ബിഹാറിലെ ബെഗുസരായി ജില്ലയില്‍ ഗംഗാനദീതീരത്ത് തിക്കിലും തിരക്കിലും പെട്ട് നാല് തീര്‍ത്ഥാടകര്‍ മരിച്ചു. 10ലേറെ പേര്‍ക്ക് പരിക്കേറ്റു. കാര്‍ത്തിക പൂര്‍ണിമയുമായി ബന്ധപ്പെട്ട് പ്രധാന സ്‌നാനഘട്ടമായ സിമരിയയിലാണ് അപകടം. ഇവിടെ പുണ്യസ്‌നാനം നിര്‍വ്വഹിക്കാന്‍ ആയിരക്കണക്കിന് തീര്‍ഥാടകര്‍ ഒരുമിച്ച് തിരക്കു കൂട്ടിയതാണ് അപകടത്തിനടയാക്കിയത്. ബെഗുസരായി പൊലീസ് സൂപ്രണ്ട് മരണം സ്ഥീരീകരിച്ചെങ്കിലും തിക്കും തിരക്കുമുണ്ടായെന്ന വാര്‍ത്ത നിഷേധിച്ചു.

മരിച്ചവരെല്ലാം 80 വയസു കഴിഞ്ഞ സ്ത്രീകളാണ്. ഇവര്‍ ആരോഗ്യപരമായി ദുര്‍ബലരായിരുന്നു. സ്‌നാനത്തിനുള്ളവരും കഴിഞ്ഞ് മടങ്ങുന്നവരും ഇടുങ്ങിയ വഴിയിലൂടെയാണ് സഞ്ചരിക്കുന്നത്. ഇതിനിടയില്‍ കുടുങ്ങി ശ്വാസം മുട്ടിയാണ് മൂവരും മരിച്ചതെന്ന് പൊലീസ് സൂപ്രണ്ട് അറിയിച്ചു.

മുഖ്യമന്ത്രി നിതീഷ് കുമാര്‍ മരിച്ചവരുടെ കുടുംബത്തിന് നാലുലക്ഷം രൂപ താത്കാലികാശ്വാസം പ്രഖ്യാപിച്ചു. പരിക്കേറ്റവര്‍ക്ക് സൗജന്യ ചികിത്‌സ ഉറപ്പുവരുത്തണമെന്ന് ജില്ലാ അധികൃതരോട് മുഖ്യമന്ത്രി ആവശ്യപ്പെട്ടു.