'നിര്ഭയ്'; ഇന്ത്യയുടെ സ്വന്തം അണ്വായുധ മിസൈലിന്റെ പരീക്ഷണം വിജയകരം, ചിലവ് 10 കോടി!
തദ്ദേശീയമായി ഇന്ത്യ നിര്മിച്ച അണ്വായുധ വാഹക ശേഷിയുള്ള ദീര്ഘദൂര സബ്സോണിക് മിസൈല് 'നിര്ഭയ്'ന്റെ അഞ്ചാം പരീക്ഷണം വിജയം. ഇന്ത്യയ്ക്ക് എംടിസിആറില് അംഗത്വം ലഭിച്ചതോടെ പരീക്ഷണം നടത്താന് കൂടുതല് അവസരം ലഭിച്ചതോടെയാണിത്. നേരത്തെ നടന്ന പരീക്ഷണങ്ങളില് മൂന്നു തവണ പരാജയപ്പെടുകയും ഒരു തവണ ഭാഗികമായി വിജയിക്കുകയും ചെയ്ത മിസൈലാണ് നിര്ഭയ്. ആണവായുധങ്ങള് വഹിക്കാന്കഴിയുന്ന മിസൈലാണ് നിര്ഭയ്.
2016 ഡിസംബറില് ഒഡീഷ തീരത്ത് നടത്തിയ പരീക്ഷണം പരാജയപ്പെട്ടിരുന്നു. 2015 ഒക്ടോബറില് നടന്ന പരീക്ഷണവും പരാജയപ്പെട്ടിരുന്നു. വിക്ഷേപണത്തിന്റെ പതിനൊന്നാം മിനിറ്റില് മിസൈലിന്റെ നിയന്ത്രണം നഷ്ടമാകുകയായിരുന്നു. 1000 കിലോമീറ്റര് ദൂരം സഞ്ചരിക്കാന് കഴിയുന്ന മിസൈല് 128 കിലോമീറ്റര് പിന്നിട്ടപ്പോള് കടലില് തകര്ന്നുവീണു. 2013 മാര്ച്ചില് നടന്ന ആദ്യ പരീക്ഷണം പരാജയമായിരുന്നു. തുടര്ന്ന് 2014 ഒക്ടോബറില് നടന്ന രണ്ടാം പരീക്ഷണം ഭാഗികമായി വിജയിച്ചിരുന്നു.
എന്താണ് നിര്ഭയ്? ദൂരപരിധി ആയിരം കിലോമീറ്റര്. പറക്കുന്ന ഉയരം കഷ്ടിച്ച് മരങ്ങള്ക്ക് മുകളിലൂടെ. വേഗം ശബ്ദത്തേക്കാള് കുറവ്, ഒരു സാധാരണയാത്രാവിമാനത്തേക്കാള് അല്പ്പം കൂടി. പോര്വിമാനത്തിന്റെ വേഗം പോലുമില്ല. നിര്ഭയ് ക്രൂസ് മിസൈലിന്റെ വിശേഷങ്ങള് കേട്ടാല് ആര്ക്കും മതിപ്പ് തോന്നില്ല. പ്രത്യേകിച്ച് ഇന്ത്യന് ശാസ്ത്രജ്ഞന്മാര് തന്നെ വികസിപ്പിച്ചു സൈന്യങ്ങള്ക്കു നല്കിയ മറ്റ് ചില മിസൈലുകളുമായി തട്ടിച്ചു നോക്കുമ്പോള്. മൂവായിരം കിലോമീറ്റര് വരെ ദൂരപരിധിയുള്ള അഗ്നി3, 4 എന്നീ പതിപ്പുകള്, പരീക്ഷണത്തിലിരിക്കുന്ന 5000 കിലോമീറ്റര് വരെ ദൂരപരിധിയുള്ള അഗ്നി5, ശബ്ദത്തേക്കാള് വേഗത്തില് പറക്കുന്ന ലോകത്തെ ഏക ക്രൂസ് മിസൈലായ ബ്രഹ്മോസ് എന്നിവ കൈവശമുള്ള ഇന്ത്യ എന്തിന് ഇങ്ങനെയൊരു മിസൈല് വികസിപ്പിക്കുന്നു എന്ന ചോദ്യവും ഉയരാം.
എന്നാല് നിര്ഭയ് ചില്ലറക്കാരനല്ല. ഈ മിസൈലിന്റെ വികസനത്തോടെ ഇന്ത്യ മിസൈല് സുരക്ഷാരംഗത്തു പുതിയൊരു കുതിപ്പിനു തയാറെടുക്കുകയാണ്. ഇന്ത്യ നൂറു ശതമാനം സ്വന്തമായി വികസിപ്പിച്ചെടുത്ത ആദ്യത്തെ ക്രൂസ് മിസൈലാണു നിര്ഭയ്. അഗ്നിയുടെ വിവിധ പതിപ്പുകള്, പൃഥ്വി, ധനുഷ് തുടങ്ങിയവയെല്ലാം നൂറു ശതമാനം ഇന്ത്യയില് വികസിപ്പിച്ചവയാണ്. പക്ഷേ, അവയെല്ലാം ബാലിസ്റ്റിക് മിസൈലുകളാണ്. ഞാണില് നിന്നു പോയ അസ്ത്രം പോലയാണവ തൊടുത്തുവിട്ടാല് അവയുടെ മേല് യാതൊരു നിയന്ത്രണവുമില്ല. അതിനാല് അഗ്നിപോലുള്ള ബാലിസ്റ്റിക് മിസൈല് ലക്ഷ്യമിടുന്നത് പ്രധാനമായും സ്ഥാനചലനം സംഭവിക്കാത്ത ലക്ഷ്യങ്ങളെയാണ്. വന് സൈനികവ്യൂഹങ്ങള്, നഗരങ്ങള്, വ്യവസായ മേഖലകള്... അങ്ങനെ എന്തുമാകാം. യുദ്ധത്തിന്റെ അവസാനഘട്ടത്തിലേ ഇങ്ങനെയുള്ളവ ലക്ഷ്യമിടുകയുള്ളൂ.
അല്പംകൂടി ദൂരപരിധി കുറഞ്ഞ പൃഥ്വിയുടെ ക്ലാസിലുള്ള ബാലിസ്റ്റിക് മിസൈലുകള് യഥാര്ഥ സൈനിക മിസൈലുകളാണ്. യുദ്ധഭൂമിയില് ശത്രുവിന്റെ ടാങ്ക് വ്യൂഹങ്ങള്, പാലങ്ങള്, റയില്വേ ഹബ് തുടങ്ങിയവ തകര്ക്കാനാണ് ഇവ ഉപയോഗിക്കുക. പൃഥ്വിയും ബാലിസ്റ്റിക് മിസൈല് ആയതിനാല് തൊടുത്തുവിട്ടാല് പിന്നെ നിയന്ത്രണം സാധ്യമല്ല.
ഇവയില് നിന്നു വ്യത്യസ്തമാണു ക്രൂസ് മിസൈല്. വിമാനം പോലെയാണ് അവ പറക്കുന്നത്. അവയുടെ കംപ്യൂട്ടര് തലച്ചോറുപയോഗിച്ച് ഭൂമിയുടെ കിടപ്പ് പരിശോധിച്ച് അതുമായി തട്ടിച്ചുനോക്കിക്കൊണ്ടോ, അല്ലെങ്കില് നേരത്തെ പ്രോഗ്രാം ചെയ്ത മാര്ഗത്തിലൂടെയോ, ഭൂപടം അടിസ്ഥാനമാക്കിയോ ഇവയ്ക്കു പറക്കാം. വഴിയില് ഒരു മലയുണ്ടെങ്കില് അടുത്തെത്തുമ്പോള് പെട്ടെന്ന് ഉയര്ന്ന് അതിന് മേലെ കൂടി പറന്ന് ലക്ഷ്യത്തിലെത്തും. ഈ കൂട്ടത്തില് പെട്ടതാണ് ഇന്ത്യയുടെ പക്കലുള്ള ബ്രഹ്മോസ് മിസൈല്. ശബ്ദത്തേക്കാള് വേഗത്തില് പറക്കാന് കഴിവുള്ള ലോകത്തിലെ ഏക ക്രൂസ് മിസൈലാണിത്. എന്നാല് ഇതിന്റെ ദൂരപരിധി പരിമിതമാണ് കഷ്ടിച്ച് 300 കിലോമീറ്റര്. ദൂരപരിധി കുറവായതിനാല്, അണ്വായുധം ഘടിപ്പിക്കാനാവില്ല. തൊട്ടടുത്തുള്ള ശത്രുവിന് നേര്ക്ക് അണ്വായുധം പ്രയോഗിച്ചാല് അതില് നിന്നുള്ള റേഡിയേഷനും ആഘാതവും തിരിച്ചടിക്കുമല്ലോ. രണ്ടാമതായി, ഇതില് ആണവപോര്മുന ഘടിപ്പിക്കാമെന്നു വച്ചാല് തന്നെ 'നിയമതടസ'മുണ്ട്. റഷ്യയുമായി സഹകരിച്ച് വികസിപ്പിച്ചതാണു ബ്രഹ്മോസ്. മിസൈല് സാങ്കേതികവിദ്യ കൈമാറുന്നതു സംബന്ധിച്ച ആഗോള നിയമങ്ങളനുസരിച്ച് സംയുക്തമായി വികസിപ്പിച്ച മിസൈലുകള്ക്ക് 300 കിലോമീറ്ററിനപ്പുറം പറക്കല് ശേഷി ഉണ്ടാവാന് പാടില്ലെന്നും ആണവ പോര്മുന ഘടിപ്പിക്കരുതെന്നും നിബന്ധനയുണ്ട്.
ഇവിടെയാണ് നിര്ഭയ് മിസൈലിന്റെ ആവശ്യം. നാം സ്വന്തമായി വികസിപ്പിച്ചതായതിനാല് ദൂരപരിധി വര്ധിപ്പിക്കാനും ഏത് പോര്മുന ഘടിപ്പിക്കാനുമുള്ള സ്വാതന്ത്യ്രം നമുക്കുണ്ട്. ഇപ്പോള് ആയിരം കിലോമീറ്റര് വരെ ദൂരപരിധിയുള്ളതിനാല് ഇതില് ആണവ പോര്മുന ഘടിപ്പിക്കാനാവും. തൊടുത്തുവിട്ട ശേഷവും അതിന്റെ ഗതി നിയന്ത്രിക്കാനുമാവും.
നിര്ഭയ് മിസൈല്: പ്രത്യേകതകള്
റോക്കറ്റ് പോലെ ലംബമായി ഉയര്ന്ന ശേഷം വിമാനം പോലെ തിരശ്ചീനമായി പറക്കാന് കഴിയും. താഴ്ന്നു പറക്കുന്നതിനാല് റഡാറുകളുടെ കണ്ണുവെട്ടിക്കാം. കരയില് നിന്നും യുദ്ധവിമാനങ്ങളില് നിന്നും യുദ്ധക്കപ്പലുകള്, അന്തര്വാഹിനി തുടങ്ങിയവയില് നിന്നും വിക്ഷേപിക്കാം. ദൂരപരിധി: 700-1000 കി. മീറ്റര്, വികസിപ്പിച്ചത്: ഡിആര്ഡിഒ, ചെലവ്: ഏകദേശം 10 കോടി രൂപ.
https://www.facebook.com/Malayalivartha
