നോട്ട്‌നിരോധനം പ്രഖ്യാപിച്ചിട്ട് നാളെ ഒരു വര്‍ഷം പിന്നിടുമ്പോള്‍ ഈ ആശയം പ്രധാനമന്ത്രി നരേന്ദ്രമോദിക്ക് കൊടുത്തത് ആരാണെന്ന് പലരും അന്വേഷിച്ചിട്ടുണ്ട്. അതിനുള്ള ഉത്തരം അവസാനിക്കുന്നത് അനില്‍ ബോകില്‍ എന്ന മെക്കാനിക്കല്‍ എഞ്ചിനിയറിലാണ്. സാമ്പത്തിക വിപ്‌ളവം എന്ന അര്‍ത്ഥമുള്ള അര്‍ത്ഥക്രാന്തി എന്ന സംഘടനയുടെ സ്ഥാപകനാണിദ്ദേഹം. ഇദ്ദേഹത്തിന്റെ നേതൃത്തത്തിലാണ് പ്രധാനമന്ത്രി നരേന്ദ്രമോദിക്ക് മുന്നില്‍ നോട്ട് നിരോധനത്തെ കുറിച്ച് ആദ്യ അവതരണം നടത്തിയത്. എന്നാല്‍ താന്‍ പറഞ്ഞിരുന്ന മറ്റ് കാര്യങ്ങള്‍ കൂടി നടപ്പാക്കാതെ നോട്ട്‌നിരോധനം പൂര്‍ണമാകില്ലെന്നും അദ്ദേഹം പറഞ്ഞു.

പ്രധാനമന്ത്രി താന്‍ നല്‍കിയ ആശയങ്ങള്‍ മുഴുവന്‍ പ്രാവര്‍ത്തികമാക്കിയില്ലെന്നും ഞങ്ങള്‍ നികുതിയില്ലാത്ത സമ്പത്ത് വ്യവസ്ഥയാണ് ലക്ഷ്യം വെച്ചതെന്നും അതിനായി അഞ്ച് പ്രധാന നിര്‍ദ്ദേശങ്ങളാണ് നല്‍കിയിരുന്നതെന്നും അനില്‍ ബോകില്‍ വ്യക്തമാക്കി. എന്നാല്‍ തെരഞ്ഞെടുപ്പ് പ്രകടന പത്രികയില്‍ ജനങ്ങള്‍ക്ക് നല്‍കിയ ഉറപ്പുകള്‍ പാലിക്കേണ്ടതിനാല്‍ സര്‍ക്കാര്‍ അത് പൂര്‍ണമായും നടപ്പാക്കിയില്ലെന്നും അദ്ദേഹം ചൂണ്ടിക്കാട്ടി. മൂല്യവര്‍ദ്ധിത നികുതി ഒഴിവാക്കി ഏകീകൃത നികുതി സമ്പ്രദായം വേണമെന്നും അത് ബാങ്ക് ട്രാന്‍സാക്ഷന്‍ നികുതി (ബി.ബി.ടി) ആയിരിക്കണമെന്നും നിര്‍ദ്ദേശിച്ചിരുന്നു. കള്ളപ്പണം ഇല്ലാതാക്കാന്‍ സര്‍ക്കാര്‍ കൊണ്ടുവന്ന ഡിജിറ്റല്‍ പണമിടപാട് നല്ലതാണെന്നും അദ്ദേഹം ചൂണ്ടിക്കാട്ടി. 

പരോക്ഷ നികുതിയേക്കാള്‍ നല്ലതാണ് ജി.എസ്.ടിയെന്നും എന്നാല്‍ ബാക്ക് ട്രാന്‍സാക്ഷന്‍ ടാക്‌സ് (ബി.ബി.ടി) ആണ് ഏറ്റവും നല്ല നികുതി സമ്പ്രദായമാണെന്നും അദ്ദേഹം ചൂണ്ടിക്കാട്ടി. അതില്‍ യാതൊരു വേര്‍തിരിവുകളോ, രാഷ്ട്രീയ സ്വാധീനമോ ഉണ്ടാകില്ല. ഇപ്പോള്‍ രാഷ്ട്രീയ സ്വാധീനം ഉപയോഗിച്ച് കോര്‍പ്പറേറ്റുകള്‍ കോടിക്കണക്കിന് രൂപയുടെ നികുതിയിളവ് നേടുന്നുണ്ടെന്നും അദ്ദേഹം ചൂണ്ടിക്കാട്ടി. ഉയര്‍ന്ന മൂല്യമുളള നോട്ടുകള്‍ ഘട്ടം ഘട്ടമായി പിന്‍വലിക്കണമെന്നാണ് കേന്ദ്രസര്‍ക്കാരിന് ഞങ്ങള്‍ നിര്‍ദ്ദേശം നല്‍കിയത്. ആദ്യം 50 രൂപ , പിന്നെ 100 അങ്ങനെ ഉയര്‍ന്ന മൂല്യമുള്ള നോട്ടുകള്‍ വരെ റദ്ദാക്കണം. അതിനോടൊപ്പം നിലവിലെ കിതുതി സമ്പ്രദായം പിന്‍വലിക്കുകയും ബാങ്കിംഗ് ട്രാന്‍സാക്ഷന്‍ ടാക്‌സ് നടപ്പാക്കുകയും വേണമെന്നാണ് നിര്‍ദ്ദേശിച്ചത്. പക്ഷെ, ഞങ്ങളുടെ നിര്‍ദ്ദേശങ്ങള്‍ മുഴുന്‍ നടപ്പിലാക്കാതെ പ്രധാനമന്ത്രി അഞ്ഞൂറിന്റെയും ആയിരത്തിന്റെയും നോട്ടുകള്‍ മാത്രം അസാധുവാക്കിയെന്നും അദ്ദേഹം വ്യക്തമാക്കി.