രാജ്യത്തെ എല്ലാ ജില്ലകളിലും നിര്ഭയ കേന്ദ്രങ്ങള് സ്ഥാപിക്കാന് തീരുമാനമായി
സ്ത്രീകള്ക്കെതിരായ അതിക്രമങ്ങള് തടയുന്നതിനും ഇരകള്ക്കു സഹായമെത്തിക്കുന്നതിനും രാജ്യത്തെ എല്ലാ ജില്ലകളിലും നിര്ഭയകേന്ദ്രങ്ങള് സ്ഥാപിക്കാന് കേന്ദ്ര സര്ക്കാര് തീരുമാനിച്ചു. ഈ വര്ഷം നിലവില്വരുന്ന 50 കേന്ദ്രങ്ങളില് ഒന്ന് കണ്ണൂരിലായിരിക്കും.
സ്ത്രീപീഡനവും അതിക്രമങ്ങളും തടയുകയാണു നിര്ഭയ കേന്ദ്രങ്ങളുടെ മുഖ്യദൗത്യം. അടിയന്തര ഘട്ടങ്ങളില് ഹെല്പ്ലൈന് മുഖേന സ്ത്രീകള്ക്കു നിര്ഭയ കേന്ദ്രവുമായി സമ്പര്ക്കം പുലര്ത്താം. വൈദ്യസഹായവും നിയമസഹായവും കേന്ദ്രങ്ങളില്നിന്നു സൗജന്യമായി നല്കും.
നിര്ഭയനിധി വിനിയോഗിച്ചു സ്ഥാപിക്കുന്ന സഹായകേന്ദ്രങ്ങള്ക്കു വേണ്ടി ആദ്യം നിര്ദേശം സമര്പ്പിച്ചവര്ക്കാണിവ നല്കുന്നത്. പി.കെ. ശ്രീമതി എംപി വനിതാ-ശിശു ക്ഷേമ മന്ത്രി മേനക ഗാന്ധിക്കു നല്കിയ അപേക്ഷയുടെ അടിസ്ഥാനത്തിലാണു കണ്ണൂര് ആദ്യ 50 കേന്ദ്രങ്ങളുടെ പട്ടികയില് സ്ഥാനംകണ്ടത്. കേന്ദ്രം സ്ഥാപിക്കുന്നതിനു 300 ചതുരശ്ര അടി സ്ഥലം കണ്ടെത്തേണ്ടതുണ്ട്.
മുന് യുപിഎ സര്ക്കാരാണ് 1000 കോടി രൂപയുടെ നിര്ഭയനിധിക്കു രൂപംനല്കിയത്. സ്ത്രീകള്ക്കെതിരായ അതിക്രമങ്ങള് തടയുന്നതിനുള്ള പദ്ധതികള്ക്കു രൂപംനല്കി സമര്പ്പിക്കുന്നതനുസരിച്ചാണ് ഈ നിധിയില്നിന്നു സംസ്ഥാനങ്ങള്ക്കു സഹായം ലഭിക്കുക. എല്ലാ ജില്ലകളിലും നിര്ഭയ കേന്ദ്രങ്ങള്ക്കു രൂപംനല്കുകയെന്ന ആശയം കേന്ദ്രത്തിന്റേതാണ്. അടുത്ത വര്ഷം തന്നെ എല്ലാ ജില്ലകളിലും കേന്ദ്രങ്ങള് സ്ഥാപിക്കുകയാണു വനിതാ-ശിശു ക്ഷേമ മന്ത്രാലയത്തിന്റെ ലക്ഷ്യം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
