ശശികലയ്ക്കും എ.ഐ.ഡി.എം.കെയ്ക്കും എതിരെ കമല്‍ഹാസന്‍; ക്രിമിനലുകളെ അധികാരത്തില്‍ നിന്ന് പുറത്താക്കണമെന്ന് താരം
തമിഴ്‌നാട്ടിലെ സര്‍ക്കാര്‍ കവര്‍ച്ച നടത്തുകയാണെന്ന രൂക്ഷവിമര്‍ശനവുമായി നടന്‍ കമല്‍ഹാസന്‍. ജനങ്ങള്‍ ഉണര്‍ന്ന് പ്രവര്‍ത്തിക്കേണ്ട സമയമായെന്നും താരം ചൂണ്ടിക്കാട്ടി. വി.കെ ശശികലയുടെയും കുടുംബത്തിന്റെയും വീടുകളിലും ഓഫീസുകളിലും ആദായനികുതി വകുപ്പ് നടത്തിയ റെയ്ഡിനെ കുറിച്ച് പ്രതികരിക്കുകയായിരുന്നു കമല്‍. ക്രിമിനലുകള്‍ ഇനി അധികാരത്തിലേറാനോ, ഭരണം നടത്താനോ പാടില്ല. പരീക്ഷയുടെ ബെല്‍ അടഞ്ഞുകഴിഞ്ഞിരിക്കുന്നു. ജനങ്ങള്‍ ജഡ്ജിമാരാകാണമെന്നും ഉചിതമായ വിധി പ്രസ്താവിക്കണമെന്നും താരം പറഞ്ഞു. ഒരു സ്വതന്ത്ര റിപ്പബ്ലിക് എങ്ങനെയാണോ പ്രവര്‍ത്തിക്കേണ്ടത് ആ സ്ഥിതിയിലേക്ക് സംസ്ഥാനത്തെ, ജനങ്ങള്‍ എത്തിക്കണമെന്നും കമല്‍ ഹാസന്‍ വ്യക്തമാക്കി.
1,430 കോടി രൂപയുടെ അനധികൃത സമ്പത്താണ് ആദായനികുതി വകുപ്പു നടത്തിയ റെയ്ഡില്‍ കണ്ടെത്തിയത്. ശശികലയുടെ ബന്ധു ദിവാകരന്‍, ടി.ടി.വി. ദിനകരന്‍, ജയലളിത താമസിച്ചിരുന്ന പോയസ് ഗാര്‍ഡനിലെ വേദനിലയം, ജയ ടിവിയുടെ ഓഫിസ് എന്നിവിടങ്ങളിലായിരുന്നു റെയ്ഡ്. ജയലളിത മരിച്ച ശേഷം ശശികല മുഖ്യമന്ത്രി പദത്തിലെത്താന്‍ ചില കളികള്‍ കളിച്ചിരുന്നു. അതിന്റെ ഭാഗമായി അന്ന് മുഖ്യമന്ത്രിയായിരുന്ന പന്നീര്‍ സെല്‍വത്തെ നീക്കുകയും പളനിസ്വാമിയെ മുഖ്യമന്ത്രിയാക്കുകയും ചെയ്തിരുന്നു. അന്നും രൂക്ഷവിമര്‍ശനവുമായാണ് കമല്‍ഹാസന്‍ രംഗത്തെത്തിയത്. ജനങ്ങള്‍ തെരഞ്ഞെടുത്ത മുഖ്യമന്ത്രിയെ മാറ്റിയപ്പോള്‍ തമിഴ്‌നാട്ടില്‍ ജനാധിപത്യത്തെ കശാപ്പ് ചെയ്‌തെന്നാണ് കമല്‍ഹാസന്‍ ട്വീറ്റ് ചെയ്തത്.
തന്റെ സ്വന്തം പാര്‍ട്ടിയുമായി തമിഴ്‌നാട്ടില്‍ സജീവമാകുന്നതിന് മുന്നോടിയായാണ് കമല്‍ഹാസന്‍ ഇത്തരം പ്രസ്താവനകള്‍ നടത്തുന്നത്. അടുത്തകാലത്ത് ഇത്തരത്തിലുള്ള നിരവധി പ്രസ്താവനകള്‍ നടത്തിയിരുന്നു. കേന്ദ്രസര്‍ക്കാരിന്റെ നോട്ട് നിരോധനത്തെ ആദ്യം പിന്തുണച്ച കമല്‍ഹാസന്‍, അത് ജനങ്ങള്‍ക്ക് വരുത്തിവെച്ച ദുരിതങ്ങള്‍ മനസിലാക്കിയ ശേഷം പരസ്യമായി ക്ഷമ ചോദിച്ചിരുന്നു. അത് പോലെ രാജ്യത്ത് ഹിന്ദു തീവ്രവാദം നിലനില്‍ക്കുന്നുണ്ടെന്നും ചൂണ്ടിക്കാട്ടി. അതിന് പിന്നാലെ രാജ്യത്തെ ഹിന്ദുക്കള്‍ വിശാലഹൃദയരാകണമെന്നും തെറ്റു ചെയ്താല്‍ തിരുത്താന്‍ തയ്യാറാകണമെന്നും ആനന്ദവികിടന്‍ മാസികയിലെഴുതി പംക്തിയില്‍ ആവശ്യപ്പെട്ടു.
രാഷ്ട്രീയ പ്രവര്‍ത്തനം തുടങ്ങുന്നതിന് മുന്നോടിയായി തമിഴ്‌നാട്ടിലുടനീളം ജനസമ്പര്‍ക്ക പരിപാടി നടത്താനുള്ള ശ്രമത്തിലാണ് താരം. ഇതിന് മുന്നോടിയായി ജനങ്ങള്‍ക്ക് അവരുടെ പ്രശ്‌നങ്ങള്‍ അറിയിക്കുന്നതിനായി മയ്യം വിസില്‍ എന്ന ആപ്പും താരം പുറത്തിറക്കും. ഇതിന്റെ പ്രഖ്യാപനം ഈമാസം അദ്ദേഹത്തിന്റെ പിറന്നാള്‍ ദിനത്തില്‍ നടത്തിയിരുന്നു.
https://www.facebook.com/Malayalivartha
