മുന്‍ ഇന്ത്യന്‍ തെരഞ്ഞെടുപ്പ് കമ്മീഷണര്‍ ടി.എന്‍ ശേഷനും ഭാര്യ ജയലക്ഷ്മിയും വൃദ്ധസദനത്തിലാണെന്ന ഇന്നലെ പല ഓണ്‍ലൈന്‍ മാധ്യമങ്ങളും വാര്‍ത്ത നല്‍കിയിരുന്നു. എന്നാല്‍ ആ വാര്‍ത്ത തെറ്റാണെന്ന് അടുത്തവൃത്തങ്ങള്‍ പറഞ്ഞു.

ശേഷനും ഭാര്യ ജയലക്ഷ്മിയും നിലവില്‍ താമസിക്കുന്നത് ചെന്നൈയിലെ ആള്‍വാര്‍പേട്ടിലെ സെന്റ് മേരീസ് സ്ട്രീറ്റിലെ സ്വന്തം അപ്പാര്‍ട്ട്‌മെന്റിലാണ് എന്നാണ് അടുത്ത വൃത്തങ്ങള്‍ സൂചിപ്പിക്കുന്നത്. ശേഷന്റെ അടുത്ത പരിചയക്കാരനായ എസ്.കെ.രാമചന്ദ്രന്‍ മാതൃഭൂമി ഓണ്‍ലൈനിനോടാണ് ഇക്കാര്യം വ്യക്തമാക്കിയത്.

പ്രായാധിക്യം മൂലമുള്ള ശാരീരിക അസ്വസ്ഥതകള്‍ ഇരുവര്‍ക്കുമുള്ളതിനാല്‍ വീട്ടിനുള്ളില്‍ നടക്കാന്‍ പോലും പോലും പരസഹായം ആവശ്യമുണ്ട്. മക്കളില്ലാത്തതിനാല്‍ ജോലിക്കാരാണ് ഇപ്പോള്‍ സഹായത്തിനുള്ളതെന്നും രാമചന്ദ്രന്‍ വ്യക്തമാക്കി. മുന്‍ മുഖ്യതിരഞ്ഞെടുപ്പ് കമ്മീഷണര്‍ ശേഷനും ഭാര്യയും വൃദ്ധസദനത്തിലാണെന്ന വാര്‍ത്ത ദേശീയ മാധ്യമങ്ങളടക്കം റിപ്പോര്‍ട്ട് ചെയ്തിരുന്നു.

ഇടയ്ക്ക് പാലക്കാട് ജില്ലയിലെ കൊല്ലങ്കോടിനു സമീപത്ത് പത്തു കിലോമീറ്റര്‍ അകലെയുള്ള വെള്ളാരംകടവ് എന്ന ഗ്രാമത്തില്‍ വര്‍ഷാവസാനങ്ങളിലോ മറ്റോ താല്‍ക്കാലിക വിശ്രമ ജീവിതം നയിക്കാന്‍ ശേഷന്‍ ആഗ്രഹിച്ചിരുന്നു. എന്നാല്‍ തന്റെയും ഭാര്യയുടെയും ആരോഗ്യപ്രശ്‌നങ്ങള്‍ കാരണം അത് വേണ്ടെന്ന് വയ്ക്കുകയായിരുന്നു. വൃദ്ധസദനത്തിലാണെന്ന വാര്‍ത്തകള്‍ പ്രചരിക്കുന്നത് അറിഞ്ഞ് രാമചന്ദ്രന്‍ ശേഷനെ വിളിച്ചിരുന്നു.

ശാരീരിക അവശതകള്‍ ഉണ്ടെങ്കിലും താമസിക്കുന്നത് വൃദ്ധസദനത്തില്‍ അല്ലെന്നും ആള്‍വാര്‍പേട്ടിലെ സ്വന്തം അപ്പാര്‍ട്ട്‌മെന്റിലാണെന്നുമാണ് ഫോണെടുത്ത ശേഷന്റെ ഭാര്യ ജയലക്ഷ്മി പ്രതികരിച്ചത്. പ്രത്യക്ഷപ്പെട്ട വാര്‍ത്തകള്‍ ശരിയാണോ എന്ന് അറിയാന്‍ പലരും തങ്ങളെ ഫോണ്‍ മുഖാന്തരം ബന്ധപ്പെട്ടിരുന്നതായും ജയലക്ഷ്മി രാമചന്ദ്രനോട് പറഞ്ഞു.

1990 മുതല്‍ 96 വരെ രാജ്യത്തെ പത്താമത് മുഖ്യ തിരഞ്ഞെടുപ്പ് കമ്മീഷണറായിരുന്ന കാലത്താണ് ശേഷന്‍ എന്ന പേര് ഇന്ത്യയിലെ ഗ്രാമങ്ങളില്‍ പോലും അറിയപ്പെടുന്നത്. ഈ കാലയളവില്‍ 40,000ത്തോളം സ്ഥാനാര്‍ത്ഥികളുടെ വരുമാന വെട്ടിപ്പുകളും തെറ്റായ പത്രികാ സമര്‍പ്പണങ്ങളും പരിശോധിച്ച അദ്ദേഹം 14,000 പേരെ തിരഞ്ഞെടുപ്പില്‍ നിന്ന് അയോഗ്യരാക്കി. 

പഞ്ചാബ്, ബീഹാര്‍ തിരഞ്ഞെടുപ്പുകള്‍ റദ്ദാക്കിയ അദ്ദേഹത്തെ ഇമ്പീച്ച് ചെയ്യുവാന്‍ പാര്‍ലമെന്റ് അംഗങ്ങള്‍ ശ്രമിച്ചെങ്കിലും നടന്നില്ല. കമ്മിഷണറായതോടെ ഭരണഘടനയില്‍ ഈ ഉദ്യോഗസ്ഥനുള്ള അധികാരങ്ങള്‍ എന്തെക്കെയാണെന്ന് ജനത്തിന് കാണിച്ചുകൊടുക്കാന്‍ ശേഷന് സാധിച്ചിരുന്നു. 

മറ്റുള്ളവരുടെ വീടുകളുടെ ചുമരില്‍ തെരഞ്ഞെടുപ്പ് പരസ്യങ്ങള്‍ തടഞ്ഞും ലൗഡ് സ്പീക്കര്‍ നിരോധിച്ചും പ്രചാരണത്തിന് സമയവും ചെലവും നിര്‍ണയിച്ചും സ്ഥാനാര്‍ഥികള്‍ക്ക് സ്വത്ത് വിവരം കര്‍ശനമായി വെളിപ്പെടുത്തണമെന്നതടക്കമുള്ള പരിഷ്‌കാരങ്ങള്‍ ഏര്‍പ്പെടുത്തി ഇന്ത്യയിലെ രാഷ്ട്രീയപാര്‍ട്ടികള്‍ക്ക് മൂക്കുകയറിട്ടിരുന്നു. ശേഷന്‍ ഏകാധിപതിയെപ്പോലെയാണ് പ്രവര്‍ത്തിക്കുന്നതെന്ന് ആക്ഷേപവും ഉയര്‍ന്നിടുന്നു.