കഴിഞ്ഞ ദിവസം അഞ്ച് മണിക്കൂറോളം നിറുത്താതെ പെയ്ത മഴയില്‍ ചെന്നൈ നഗരം ഏതാണ്ട് സ്തംഭിച്ച നിലയില്‍. കഴിഞ്ഞ അര്‍ദ്ധ രാത്രി മാത്രം നഗരത്തില്‍ ലഭിച്ചത് 153 സെന്റീ മീറ്റര്‍ മഴ. 2015ലെ പ്രളയത്തിന് ശേഷം ഇത്രയും വലിയ മഴ ലഭിക്കുന്നത് ഇതാദ്യമായാണ്. അടുത്ത 24 മണിക്കൂര്‍ കൂടി ഈ മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. മഴയെത്തുടര്‍ന്ന് ചെന്നൈ, തിരുവള്ളൂര്‍, കാഞ്ചീപൂരം എന്നീ ജില്ലകളിലെ വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍ ഓഫീസുകള്‍ക്കും ഇന്ന്കൂടി അവധി പ്രഖ്യാപിച്ചു.

ഈ ജില്ലകളില്‍ പ്രവര്‍ത്തിക്കുന്ന ഐ.ടി കമ്പനികള്‍ തങ്ങളുടെ ജീവനക്കാര്‍ക്ക് അവധി നല്‍കുകയോ വീട്ടില്‍ നിന്നും ജോലി ചെയ്യാന്‍ അനുവദിക്കുകയോ ചെയ്യണമെന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു. കനത്ത മഴ കണക്കിലെടുത്ത് ഇന്ന് ആളുകള്‍ പുറത്തിറങ്ങാതെ വീടുകളില്‍ തന്നെ കഴിണമെന്ന് ദേശീയ ദുരന്ത നിവാരണ അതോറിറ്റി അഭ്യര്‍ത്ഥിച്ചു. കുറച്ച് ദിവസം മുമ്പ് സംസ്ഥാനത്തിന്റെ തെക്കന്‍ തീരത്തെത്തിയ വടക്കുകിഴക്കന്‍ മണ്‍സൂണാണ് കനത്ത മഴയ്ക്ക് കാരണമായതെന്നാണ് കാലാവസ്ഥാ നിരീക്ഷണ കേന്ദ്രം പറയുന്നത്.
തമിഴ്‌നാട്ടില്‍ വരും ദിവസങ്ങളിലും മഴ തുടരും. എന്നാല്‍ തീരപ്രദേശങ്ങളില്‍ മഴയുടെ ശക്തി കൂടുതലായിരിക്കും. ഈ പ്രതിഭാസം രണ്ട് മൂന്ന് ദിവസം നീണ്ടുനില്‍ക്കുമെന്നും കാലാവസ്ഥാ കേന്ദ്രം വ്യക്തമാക്കി. അതേസമയം, ജനങ്ങള്‍ പരിഭ്രാന്തരാകേണ്ടതില്ലെന്നും എല്ലാ അടിയന്തര സാഹചര്യങ്ങളും നേരിടാന്‍ സര്‍ക്കാര്‍ സജ്ജമാണെന്നും മുഖ്യമന്ത്രി ഇ.പളനിസാമി വ്യക്തമാക്കി. പ്രളയബാധിത പ്രദേശത്ത് നിന്നും ആളുകളെ മാറ്റി പാര്‍പ്പിക്കാന്‍ 115 താത്കാലിക കേന്ദ്രങ്ങള്‍ തുറന്നതായും അദ്ദേഹം പറഞ്ഞു.

സാധാരണ ഒക്ടോബര്‍ മുതല്‍ ഡിസംബര്‍ വരെയുള്ള കാലയളവില്‍ തമിഴ്‌നാട്, ആന്ധ്യാപ്രദേശ്, പുതുച്ചേരി തുടങ്ങിയ പ്രദേശങ്ങളില്‍ വടക്കു കിഴക്കന്‍ മണ്‍സൂണ്‍ സാമാന്യം നല്ല മഴ നല്‍കാറുണ്ട്. ഒരു വര്‍ഷം പെയ്യുന്ന മഴയുടെ 30 ശതമാനവും ഈ സമയത്താണ് ലഭിക്കുക. കഴിഞ്ഞ വര്‍ഷം ചെന്നൈ തീരത്ത് രൂപം കൊണ്ട നാഡ ചുഴലിക്കാറ്റ് കനത്ത മഴയ്ക്ക് കാരണമായിരുന്നു.

എന്നാല്‍ 2015ല്‍ ബംഗാള്‍ ഉള്‍ക്കടലില്‍ രൂപം കൊണ്ട ന്യൂനമര്‍ദ്ദം ചെന്നൈ തീരത്ത് വന്‍ദുരിതം വിതച്ചിരുന്നു. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം ചുഴലിക്കാറ്റാകാതെ ചെന്നൈ തീരത്ത് കരയിലേക്കു കയറി. അധികം ദൂരം സഞ്ചരിക്കാതെ ചുറ്റിപ്പറ്റി നിന്ന കാര്‍മേഘങ്ങള്‍ തീരദേശത്തെ മൂന്നു ജില്ലകളെ മുക്കി. നാലു ദിവസം തുടര്‍ച്ചയായ മഴ ലഭിച്ചതോടെ തമിഴകം പ്രളയക്കടലായി. ഓരോ പത്തു വര്‍ഷം കൂടുമ്പോഴും വലിയൊരു പ്രളയം ഈ നഗരത്തില്‍ പതിവാണ്. 1969, 76, 85, 96, 98, 2005 എന്നീ വര്‍ഷങ്ങള്‍ ഉദാഹരണം. ഈ കണക്കുകള്‍ നോക്കിയാല്‍ ഇത്തവണ പ്രളയമുണ്ടാകില്ലെന്ന് ആശ്വാസിക്കാമെങ്കിലും തമിഴകം ആശങ്കയില്‍ തന്നെയാണ്.