ആന്ധ്രാപ്രദേശിലെ വിശാഖപട്ടണത്ത് സ്റ്റീല്‍ ഫാക്ടറിയില്‍ പൊട്ടിത്തെറിയില്‍ എട്ട് തൊഴിലാളികള്‍ക്ക് ദാരുണാന്ത്യം. നിരവധി പേര്‍ക്ക് പരുക്കേറ്റു. പ്ലാന്റിലെ സ്റ്റീല്‍ ഉരുക്കുന്ന ഭാഗത്താണ് ദുരന്തമുണ്ടായത്. സ്റ്റീല്‍ ദ്രാവകം ഉയര്‍ത്തുന്നതിനിടെയാണ് അപകടമുണ്ടായത്. ഏകദേശം 1,600 ഡിഗ്രി സെല്‍ഷ്യസ് താപനിലയിലുള്ള ഉരുക്കായിരുന്നു ഉണ്ടായിരുന്നത്. ഇത് ക്രെയിന്‍ ഉപയോഗിച്ച് ഉയര്‍ത്തുന്നതിനിടെയാണ് അപകടം സംഭവിച്ചത്.

സ്റ്റീല്‍ പ്ലാന്റിലെ എസ്എംഎസ്2, എസ്ടിസി3 ഹീറ്റ് ഫെസിലിറ്റിയില്‍ വളരെ ഉയര്‍ന്ന താപനിലയില്‍ സ്റ്റീല്‍ വഹിച്ചിരുന്ന ഒരു ലാഡില്‍ പൊട്ടിത്തെറിച്ചതിനെത്തുടര്‍ന്ന് വലിയ അളവില്‍ ഉരുകിയ ഉരുക്ക് ചോര്‍ന്നൊലിച്ചപ്പോഴാണ് അപകടം സംഭവിച്ചത്. മരിച്ച എട്ട് പേരില്‍ അഞ്ച് പേര്‍ സ്ഥിരം ജീവനക്കാരും മൂന്ന് പേര്‍ കരാര്‍ തൊഴിലാളികളുമാണ്.

ദുരന്തത്തില്‍ പ്രധാനമന്ത്രി നരേന്ദ്ര മോദി ദുഃഖം രേഖപ്പെടുത്തുകയും പ്രധാനമന്ത്രിയുടെ ദേശീയ ദുരിതാശ്വാസ നിധിയില്‍ നിന്ന് സഹായം പ്രഖ്യാപിക്കുകയും ചെയ്തു. മരിച്ച ഓരോ തൊഴിലാളിയുടെയും അടുത്ത ബന്ധുക്കള്‍ക്ക് പിഎംഎന്‍ആര്‍എഫില്‍ നിന്ന് 2 ലക്ഷം രൂപ ധനസഹായം പ്രധാനമന്ത്രി പ്രഖ്യാപിച്ചു. സംഭവത്തില്‍ പരിക്കേറ്റവര്‍ക്ക് 50,000 രൂപ വീതം ധനസഹായം നല്‍കും.