ഗോരക്ഷ ഗുണ്ടായിസത്തിന്റെ ഇരകള്‍ക്ക് സംസ്ഥാനങ്ങള്‍ നഷ്ടപരിഹാരം നല്‍കണമെന്ന് സുപ്രീംകോടതി. ഗോരക്ഷയുടെ പേരില്‍ അക്രമത്തിനിരയാകുന്നവര്‍ക്ക് നഷ്ടപരിഹാരം നല്‍കാന്‍ സംസ്ഥാനത്തിന് ഉത്തരവാദിത്തമുണ്ടെന്ന് കോടതി അഭിപ്രയപ്പെട്ടു. ഗോരക്ഷാ ഗുണ്ടായിസം തടയാന്‍ എല്ലാ ജില്ലകളിലും മുതിര്‍ പൊലീസുദ്യോഗസ്ഥനെ നിയമിക്കണമെന്നും കോടതി നിര്‍ദേശിച്ചിട്ടുണ്ട്. ഒക്ടോബര്‍ 13നകം ഉദ്യോഗസ്ഥന്‍ ചുമതലയേല്‍ക്കണമെന്നും കോടതി ഉത്തരവിട്ടു.

ഹൈവേകളില്‍ വാഹനം തടഞ്ഞുനിറുത്തി അക്രമം അഴിച്ചുവിടുന്നവരെ നിരീക്ഷിക്കാന്‍ ഏര്‍പ്പെടുത്തിയ സംവിധാനമെന്തെന്ന് വിശദീകരിക്കണമെന്നും കോടതി ആവശ്യപ്പെട്ടു. ഒക്ടോബര്‍ 31നാണ് ഇനി ഈ കേസ് പരിഗണിക്കുക. ഇത്തരത്തിലുള്ള പരാതികളില്‍ സംസ്ഥാനം സ്വീകരിച്ച നടപടികള്‍ എന്തെല്ലാമെന്ന് വ്യക്തമാക്കണമെന്ന് സുപ്രീം കോടതി നേരത്തേ നിര്‍ദേശിച്ചിരുന്നു. അതത് സംസ്ഥാനങ്ങളുടെ ചീഫ് സെക്രട്ടറിമാരോടാണ് കോടതി റിപ്പോര്‍ട്ട് ആവശ്യപ്പെട്ടത്.

സുപ്രീംകോടതിയുടെ നിര്‍ദേശത്തിന്റെ അടിസ്ഥാനത്തില്‍ ഗുജറാത്ത്, രാജസ്ഥാന്‍, ഝാര്‍ഖണ്ഡ്, കര്‍ണാടക, ഉത്തര്‍ പ്രദേശ് എന്നീ സംസ്ഥാനങ്ങള്‍ ഇത് സംബന്ധിച്ച് റിപ്പോര്‍ട്ട് നല്‍കി. മറ്റ് സംസ്ഥാനങ്ങളെല്ലാം എത്രയും പെട്ടെന്ന് റിപ്പോര്‍ട്ട് സമര്‍പ്പിക്കണമെന്നും സുപ്രീംകോടതി ആവശ്യപ്പെട്ടു.