മോദി-അമിത്ഷാ കൂട്ടുകെട്ട് ആശയങ്ങള് മറന്ന് അധികാരത്തിനായി തന്ത്രങ്ങള് മെനയുന്നു; കേരളവും തമിഴ്നാടുമാണ് ഇനി ലക്ഷ്യം
രാജ്യത്തിന്റെ വടക്ക്കിഴക്കന് മേഖലയില് കാവിക്കൊടി പാറുമ്പോള്, രാജ്യമെമ്പാടുമുള്ള ബി.ജെ.പി പ്രവര്ത്തകര്ക്ക് ഹോളിക്കൊപ്പം കിട്ടിയ സമ്മാനമായി ഇവിടങ്ങളിലെ വിജയത്തെ കാണുന്നു. വെള്ളിയാഴ്ചയായിരുന്നു ഉത്തരേന്ത്യയില് ഹോളി. ഗുണറാത്ത് തെരഞ്ഞെടുപ്പില് ഗ്രാമീണമേഖലയില് ഉള്പ്പെടെ തിരിച്ചടിയുണ്ടായെങ്കിലും ബി.ജെ.പി അധ്യക്ഷന് അമിത്ഷായും പ്രധാനമന്ത്രി നരേന്ദ്രമോദിയും ആത്മവിശ്വാസം കൈവിടാതെ കളംമാറ്റി ചവിട്ടുകയായിരുന്നു. മറ്റ് സംസ്ഥാനങ്ങളില് തീവ്രഹിന്ദുത്വ നിലപാടും കോണ്ഗ്രസിന്റെ തെറ്റായ നയങ്ങളും ഉയര്ത്തിപ്പിടിച്ചാണ് തെരഞ്ഞെടുപ്പ് പോരിനിറങ്ങിയത്. ത്രിപുരയില് സി.പി.എമ്മുമായുള്ള ആദ്യത്തെ, നേരിട്ടുള്ള മല്സരമായിരുന്നു. അതിനാല് അവര്ക്കെതിരെ നില്ക്കുന്ന പ്രാദേശിക കക്ഷിയായ ഇന്ഡിജീനിയസ് പീപ്പിള്സ് പാര്ട്ടി ഓഫ് ത്രിപുരയുമായി സഖ്യമുണ്ടാക്കി. നാഗാലാന്റിലും മേഖാലയായിലും ഇത് തന്നെയാണ് പയറ്റിയത്.
അസം നിയമസഭാ തെരഞ്ഞെടുപ്പിലും പ്രദേശിക കക്ഷികളുമായി ചേര്ന്ന് സഖ്യമുണ്ടാക്കിയാണ് അധികാരം പിടിച്ചെടുത്തത്. കോണ്ഗ്രസിനാകട്ടെ ഇതിനായില്ല. വികസനപ്രവര്ത്തനങ്ങളാണ് വടക്ക്കിഴക്കന് സംസ്ഥാനങ്ങളിലെ തെരഞ്ഞെടുപ്പ് പ്രവര്ത്തനങ്ങളില് ബി.ജെ.പി ചര്ച്ചയാക്കിയത്. യുവാക്കളുടെ തൊഴിലില്ലായ്മ, വിദ്യാഭ്യാസം, സര്ക്കാര് ജീവനക്കാരുടെ പ്രശ്നങ്ങള്, ആദിവാസികളുടെ ക്ഷേമപ്രവര്ത്തനങ്ങള് എന്നിവയും വാഗ്ദാനങ്ങളില് ഉള്പ്പെടുത്തി. തൊട്ട് മുമ്പ് നിയമസഭാ തെരഞ്ഞെടുപ്പ് നടന്ന ഹിമാചല് പ്രദേശില് പ്രധാനമന്ത്രി നരേന്ദ്രമോദി ഒന്നിലധികം തവണ എത്തി പ്രവര്ത്തനങ്ങള്ക്ക് ചുക്കാന്പിടിച്ചു. കോണ്ഗ്രസിലപ്പോഴും പാളയത്തില് പടയായിരുന്നു. കോണ്ഗ്രസ് ഭരിച്ചിരുന്ന പല സംസ്ഥാനങ്ങളില് നിന്നാണ് ബി.ജെ.പി അധികാരം തിരിച്ചുപിടിച്ചത് എന്നത് ശ്രദ്ധേയമാണ്.
കോണ്ഗ്രസിന്റെ ശക്തികേന്ദ്രമായിരുന്ന ഉത്തര്പ്രദേശില് യോഗി ആദിത്യനാഥിന്റെ നേതൃത്വത്തിലുള്ള സര്ക്കാര് മൂന്നില് രണ്ട് ഭൂരിപക്ഷത്തിനാണ് അധികാരത്തിലേറിയത്. പലയിടങ്ങളിലും പണവും സ്വാധീനവും ഉപയോഗിച്ച് ഭരണം പിടിച്ചെടുക്കാനും ശ്രമം നടത്തിയിരുന്നു. അരുണാചലില് ഭരണം പിടിച്ചെടുത്തത് അത് വ്യക്തമാക്കുന്നു. ത്രിപുരയിലും പണവും സ്വാധീനവും ഉപയോഗിച്ചാണ് തെരഞ്ഞെടുപ്പ് വിജയിച്ചതെന്ന് സി.പി.എം ജനറല് സെക്രട്ടറി സീതാറാം യച്യൂരി ആരോപിക്കുന്നു. ബിഹാറില് വന്കേന്ദ്രപദ്ധതികള് നല്കി സ്വാധീനിച്ചാണ് നിതീഷ്കുമാറിനെ എന്.ഡി.എയില് നിലനിര്ത്തിയത്. ബി.ജെ.പിയുടെ ആശയവുമായി ഒരുതരത്തിലും യോജിക്കാത്ത പി.ഡി.പിയുമായി സഖ്യമുണ്ടാക്കിയാണ് ജമ്മുകാശ്മീരില് ബി.ജെ.പി അധികാരം നേടിയത്. അതിനാല് ആശയമല്ല, അധികാരമാണ് പ്രധാനമെന്നും ഇതിനായി എന്ത് തന്ത്രവും സ്വീകരിക്കാന് അമിത്ഷായും നരേന്ദ്രമോദിയും തയ്യാറാണെന്ന് വ്യക്തമാക്കുന്നു.
രാജ്യത്ത് ആദ്യമായാണ് ഒരു രാഷ്ട്രീയപ്പാര്ട്ടി 20 സംസ്ഥാനങ്ങളില് ഭരിക്കുന്നത്. 60 കൊല്ലം ഇന്ത്യഭരിച്ച കോണ്ഗ്രസിന് പോലും ഇതിനായിട്ടില്ല എന്നത് ശ്രദ്ധേയമാണ്.
https://www.facebook.com/Malayalivartha
