ത്രിപുര, നാഗാലാന്‍ഡ്, മേഘാലയ എന്നിവിടങ്ങളിലെ വോട്ടെണ്ണല്‍ തുടരുന്നു. രാജ്യത്തിന്റെയാകെ ശ്രദ്ധയാകര്‍ഷിച്ച ത്രിപുരയില്‍ ബി.ജെ.പി അധികാരത്തിലേക്ക്. സഖ്യകക്ഷികളുമായി ചേര്‍ന്ന് 40 സീറ്റ് നേടിയാണ് ബിജെപി അധികാരം ഉറപ്പിച്ചത്. സിപിഐഎമ്മിന് 19 സീറ്റിന്റെ ലീഡ്. രണ്ടു സീറ്റില്‍ സാന്നിധ്യമറിയിച്ച കോണ്‍ഗ്രസ് ഒടുവിലത്തെ ഫലസൂചനകളില്‍ 'സംപൂജ്യ'രായി.

മേഘാലയയില്‍ കോണ്‍ഗ്രസ് വ്യക്തമായ ഭൂരിപക്ഷം നേടിയെങ്കിലും തൂക്ക്‌സഭയാരും. ചെറുകക്ഷികളുടെ നിലപാട് ഇവിടെ നിര്‍ണായകമാകും. അധികാരം പിടിച്ചെടുക്കാന്‍ ബി.ജെ.പി ശ്രമം തുടങ്ങി. ബി.ജെ.പി അധ്യക്ഷന്‍ അമിത്ഷാ പ്രത്യേക ദൂതനെ മേഘാലയിലേക്ക് അയച്ചു. എന്‍.പി.പിയുമായി ചേര്‍ന്ന് ഭരണം നടത്താനാണ് നീക്കം. 22 സീറ്റുകളിലാണ് കോണ്‍ഗ്രസ് നേടിയത്. കേവല ഭൂരിപക്ഷത്തിന് 33 സീറ്റ് വേണം. എന്‍.പി.പി പത്തും ബി.ജെ.പി എട്ടും സീറ്റുകളില്‍ മുന്നേറുന്നു്. യു.ഡി.പിക്ക് ആറ് സീറ്റുകളില്‍ മോധാവിത്വം ലഭിച്ചപ്പോള്‍ ഇതരകക്ഷികള്‍ എട്ടു സീറ്റുകളില്‍ മുന്നിട്ട് നില്‍ക്കുന്നു. 10 വര്‍ഷമായി മേഘാലയ കോണ്‍ഗ്രസ് ഭരണത്തിലാണ്. നാഗാലാന്റില്‍ ബി.ജെ.പി എന്‍.ഡി.പി.പി സഖ്യം 31 സീറ്റുകളില്‍ മുന്നിട്ടു നില്‍ക്കുമ്പോള്‍ എന്‍.പി.എഫ് 21 സീറ്റ് വിജയിച്ചു. കോണ്‍ഗ്രസിനും സീറ്റുകളൊന്നും ലഭിച്ചിട്ടില്ല. 2008ല്‍ മൂന്നു മാസം രാഷ്ട്രപതി ഭരണം ഒഴികെ, 2003 മുതല്‍ നാഗ പീപ്ള്‍സ് ഫ്രണ്ടാണ് (എന്‍.പി.എഫ്) നാഗാലാന്‍ഡില്‍ ഭരണം നടത്തുന്നത്.

രാജ്യത്ത് സിപിഐഎമ്മിന് ശക്തമായ സാന്നിധ്യമുള്ള, അവശേഷിക്കുന്ന രണ്ട് സംസ്ഥാനങ്ങളില്‍ ഒന്നായിരുന്നു ത്രിപുര. കഴിഞ്ഞ 25 വര്‍ഷങ്ങളായി തുടരുന്ന ഇടതുഭരണത്തിന് ഇത്തവണ അന്ത്യം കുറിച്ചിരിക്കുകയാണ്. സിറ്റിംഗ് മണ്ഡലമായ ധന്‍പൂരില്‍ മുഖ്യമന്ത്രി മണിക് സര്‍ക്കാര്‍ ലീഡ് ചെയ്യുന്നുണ്ട്. അതേസമയം, തലസ്ഥാന നഗരമായ അഗര്‍ത്തല മണ്ഡലത്തില്‍ ബിജെപിയുടെ സുദീപ് റോയ് ബര്‍മന്‍ ലീഡ് ചെയ്യുകയാണ്. വോട്ടെടുപ്പിനിടെ അനിഷ്ട സംഭവങ്ങളുണ്ടായ പശ്ചാത്തലത്തില്‍ കനത്ത സുരക്ഷയാണ് വോട്ടെണ്ണല്‍ കേന്ദ്രങ്ങളില്‍ ഒരുക്കിയിട്ടുള്ളത്.

കേന്ദ്രം ഭരിക്കുന്ന ബി ജെ പി മൂന്ന് സംസ്ഥാനങ്ങളിലും നേട്ടമുണ്ടാക്കും എന്നായിരുന്നു എക്‌സിറ്റ് പോള്‍ ഫലങ്ങള്‍.നാഗാലാന്‍ഡിലും മേഘാലയയിലും ഫെബ്രുവരി 27നായിരുന്നു വോട്ടെടുപ്പ് നടന്നത്. മേഘാലയയില്‍ 10 വര്‍ഷമായി ഭരിക്കുന്ന കോണ്‍ഗ്രസിനെയാണ് ബിജെപി സഖ്യകക്ഷികളുമായി ചേര്‍ന്ന് അധികാരത്തില്‍ നിന്ന് കുടിയൊഴിപ്പിക്കുന്നത്. വടക്ക് കിഴക്കന്‍ സംസ്ഥാനങ്ങളിലെല്ലാം ബി.ജെ.പി സര്‍ക്കാരോ, അവരുടെ സഖ്യത്തിലുള്ള സര്‍ക്കാരുകളോ ആയി മാറുന്നു.