പതിറ്റാണ്ടുകള്‍ക്ക് ശേഷം ഇസ്രയേലിലേക്ക് പറക്കുന്ന ഒരു വിമാനത്തിന് വേണ്ടി സൗദി അറേബ്യ തങ്ങളുടെ വ്യോമപാത തുറന്ന് കൊടുത്തു. ഡല്‍ഹിയില്‍ നിന്നും ഇസ്രയേലിലെ ടെല്‍ അവീവിലേക്ക് ആരംഭിച്ച വിമാന സര്‍വീസാണ് സൗദിയുടെ വ്യോമപാത വഴി പറന്നത്.
മേഖലയില്‍ സൗദിയും ഇസ്രയേലും തമ്മില്‍ നിലനിന്നിരുന്ന തര്‍ക്കങ്ങള്‍ പരിഹരിച്ച് ഇരുരാജ്യങ്ങളും രമ്യതയിലെത്തുമെന്നതിന്റെ സൂചനയാണ് ഇതെന്നാണ് വിലയിരുത്തല്‍. നിലവില്‍ ഇസ്രയേലില്‍ നിന്നുള്ള വിമാനങ്ങള്‍ മുംബയിലേക്ക് സര്‍വീസ് നടത്തുന്നുണ്ടെങ്കിലും സൗദി വ്യോമപാത ഒഴിവാക്കി ചെങ്കടലിലൂടെയാണ് പറക്കുന്നത്.

256 സീറ്റുകളുള്ള ബോയിംഗ് 787 ഡ്രീംലൈനര്‍ വിമാനമാണ് കഴിഞ്ഞ ദിവസം ചരിത്രസര്‍വീസ് ആരംഭിച്ചത്. വ്യാഴാഴ്ച വൈകിട്ട് ആറിന് ന്യൂഡല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തില്‍ നിന്ന് പുറപ്പെട്ട എ.ഐ 139ാം നമ്പര്‍ വിമാനം എയര്‍ ഇന്ത്യ ചെയര്‍മാനും മാനേജിംഗ് ഡയറക്ടറുമായ പ്രദീപ് സിംഗ് ഖരോല, ഇസ്രയേല്‍ ടൂറിസം മന്ത്രാലയ ഡയറക്ടര്‍ ഹസാന്‍ മാദാ എന്നിവര്‍ ചേര്‍ന്ന് ഉദ്ഘാടനം ചെയ്തു. വൈകിട്ട് 9.45ന് വിമാനം ടെല്‍ അവീവിലെത്തി.

ഏപ്രില്‍ ഒന്നുമുതല്‍ വൈകിട്ട് 4.50നാണ് വിമാനം ഡല്‍ഹിയില്‍ നിന്ന് പുറപ്പെടുക. വൈകിട്ട് ഒമ്പതിന് ടെല്‍ അവീവിലെത്തും. ഇന്ത്യന്‍ വ്യോമയാന രംഗത്തെ പുതിയ യുഗത്തിനാണ് ഡല്‍ഹി ടെല്‍ അവീവ് നോണ്‍സ്‌റ്റോപ്പ് സര്‍വീസിലൂടെ തുടക്കമായതെന്ന് പ്രദീപ് സിംഗ് ഖരോല പറഞ്ഞു. ഏഴ് പതിറ്റാണ്ടിന് ശേഷം സൗദി അറേബ്യയുടെ വ്യോമമേഖലയിലൂടെ ഇസ്രയേലിലേക്ക് പറക്കുന്ന വിമാനമെന്ന നേട്ടവും എയര്‍ ഇന്ത്യയ്ക്കുണ്ട്. ചൊവ്വ, വ്യാഴം, ഞായര്‍ ദിവസങ്ങളിലാണ് സര്‍വീസ്. തിരികെ ടെല്‍ അവീവില്‍ നിന്ന് രാത്രി 11.15ന് പുറപ്പെടുന്ന വിമാനം ഇന്ത്യന്‍ സമയം രാവിലെ 9ന് ഡല്‍ഹിയിലെത്തും.