അധികാരത്തിലെത്തിയാല്‍ കേന്ദ്ര സര്‍ക്കാര്‍ ഏറെ കൊട്ടിഘോഷിച്ച ആധാര്‍ പുനപരിശോധിക്കുമെന്ന്‌ ബിജെപി. രാജ്യത്തെ വിദേശിയരുടെ നിയമ വിരുദ്ധ വാസത്തിന്‌ പദ്ധതി വഴിവെച്ചുവെന്നാണ്‌ ബിജെപിയുടെ ആക്ഷേപം. ആധാറിന്റെ തിരിമറി സിബിഐ അന്വേഷിക്കണമെന്നും ബിജെപി ആവശ്യപ്പെട്ടു.
ഏകീകൃത തിരിച്ചറിയല്‍ അതോറിറ്റി ഓഫ്‌ ഇന്ത്യയുടെ ചെയര്‍മാനുമായ നന്ദന്‍ നിലേഖനി കോണ്‍ഗ്രസിന്റെ സ്ഥാനാര്‍ത്ഥിയായതോടെയാണ്‌ ബിജെപി ആധാറിനെതിരെ ശക്തമായി പ്രതികരിച്ചത്‌.

ബിജെപി ദേശീയ വക്താവ്‌ മീനാക്ഷി ലേഖിയാണ്‌ ആധാറിന്റെ കോട്ടങ്ങളെപ്പറ്റി വിമര്‍ശിക്കുന്നത്‌. രാജ്യത്ത് വിദേശീയരുടെ നിയമവിരുദ്ധവാസത്തെ ക്രമപ്പെടുത്തുന്ന അപകടകരമായ പദ്ധതിയാണിത്. സുപ്രീംകോടതി നിര്‍ദ്ദേശങ്ങളുടെ ലംഘനം കൂടിയാണ് ആധാര്‍. ആധാര്‍ പദ്ധതിയില്‍ അംഗങ്ങളായ ആളുകളുടെ ബയോമെട്രിക് വിവരങ്ങള്‍ രാജ്യത്തിന് പുറത്താണ് സൂക്ഷിച്ചിരിക്കുന്നതെന്നും ബിജെപി വക്താവ് പറഞ്ഞു.

നിയമവിരുദ്ധമായി മറ്റൊരു രാജ്യത്ത് ചെന്നാല്‍ വെടിയേല്‍ക്കുകയോ തുറങ്കിലടയ്ക്കപ്പെടുകയോ ചെയ്യും. എന്നാല്‍ ഇന്ത്യയില്‍ ഒരാള്‍ നിയവിരുദ്ധമായി എത്തിയാല്‍ അയാള്‍ക്ക് ഇന്ത്യന്‍ പൗരത്വം നല്‍കും. അതാണ് ആധാര്‍ പദ്ധതിയുടെ സംഭാവനയെന്ന്‌ ബംഗളൂരു സൗത്ത് ലോക്‌സഭ മണ്ഡലത്തില്‍ നന്ദന്‍ നിലേഖനിയുടെ എതിരാളിയും ബിജെപി ജനറല്‍ സെക്രട്ടറി എച്ച് എന്‍ ആനന്ദ് കുമാര്‍ പറഞ്ഞു. അസമില്‍ പകുതി ജനങ്ങളും ബംഗ്ലാദേശികളാണെന്നും രാജ്യത്തെ ഏറ്റവും വലിയ തട്ടിപ്പാണ് ആധാറെന്നും ആനന്ദ് കുമാര്‍ കൂട്ടിച്ചേര്‍ത്തു.

രാജ്യത്ത് മൂന്നുകോടിയിലധികം ജനങ്ങള്‍ ബംഗ്ലാദേശ് അഭയാര്‍ത്ഥികളാണെന്നും ഇവര്‍ക്ക് ആധാര്‍ നമ്പര്‍ നല്‍കുന്നത് രാജ്യത്തിന് വലിയ സുരക്ഷാഭീഷണിയാണ് ഉയര്‍ത്തുന്നത്. പാര്‍ലമെന്ററി സ്റ്റാന്‍ഡിംഗ് കമ്മിറ്റിയിലെ 33 അംഗങ്ങളില്‍ 31 പേരും പദ്ധതി നടപ്പാക്കുന്നതിനെതിരെ വോട്ട് ചെയ്തു. പരമോന്നത കോടതിയും പദ്ധതിയുടെ വിശ്വാസ്യത ചോദ്യം ചെയ്തിട്ടുണ്ട്. എന്നിട്ടും സര്‍ക്കാര്‍ പദ്ധതിയുമായി മുന്നോട്ട് പോകുകയാണെന്നും മീനാക്ഷി വിമര്‍ശിച്ചു. ആധാര്‍ പദ്ധതിക്ക് വേണ്ടി ചെലവഴിച്ച പണം സംബന്ധിച്ചും ആധാര്‍ നിര്‍ബന്ധമാക്കിയ സാഹചര്യം സംബന്ധിച്ചും വിശദമായ അന്വേഷണം നടത്തണമെന്നും മീനാക്ഷി ആവശ്യപ്പെട്ടു.  

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha