രാഷ്ട്രീയ പാര്‍ട്ടികളും സംഘടനകളും നടത്തുന്ന ഹര്‍ത്താല്‍,ബന്ത് തുടങ്ങിയവയ്ക്കിടെ ഉണ്ടാകുന്ന അക്രമങ്ങള്‍ തടയുമെന്ന് കേരളം സുപ്രീം കോടതിയെ അറിയിച്ചു. പൊതു സ്വകാര്യ സ്വത്തുക്കള്‍ക്ക് നേരെ ഉണ്ടാകുന്ന അക്രമങ്ങള്‍ തടയാന്‍ സുപ്രീം കോടതി പുറപ്പടുവിച്ച മാര്‍ഗനിര്‍ദേശങ്ങള്‍ നടപ്പിലാക്കാന്‍ ജില്ലാ പൊലീസ് മേധാവികള്‍ക്ക് നിര്‍ദേശം നല്‍കിയിട്ടുണ്ടെന്നും കേരളം സത്യവാങ്മൂലത്തില്‍ വ്യക്തമാക്കി.

അതേസമയം ബന്തും ഹര്‍ത്താലും തടയുന്നതിന് നിയമം കൊണ്ടുവരണമെന്ന കോടതിയുടെ നിര്‍ദേശത്തെ കുറിച്ച് സത്യവാങ്മൂലത്തില്‍ പരാമര്‍ശമില്ല. കേരള ഗവര്‍ണറായ ജസ്റ്റിസ് പി.സദാശിവം 2009ല്‍ സുപ്രീം കോടതി ജഡ്ജി ആയിരുന്നപ്പോഴാണ് മാര്‍ഗനിര്‍ദ്ദേശങ്ങള്‍ കൊണ്ടുവന്നത്. എന്നാല്‍ ഈ മാര്‍ഗരേഖ കേരളം നടപ്പിലാക്കുന്നില്ലെന്ന് ചൂണ്ടിക്കാട്ടി അഭിഭാഷകനായ കോശി ജേക്കബ് ഹര്‍ജി സമര്‍പ്പിക്കുകയായിരുന്നു

കേരളം മാര്‍ഗനിര്‍ദ്ദേശം പാലിക്കുന്നില്ലെന്നും പ്രധാനപ്പെട്ട രാഷ്ട്രീയ പാര്‍ട്ടികള്‍ അക്രമം നടത്തുമ്പോള്‍ സര്‍ക്കാര്‍ കണ്ണടയ്ക്കുന്നു എന്നുമാണ് കോശി ഹര്‍ജിയില്‍ ആരോപിച്ചിരിക്കുന്നത്. ഭരണഘടനയുടെ 14, 19, 21 അനുച്ഛേദങ്ങളുടെ ലംഘനമാണ് സംസ്ഥാനസര്‍ക്കാര്‍ നടത്തുന്നതെന്നും കോശി ഹര്‍ജിയില്‍ ആരോപിച്ചിട്ടുണ്ട്.

എന്നാല്‍, മാര്‍ഗനിര്‍ദ്ദേശങ്ങള്‍ നടപ്പാക്കുന്നതിന് ഇടക്കാലസംവിധാനം എന്ന നിലയില്‍ 2012 നവംബറില്‍ തന്നെ സംസ്ഥാന പൊലീസ് മേധാവി ജില്ലാ പൊലീസ് മേധാവികള്‍ക്ക് ഉത്തരവ് നല്‍കിയിരുന്നുവെന്ന് കേരളം വിശദീകരിച്ചു. ഹര്‍ത്താലുകള്‍ക്കിടെ പൊതു സ്വകാര്യ സ്വത്തുക്കള്‍ക്ക് നഷ്ടമുണ്ടായതിന്റെ കൃത്യമായ കണക്കുകള്‍ സുപ്രീം കോടതിക്കും ഹൈക്കോടതിക്കും കൈമാറാന്‍ നടപടിയെടുത്തിട്ടുണ്ട്. പ്രതിഷേധ സമരങ്ങളിലെ അക്രമങ്ങള്‍ വീഡിയോയില്‍ ചിത്രീകരിച്ചിട്ടുണ്ടെന്നും സംസ്ഥാനം വ്യക്തമാക്കി.