രഞ്ജി ട്രോഫി മത്സരത്തിനിടെ സുരക്ഷാ വീഴ്ചയെന്ന് റിപ്പോര്‍ട്ട്. മത്സരം നടക്കുന്നതിനിടെ മദ്യലഹരിയിലായിരുന്ന യുവാവ് പ്രധാന കവാടത്തിലൂടെ കാറോടിച്ച് മൈതാനത്തേക്ക് കയറ്റുകയായിരുന്നു. പാലം എയര്‍ ഫോഴ്‌സ് ഗ്രൗണ്ടില്‍ മത്സരം നടക്കുന്നതിനിടെയാണ് സംഭവം. കളി അവസാനിക്കാന്‍ 20 മിനിറ്റ് അവശേഷിക്കെ 4.40ഓടെയാണ് യുവാവ് വാഗണ്‍ ആര്‍ കാറുമായി മൈതാനത്തേക്ക് എത്തിയത്.

ഒടുവില്‍ എയര്‍ ഫോഴ്‌സ് പോലീസ് ഇയാളെ തടയുകയും ഡല്‍ഹി പോലീസിന് കൈമാറുകയും ചെയ്തു. രാജ്യന്തര താരങ്ങളയാ ഗൗതം ഗംഭീര്‍, ഇഷാന്ത് ശര്‍മ്മ, റിഷബ് പന്ത് തുടങ്ങിയവര്‍ കളിച്ചു കൊണ്ടിരിക്കെയാണ് മദ്യപന്‍ കാറുമായി ഗ്രൗണ്ടിലേക്ക് അതിക്രമിച്ച് കടന്നത്.

ഗിരീഷ് ശര്‍മ്മ എന്നയാളാണ് പിടിയിലായത്. ഇയാള്‍ രണ്ട് തവണ വിക്കറ്റുകള്‍ക്കിടെ കാറോടിച്ചു. കളി നടന്നുകൊണ്ടിരുന്ന എയര്‍ഫോഴ്‌സ് മൈതാനത്തിന്റെ പ്രധാന കവാടം തുറന്ന് കിടന്നതാണ് സുരക്ഷാ വീഴ്ചയുടെ കാരണം. പ്രധാന കവാടത്തില്‍ സുരക്ഷാ ഉദ്യോഗസ്ഥനും ഇല്ലായിരുന്നു.