ഇറ്റലിയുടെ പുതിയ തന്ത്രം... കടല്ക്കൊല കേസില് നാവികരെ കൊണ്ടുപോകാനായി ഐക്യരാഷ്ട്രസഭയുടെ ഇടപെടല്
കടല്ക്കൊലക്കേസില് പുതിയ വഴിത്തിരിവുണ്ടാക്കാന് ഇറ്റലിയുടെ ശ്രമം. ഇറ്റലിയുടെ ശക്തമായ ആവശ്യത്തെ തുടര്ന്ന് ഐക്യരാഷ്ട്രസഭയുടെ ഇടപെടല്. ഇറ്റാലിയന് നാവികരുടെ മോചനവുമായി ബന്ധപ്പെട്ട് ഇന്ത്യയുമായി ചര്ച്ച നടത്തുമെന്ന് യുഎന് പൊതുസഭാ സെക്രട്ടറി ജോണ് ആഷെ അറിയിച്ചു.
നാവികരുടെ മോചനത്തിനായി യുഎന് ഇടപെടണമെന്ന് ഇറ്റാലിയന് സര്ക്കാര് ഇന്നലെ ഐക്യരാഷ്ട്ര സഭയോട് ആവശ്യപ്പെട്ടിരുന്നു. ഇത് അംഗീകരിച്ചാണ് യുഎന് ഇക്കാര്യത്തില് ഇന്ത്യയുമായി ചര്ച്ച നടത്താന് തീരുമാനിച്ചത്. ഇതിന്റെ അടിസ്ഥാനത്തില് ഇന്ത്യ സന്ദര്ശിക്കുന്ന യുഎന് പൊതുസഭാ സെക്രട്ടറി ജോണ് ആഷെ ഇന്ന് പ്രധാനമന്ത്രിയുമായും വിദേശകാര്യ മന്ത്രിയുമായും ചര്ച്ച നടത്തും.
കടല്ക്കൊല കേസില് ഇറ്റാലിയന് നാവികരെ വിട്ടയക്കണമെന്ന് ആവശ്യപ്പെട്ട് ഇറ്റാലിയന് ആഭ്യന്തരമന്ത്രി ആഞ്ജലീനോ അല്ഫാറോ ഐക്യരാഷ്ട്രസഭ സെക്രട്ടറി ജനറല് ബാന് കി മൂണുമായി ന്യൂയോര്ക്കില് കൂടിക്കാഴ്ച നടത്തിയിരുന്നു. നാവികരുടെ വിചാരണ ഇറ്റലിയില് വെച്ച് നടത്തണമെന്നും വിചാരണ തുടങ്ങുംവരെ ഇരുവരെയും വിട്ടയക്കണമെന്നുമാണ് ഇറ്റലിയുടെ ആവശ്യം.
നാവികരെ വിട്ടയക്കണമെന്ന് ആവശ്യപ്പെട്ട് യൂറോപ്യന് യൂണിയന്റേയും നാറ്റോയേയും ഇറ്റലി നേരത്തേ സമീപിച്ചിരുന്നു. വിഷയത്തില് യുഎന് ഇടപെടുന്നതോടെ ഇന്ത്യയ്ക്കു മേല് അന്താരാഷ്ട്ര സമ്മര്ദ്ദം ശക്തമാകും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
