക്ക് മുന്നില്‍ ക്യൂ നില്‍ക്കുന്നവര്‍ കുഴഞ്ഞുവീണ് മരിക്കുന്ന സംഭവങ്ങള്‍ ഇപ്പോള്‍ വാര്‍ത്തയല്ലാതായി മാറിക്കൊണ്ടിരിക്കുകയാണ്.

ഇതിനിടെ എടിഎമ്മില്‍ നിന്നും ദിവസവും പിന്‍വലിക്കാനുള്ള തുക ഉടന്‍ വര്‍ദ്ധിപ്പിക്കില്ലെന്ന് ആര്‍ ബി ഐ വ്യക്തമാക്കി. ആവശ്യത്തിന് നോട്ടുകള്‍ എല്ലായിടത്തും എത്താത്തതിനാലാണ് പരിധി വര്‍ദ്ധിപ്പിക്കാത്തത്. ഡെബിറ്റ് കാര്‍ഡുകള്‍ വഴി ഇടപാട് നടത്തുന്നവര്‍ക്ക് ഫീസ് ഇളവ് കേന്ദ്രസര്‍ക്കാര്‍ ആര്‍ബിഐയോട് ആവശ്യപ്പെട്ടു.

ദിവസം 22,500 എടിഎമ്മുകളാണ് ഇപ്പോള്‍ പുനക്രമീകരിക്കുന്നത്. എന്നാല്‍ രാജ്യത്താകെയുള്ള രണ്ടേകാല്‍ ലക്ഷം വരുന്ന എടിഎമ്മുകളില്‍ മുക്കാല്‍ ഭാഗം എടിഎമ്മുകളും പുനക്രമീകരിച്ചിട്ടില്ല. ഈ സാഹചര്യത്തിലാണ് എടിഎമ്മുകള്‍ വഴി പിന്‍വലിക്കാനുള്ള തുക വര്‍ദ്ധിപ്പിക്കേണ്ടതില്ലെന്ന് തീരുമാനിച്ചത്.