ത്രിപുര, നാഗാലാന്‍ഡ്, മേഘാലയ, എന്നിവിടങ്ങളിലെ വോട്ടെണ്ണല്‍ തുടരുന്നു. രാജ്യത്തിന്റെയാകെ ശ്രദ്ധയാകര്‍ഷിച്ച ത്രിപുരയില്‍ ആദ്യമിനിറ്റു മുതലേ ബിജെപി സിപിഐഎമ്മിനെ വിറപ്പിച്ചു. 42 സീറ്റില്‍ ലീഡ് നേടിയാണ് ബിജെപി മുന്നേറുന്നത്. സിപിഐഎമ്മിന് 16 സീറ്റിന്റെ ലീഡ്. രണ്ടു സീറ്റില്‍ സാന്നിധ്യമറിയിച്ച കോണ്‍ഗ്രസ് ഒടുവിലത്തെ ഫലസൂചനകളില്‍ 'സംപൂജ്യ'രായി.

മേഘാലയയില്‍ കോണ്‍ഗ്രസ് വ്യക്തമായ ഭൂരിപക്ഷം നേടി. 27 സീറ്റുകളിലാണ് കോണ്‍ഗ്രസ് ലീഡ് നേടിയത്. എന്‍.പി.പി പത്തും ബി.ജെ.പി എട്ടും സീറ്റുകളില്‍ മുന്നേറുന്നുണ്ട്. യു.ഡി.പിക്ക് ആറ് സീറ്റുകളില്‍ മോധാവിത്വം ലഭിച്ചപ്പോള്‍ ഇതരകക്ഷികള്‍ എട്ടു സീറ്റുകളില്‍ മുന്നിട്ട് നില്‍ക്കുന്നു. 10 വര്‍ഷമായി മേഘാലയ കോണ്‍ഗ്രസ് ഭരണത്തിലാണ്. നാഗാലാന്റില്‍ ബി.ജെ.പി എന്‍.ഡി.പി.പി സഖ്യം 31 സീറ്റുകളില്‍ മുന്നിട്ടു നില്‍ക്കുമ്പോള്‍ എന്‍.പി.എഫ് 25 സീറ്റുമായി തൊട്ടു പിറകിലുണ്ട്. കോണ്‍ഗ്രസിനും സീറ്റുകളൊന്നും ഇതുവരെ ലഭിച്ചിട്ടില്ല. 2008ല്‍ മൂന്നു മാസം രാഷ്ട്രപതി ഭരണം ഒഴികെ, 2003 മുതല്‍ നാഗ പീപ്ള്‍സ് ഫ്രണ്ടാണ് (എന്‍.പി.എഫ്) നാഗാലാന്‍ഡില്‍ ഭരണം നടത്തുന്നത്.

ത്രിപുരയില്‍ ഭരണം പിടിക്കാന്‍ ബിജെപിയും നിലനിര്‍ത്താന്‍ ഇടതുപക്ഷവും ഇഞ്ചോടിഞ്ച് പോരാട്ടം. ലീഡ് നില കേവലഭൂകരിപക്ഷം കടത്താന്‍ ഇരു മുന്നണികളും പോരാടുകയാണ്. 

രാജ്യത്ത് സിപിഐഎമ്മിന് ശക്തമായ സാന്നിധ്യമുള്ള, അവശേഷിക്കുന്ന രണ്ട് സംസ്ഥാനങ്ങളില്‍ ഒന്നാണ് ത്രിപുര. കഴിഞ്ഞ 25 വര്‍ഷങ്ങളായി തുടരുന്ന ഇടതുഭരണത്തിന് ഇത്തവണ അന്ത്യം കുറിക്കുമെന്ന വാര്‍ത്തകളായിരുന്നു പുറത്തുവന്നിരുന്നത്. മാണിക് സര്‍ക്കാരിന്റെ നേതൃത്വത്തിലുള്ള ഭരണത്തിന് അന്ത്യം കുറിച്ച് ബിജെപി ഇത്തവണ അധികാരം പിടിക്കുമെന്നാണ് പുറത്തുവന്നിരിക്കുന്ന എക്‌സിറ്റ് പോള്‍ പ്രവചനങ്ങള്‍.

സിറ്റിംഗ് മണ്ഡലമായ ധന്‍പൂരില്‍ മുഖ്യമന്ത്രി മണിക് സര്‍ക്കാര്‍ ലീഡ് ചെയ്യുന്നുണ്ട്. അതേസമയം, തലസ്ഥാന നഗരമായ അഗര്‍ത്തല മണ്ഡലത്തില്‍ ബിജെപിയുടെ സുദീപ് റോയ് ബര്‍മന്‍ ലീഡ് ചെയ്യുകയാണ്.

മൂന്നിടത്തും വിജയിക്കുമെന്നു ബിജെപിയും ഭരണം നിലനിര്‍ത്തുമെന്നു ത്രിപുരയില്‍ സിപിഎമ്മും മേഘാലയയില്‍ കോണ്‍ഗ്രസും പ്രതീക്ഷിക്കുന്നു. മൂന്നിടത്തും 60 വീതമാണു സീറ്റ്.വോട്ടെടുപ്പിനിടെ അനിഷ്ട സംഭവങ്ങളുണ്ടായ പശ്ചാത്തലത്തില്‍ കനത്ത സുരക്ഷയാണ് വോട്ടെണ്ണല്‍ കേന്ദ്രങ്ങളില്‍ ഒരുക്കിയിട്ടുള്ളത്.

കേന്ദ്രം ഭരിക്കുന്ന ബി ജെ പി മൂന്ന് സംസ്ഥാനങ്ങളിലും നേട്ടമുണ്ടാക്കും എന്നായിരുന്നു എക്‌സിറ്റ് പോള്‍ ഫലങ്ങള്‍.നാഗാലാന്‍ഡിലും മേഘാലയയിലും ഫെബ്രുവരി 27നായിരുന്നു വോട്ടെടുപ്പ് നടന്നത്. മേഘാലയയില്‍ 10 വര്‍ഷമായി ഭരിക്കുന്ന കോണ്‍ഗ്രസിനെ യാണ് ബിജെപി വെല്ലുവിളിക്കുന്നത്. നാഗാലാന്‍ഡില്‍ ബിജെപി എന്‍ഡിപിപിക്ക് ഒപ്പം മത്സരിക്കുന്നു.