റിസര്‍വ് ബാങ്ക് നോട്ട് അച്ചടി കുറയ്ക്കുന്നു. കറന്‍സി വോള്‍ട്ടുകളില്‍ നോട്ടുകള്‍ സൂക്ഷിക്കാന്‍ ഇടമില്ലാത്തതിനെ തുടര്‍ന്നാണ് നോട്ട് അച്ചടി കുറയ്ക്കാന്‍ ആര്‍ബിഐ നിര്‍ദേശം നല്‍കിയതെന്നാണു റിപ്പോര്‍ട്ട്. അഞ്ചു വര്‍ഷത്തിനിടെയിലെ ഏറ്റവും കുറഞ്ഞ നോട്ട് അച്ചടിയാണ് നടപ്പു സാന്പത്തിക വര്‍ഷമുണ്ടായിരിക്കുന്നതെന്ന് ദേശീയ മാധ്യമമായ മിന്റ് റിപ്പോര്‍ട്ട് ചെയ്യുന്നു.

കേന്ദ്ര സര്‍ക്കാര്‍ അസാധുവാക്കിയ 500, 1000 രൂപ നോട്ടുകള്‍ കറന്‍സി ചെസ്റ്റുകളിലും വാണിജ്യ ബാങ്കുകളിലും കെട്ടിക്കിടക്കുകയാണ്. ഇതിനാല്‍ പുതുതായി അച്ചടിക്കുന്ന നോട്ടുകള്‍ സൂക്ഷിക്കാന്‍ സ്ഥലമില്ല. ഇക്കാരണത്താനാലാണ് നോട്ട് അച്ചടി കുറയ്ക്കാന്‍ നിര്‍ദേശിച്ചിരിക്കുന്നതെന്ന് ഈ മേഖലയുമായി ബന്ധപ്പെട്ട് പ്രവര്‍ത്തിക്കുന്ന വിദഗ്ധരെ ഉദ്ധരിച്ച് മിന്റ് റിപ്പോര്‍ട്ട് ചെയ്യുന്നു. അസാധുവാക്കിയ നോട്ടുകള്‍ ആര്‍ബിഐ ഇതേവരെ എണ്ണിത്തീര്‍ന്നിട്ടുമില്ല.

2100 കോടി കറന്‍സികളാണ് അടുത്ത വര്‍ഷത്തേക്ക് ആവശ്യമായി വരുന്നത്. മുന്‍ വര്‍ഷം ഇത് 2800 കോടിയായിരുന്നു. കഴിഞ്ഞ അഞ്ചു വര്‍ഷമായി ശരാശരി 2500 കോടി നോട്ടുകളാണ് അച്ചടിച്ചുവരുന്നതെന്നും റിപ്പോര്‍ട്ടില്‍ പറയുന്നു.