ഷീന ബോറയെ കൊലപ്പെടുത്തിയത് ഭര്‍ത്താവ് പീറ്റര്‍ മുഖര്‍ജിയാണെന്ന് ഇന്ദ്രാണി മുഖര്‍ജി. ബുധനാഴ്ച മുംബൈ കോടതിയിലാണ് ഇന്ദ്രാണി പീറ്റര്‍ മുഖര്‍ജിക്കെതിരെ രംഗത്തെത്തിയത്. 2012ല്‍ ഷീന ബോറയെ തട്ടിക്കൊണ്ടുപോയത് പീറ്ററാണെന്നാണ് ഇന്ദ്രാണിയുടെ ആരോപണം. ഷീന ആത്മാര്‍ഥമായി സ്‌നേഹിക്കുകയും വിശ്വസിക്കുകയും ചെയ്തവരില്‍ നിന്നുണ്ടായ വഞ്ചന, അസൂയ, കാമം തുടങ്ങിയവയാണ് അവളുടെ ജീവനെടുത്തതെന്ന് സി.ബി.ഐ പ്രത്യേക കോടതിയില്‍ ഇന്ദ്രാണി നല്‍കിയ അപേക്ഷയില്‍ പറയുന്നു. പീറ്റര്‍ മുഖര്‍ജിയും മറ്റുള്ളവരും ചേര്‍ന്ന് തെളിവുകളെയും സാക്ഷികളെയും സ്വാധീനിച്ചതിനെ തുടര്‍ന്നാണ് തന്നെ അറസ്റ്റ് ചെയ്തത്. 2012- 2015 കാലഘട്ടത്തിലെ പീറ്റര്‍ മുഖര്‍ജിയുടെ ഫോണ്‍ രേഖകള്‍ ഇതിനായി പരിശോധിക്കണമെന്നും ഇന്ദ്രാണി ആവശ്യപ്പെടുന്നു.

2012ലാണ് 25കാരിയായ ഷീന കാറിനുള്ളില്‍ കൊല്ലപ്പെട്ടത്. ഇന്ദ്രാണിയും മുന്‍ ഭര്‍ത്താവ് സഞ്ജീവ് ഖന്നയും ഇന്ദ്രാണിയുടെ െ്രെഡവര്‍ ശ്യാംവര്‍ റായിയുമാണ് കൊലപാതകം നടത്തിയതെന്നാണ് പൊലീസ് ഭാഷ്യം. 2015 ജനുവരിയിലാണ് ഇന്ദ്രാണിക്കും മുന്‍ ഭര്‍ത്താവ് സഞ്ജീവ് ഖന്നക്കും ഇന്ദ്രാണിയുടെ െ്രെഡവര്‍ ശ്യാംവര്‍ റായിക്കുമെതിരെ കൊലപാതകത്തിന് കേസെടുത്തത്. ഇന്ദ്രാണിയുടെ നിലവിലെ ഭര്‍ത്താവ് പീറ്റര്‍ മുഖര്‍ജിയെയും കേസില്‍ കുറ്റക്കാരാനാണെന്ന് കണ്ടെത്തിയിരുന്നു.

കേസില്‍ ഇന്ദ്രാണിയും ഭര്‍ത്താവ് പീറ്റര്‍ മുഖര്‍ജിയും 2015 ആഗസ്റ്റിലാണ് അറസ്റ്റിലാകുന്നത്. പീറ്റര്‍ മുഖര്‍ജിയുടെ മുന്‍ ബന്ധത്തിലെ മകന്‍ രാഹുല്‍ മുഖര്‍ജിയുമായി പ്രണയത്തിലായിരുന്നു ഷീന ബോറ. ഇത് ഇഷ്ടപ്പെടാതിരുന്ന ഇന്ദ്രാണി മകളെ കൊലപ്പെടുത്തി എന്നാണ് കേസ്. ഇന്ദ്രാണിയുടെയും സഞ്ജീവ് ഖന്നയുടെയും മകളായ ഷീനയെ സഹോദരി എന്നായിരുന്നു ഇന്ദ്രാണി സുഹൃത്തുക്കള്‍ക്ക് പരിചയപ്പെടുത്തിയിരുന്നത്. ഷീനയെ കാണാതായതിനെ കുറിച്ച് അവള്‍ അമേരിക്കയിലേക്ക് പോയെന്നാണ് ഇന്ദ്രാണി പ്രചരിപ്പിച്ചത്.

കേസില്‍ തന്റെ പങ്കിനെ കുറിച്ച് കുറ്റസമ്മതം നടത്തിയ ശ്യാംവര്‍ റായ് ഇന്ദ്രാണിക്കും സഞ്ജീവ് ഖന്നക്കും എതിരെ മൊഴി നല്‍കുകയും ചെയ്തിരുന്നു. ശ്യാംവറും രാഹുലും തനിക്കെതിരെ വ്യാജ തെളിവുകളാണ് നല്‍കിയതെന്ന് ഇന്ദ്രാണി ആരോപിച്ചിരുന്നു. പീറ്റര്‍ മുഖര്‍ജിക്കെതിരായ ഇന്ദ്രാണിയുടെ പുതിയ ആരോപണങ്ങളോട് പ്രതികരിക്കുന്നില്ലെന്ന് പീറ്ററിന്റെ അഭിഭാഷകന്‍ പറഞ്ഞു. ഉചിതമായ മറുപടി കോടതിയില്‍ നല്‍കുമെന്നും അദ്ദേഹം അറിയിച്ചു.