കേന്ദ്രസര്‍ക്കാരിന്റെ നോട്ട് പിന്‍വലിക്കല്‍ നടപടി സംസ്ഥാനത്തെ സാമ്പത്തിക അടിമത്വത്തിലേക്ക് നയിക്കുമെന്ന് മുഖ്യമന്ത്രി പിണറായി വിജയന്‍. സഹകരണ ബാങ്ക് പ്രതിസന്ധി ചര്‍ച്ചചെയ്യാന്‍ വിളിച്ചു ചേര്‍ത്ത പ്രത്യേക നിയമസഭ സമ്മേളനത്തില്‍ സംസാരിക്കുകയായിരുന്നു അദേഹം.
സഹകരണ ബാങ്കുകളില്‍ നിക്ഷേപിച്ചവര്‍ക്ക് പണം നഷ്ടമാവില്ലെന്ന് മുഖ്യമന്ത്രി പറഞ്ഞു. പ്രശ്‌നം ചര്‍ച്ചചെയ്യന്നുതിനായി 24ന് സര്‍വ കക്ഷി സംഘത്തെ ഡല്‍ഹിയിലേക്ക് അയക്കും. ഉയര്‍ന്ന കറന്‍സികള്‍ നിരോധിച്ചതു മൂലം കള്ളപണം തടയാന്‍ കഴിയില്ല. മുന്‍ റിസര്‍വ് ബാങ്ക് ഗവര്‍ണ്ണറുള്‍പ്പടെയുള്ള പല വ്യക്തികളും കറന്‍സി പിന്‍വലിക്കലിനെ എതിര്‍ത്ത് സംസാരിച്ചിട്ടുണ്ട്.

രാജ്യത്തെ 30 ശതമാനം ജനങ്ങള്‍ക്ക് മാത്രമാണ് ഇപ്പോഴും ബാങ്കിങ് സംവിധാനം ലഭ്യമായിട്ടുള്ളത്. മൂന്നിലൊന്ന് ബാങ്കുകളും പ്രവര്‍ത്തിക്കുന്നതും നഗരങ്ങളിലാണ്. അതുകൊണ്ട് തന്നെ ഈ തീരുമാനം ഗുരുതരമായി ബാധിക്കുക രാജ്യത്തെ ബഹുഭൂരിപക്ഷം വരുന്ന സാധരണക്കാരെയാണ് . നോട്ട് പിന്‍വലിച്ച തീരുമാനം മൂലം എഴുപതോളം പേര്‍ രാജ്യത്താകമാനം മരിച്ചതായി കണക്കുകള്‍ പറയുന്നു. സംസ്ഥാനത്തും ഏഴ് മരണം റിപ്പോര്‍ട്ട് ചെയ്തിട്ടുണ്ടെന്ന് അദേഹം പറഞ്ഞു

തെരഞ്ഞെടുപ്പ് സമയത്ത് വിദേശ രാജ്യങ്ങളിലെ കള്ളപണം തിരിച്ച് കൊണ്ട് വന്ന് എല്ലാവരുടെ അക്കൗണ്ടുകളിലും 15 ലക്ഷം വീതം ഇട്ട് നല്‍കുമെന്നാണ് ബി.ജെ.പി അന്ന് പറഞ്ഞത്. എന്നാല്‍ ഇന്ന് 900 കള്ളപണക്കാരുടെ പേരുകള്‍ തലയണക്കടിയില്‍ വെച്ച് ഉറങ്ങുകയാണ് അവര്‍ ചെയ്യുന്നതെന്നും അദേഹം കുറ്റപ്പെടുത്തി. ബാങ്കിങ് സംവിധാനത്തിലെ വിശ്വാസ്യതയാണ് ഇന്ന് നോട്ടുകള്‍ക്ക് മൂല്യമുണ്ടാക്കുന്നത്. നോട്ടുകള്‍ പിന്‍വലിച്ച തീരുമാനം ഈ വിശ്വാസ്യതയെ തകര്‍ത്തു. കുടുംബങ്ങളില്‍ ഇത് രൂക്ഷമായ പ്രതിസന്ധിയുണ്ടാക്കി.

സഹകരണമേഖലയെ തകര്‍ക്കുന്നതിനുള്ള നീക്കങ്ങള്‍ നേരത്തെ തന്നെ ആരംഭിച്ചിട്ടുണ്ട്. രാജ്യത്ത് ആഗോളവല്‍ക്കരണ നയം നടപ്പിലാക്കുന്നതിന്റെ ഭാഗമായാണ് ഇത്. സഹകരണ പ്രസ്ഥാനത്തെ തകര്‍ക്കുന്നതില്‍ ആഗോള ഗൂഢാലോചന സംശയിക്കുന്നതായും പിണറായി പറഞ്ഞു.