കമല്‍ഹാസന് പിന്നാലെ രജനികാന്തും രാഷ്ട്രീയത്തിലേക്ക്... താരത്തിന്റെ ജന്‍മദിനമായ ഡിസംബര്‍ 12ന് ഇത് സംബന്ധിച്ച് ഔദ്യോഗികപ്രഖ്യാപനം ഉണ്ടായേക്കും. കമല്‍ഹാസന്റെ ജന്‍മദിനമായ നവംബര്‍ ഏഴിന് അദ്ദേഹം രാഷ് ട്രീയത്തിലിറങ്ങുമെന്നും അതിന് മുന്നോടിയായി തമിഴ്‌നാട്ടിലുടനീളം ജനസമ്പര്‍ക്കപരിപാടി നടത്തുമെന്നും പ്രഖ്യാപിച്ചിരുന്നു. രജനികാന്തിന്റെ കാലാ, യന്തിരന്‍ 2.0 എന്നീ ചിത്രങ്ങളാണ് റിലീസാകാനുള്ളത്. അതിന് മുന്നോടിയായി പ്രഖ്യാപനം ഉണ്ടാകുമെന്നാണ് അറിയുന്നത്. പിറന്നാള്‍ ദിനത്തില്‍ രജനികാന്ത് ആരാധകരുമായി കൂടിക്കാഴ്ച നടത്താന്‍ തീരുമാനിച്ചിട്ടുണ്ട്. അന്ന് ചില നിര്‍ണായക തീരുമാനങ്ങള്‍ പ്രഖ്യാപിക്കും എന്നാലത് രാഷ്ട്രീയത്തെ സംബന്ധിച്ചാണോ എന്ന് പറയാനാകില്ലെന്ന് താരവുമായി അടുത്തവൃത്തങ്ങള്‍ പറഞ്ഞു. 

തമിഴ്‌നാട്ടില്‍ ഏറ്റവും കൂടുതല്‍ ജനപ്രീതിയുള്ള താരം രജനികാന്താണ്. ക്രൗഡ്പുളളര്‍ എന്നാണ് അദ്ദേഹത്തെ വിലയിരുത്തുന്നത്. കമല്‍ഹാസന്‍ മികച്ച അഭിനേതാവാണെങ്കിലും രജനികാന്തിന്റെ അത്രയും ജനങ്ങളെ ഇളക്കിമറിക്കാന്‍ അദ്ദേഹത്തിനാവില്ല. മുമ്പൊരിക്കല്‍ നിയമസഭാ തെരഞ്ഞെടുപ്പ് വേളയില്‍ ജയലളിതയുടെ രണ്ടിലചിഹ്നത്തിന് വോട്ട് ചെയ്യാന്‍ രജനികാന്ത് കൈകൊണ്ട് ആഹ്വാനം ചെയ്തിരുന്നു. അന്ന് ജയലളിത അധികാരത്തില്‍ വന്നിരുന്നു. അദ്ദേഹം അടുത്തിടെ ഫാന്‍സുകാരുമായി ചെന്നൈയിലെ രാഘവേന്ദ്ര കല്യാണമണ്ഡപത്തില്‍ കൂടിക്കാഴ്ച നടത്തിയിരുന്നു. അന്നും രണ്ട് മൂന്ന് ദിവസം തമിഴ്‌നാട്ടിലുടനീളമുള്ളവരെത്തി. വലിയ ജനത്തിരക്കായിരുന്നു. മാസിന്റെ മനസും മനശാസ്ത്രവും രജനികാന്തിന് നന്നായി അറിയാം. അദ്ദേഹത്തിന്റെ സിനിമകള്‍ തന്നെ അതിന് ഉദാഹരണം. 

കമല്‍ഹാസന്‍ അടുത്തിടെയാണ് തമിഴരുടെ സാമൂഹ്യജീവിതത്തില്‍ ഇടപെടാന്‍ തുടങ്ങിയത്. പ്രത്യേകിച്ച്, ജയലളിതയുടെ മരണ ശേഷം. ശശികലയും പളനിസ്വാമിയും ചേര്‍ന്ന് പനീര്‍സെല്‍വത്തെ മുഖ്യമന്ത്രിപദത്തില്‍ നിന്ന് പുകച്ച് പുറത്ത് ചാടിച്ചത് മുതല്‍. ജനങ്ങള്‍ തെരഞ്ഞെടുത്ത മുഖ്യമന്ത്രിയുള്ളപ്പോള്‍ അദ്ദേഹത്തെ മാറ്റി പുതിയൊരാളെ കൊണ്ടുവന്ന് തമിഴ്‌നാട്ടില്‍ ജനാധിപത്യത്തെ കശാപ്പ് ചെയ്യുകയായിരുന്നെന്ന് ദേശീയ മാധ്യമത്തിന് നല്‍കിയ അഭിമുഖത്തില്‍ അദ്ദേഹം വ്യക്തമാക്കിയിരുന്നു. രജനികാന്ത് ഇത്തരത്തിലുള്ള പരസ്യമായ പ്രതികരണങ്ങള്‍ക്കോ, വിമര്‍ശനങ്ങള്‍ക്കോ തുനിയാറില്ല. പക്ഷെ, വ്യക്തമായ രാഷ്ട്രീയ കാഴ്ചപ്പാടുണ്ട് താനും. മൂന്ന് പതിറ്റാണ്ടിലധികമായി സിനിമയില്‍ ജയിത്രയാത്ര തുടരുന്ന ഇരുവരും രാഷട്രീയത്തില്‍ നേര്‍ക്കുനേര്‍ വരുമ്പോള്‍ തമിഴകം തിളച്ചുമറിയുമെന്നുറപ്പാണ്.