പ്രശസ്ത കര്‍ണ്ണാട്ടിക് സംഗീതജ്ഞന്‍ ഡോ. എം ബാലമുരളീകൃഷ്ണ അന്തരിച്ചു. 86 വയസായിരുന്നു. ചെന്നൈയിലെ രാധാകൃഷ്ണശാലയിലുള്ള വീട്ടില്‍ വച്ച് ഉറക്കത്തിനിടെയായിരുന്നു അന്ത്യം. രാജ്യം പത്മശ്രീ, പത്മവിഭൂഷന്‍ പുരസ്‌കാരങ്ങള്‍ നല്‍കി അദ്ദേഹത്തെ ആദരിച്ചിട്ടുണ്ട്. വിവിധ ഭാഷകളിലായി 400 ഓളം ഗാനങ്ങള്‍ക്ക് സംഗീതം നല്‍കുകയും 25ലേറെ രാഗങ്ങള്‍ രചിക്കുകയും ചെയ്തിട്ടുണ്ട്. കൂടാതെ വിവിധ ഭാഷകളിലായി 400 കൃതികളും രചിച്ചിട്ടുണ്ട്.
ആന്ധ്രാ പ്രദേശിലെ ഈസ്റ്റ് ഗോദാവരി ജില്ലയിലെ മംഗലംപള്ളിയില്‍ 1930ലാണ് ബാലമുരളീകൃഷ്ണ ജനിച്ചത്. രാമകൃഷ്ണ പന്തലുവിന്റെ ശിഷ്യനായി സംഗീതം പഠിച്ചു തുടങ്ങിയ അദ്ദേഹം ഒന്‍പതാം വയസില്‍ അരങ്ങേറ്റം നടത്തി. സംഗീത സംവിധായകന്‍, നടന്‍, വിവിധ സംഗീതോപകരണ വിദ്വാന്‍ എന്നീ നിലകളിലും ബാലമുരളീകൃഷ്ണ പ്രതിഭയായിരുന്നു. 1976ല്‍ മികച്ച ഗായകനും, 1987ല്‍ മികച്ച സംവിധായകനുള്ള ദേശീയ പുരസ്‌കാരവും 1987ല്‍ മികച്ച ഗായകനുള്ള കേരള സംസ്ഥാന പുരസ്‌കാരവും, 2010ല്‍ മികച്ച ശാസ്ത്രീയ സംഗീതജ്ഞനുള്ള കേരള സംസ്ഥാന പുരസ്‌കാരവും, 2012ല്‍ കേരള സ്വാതി സംഗീത പുരസ്‌കാരവും അദ്ദേഹത്തിന് ലഭിച്ചിട്ടുണ്ട്. ലോകമെമ്പാടും 25000ത്തിലധികം കച്ചേരികളും ഡോ. ബാലമുരളീകൃഷ്ണ നടത്തിയിട്ടുണ്ട്.