ശോഭാ സുരേന്ദ്രനെ ബിജെപിയില്‍ നിന്ന് പുറത്താക്കണമെന്നാവശ്യപ്പെട്ട പാര്‍ട്ടിയില്‍ കലാപം. ഇതിനൊപ്പം പാലക്കാട്ട് പണം വിതരണം നടത്തിയ സംഭവത്തില്‍ തെരഞ്ഞെടുപ്പ് കമ്മീഷന്റെ ശിക്ഷണ നടപടിയും ഒട്ടും വൈകില്ല. ഒരു വര്‍ഷം വരെ ശോഭയ്ക്ക് തടവുശിക്ഷ ലഭിക്കാവുന്ന സാഹചര്യമാണുള്ളത്. ആലപ്പുഴയിലെ ബിജെപി നേതാവ് ബിന്ദു വിനയകുമാറിനെ കേട്ടാല്‍ അറയ്ക്കുന്ന അസഭ്യം പറഞ്ഞ ശോഭ ബിജെപിക്കു മാത്രമല്ല പൊതുസമൂഹത്തിനു തന്നെ കളങ്കമാണെന്നും ഇവരെ പാര്‍ട്ടിക്കു പുറത്താക്കണമെന്നുമാണ് സംസ്ഥാനതലത്തിലെയും പ്രാദേശിക തലത്തിലെയും വികാരം.

ശോഭാ സുരേന്ദ്രനെ പാലക്കാട്ട് കെണിയില്‍ വീഴ്ത്തിയ ബിന്ദുവാണെന്ന് ശോഭ ആക്ഷേപിക്കുമ്പോള്‍ അവശേഷിക്കുന്ന ചോദ്യങ്ങള്‍ ബാക്കിയാണ്. വയോധികയ്ക്ക് മുല്ലപ്പൂ ചൂടിയ യുവതി പണം കൊടുത്തെങ്കില്‍ ആ പണം എവിടെ നിന്ന് ശോഭയുടെ കാറില്‍ യുവതി എങ്ങനെ ഇടംപിടിച്ചു എന്ന ചോദ്യത്തിന് വ്യക്തമായ ഉത്തരമില്ല. ആലപ്പുഴക്കാരിയായ യുവതിയെ ശോഭ വിളിച്ചുവരുത്തുകയായിരുന്നോ ?

ചതിവില്‍പ്പെടുത്താന്‍ ബിന്ദു പറഞ്ഞയച്ചതോ എന്നതാണ് തെളിയാനുള്ളത്. തന്നെ ചതിക്കാന്‍ ബിന്ദു പണം കൊടുത്ത യുവതിയെ കരുവാക്കിയെന്നും പണം വിതരണ നീക്കം ബിന്ദുവാണ് കോണ്‍ഗ്രസുകാരെ അറിയിച്ചതെന്നും പറയപ്പെടുന്നു.

ഇത്രയേറെ നിലവാരം കെട്ടവിധം തന്നെക്കാള്‍ പ്രായം കൂടിയ ബിന്ദുവിനെ കേട്ടാല്‍ അറയ്ക്കുന്ന തറഭാഷയും തെറിയും അസഭ്യവും വിളിച്ച ശോഭാ സുരേന്ദ്രന്‍ കേരളത്തിലെ സ്ത്രീ സമൂഹത്തിനുതന്നെ കളങ്കമാണെന്ന് ബിജെപിയില്‍ പരക്കെ അഭിപ്രായമുയര്‍ന്നു. പണം നല്‍കി വോട്ടര്‍മാരെ സ്വാധീനിക്കാന്‍ ശ്രമിച്ച സംഭവത്തില്‍ പാലക്കാട് മണ്ഡലം എന്‍ഡിഎ സ്ഥാനാര്‍ഥി ശോഭ സുരേന്ദ്രന്റെ മൊഴിയെടുത്തതോടെ ശോഭ കുരുങ്ങുമെന്ന് വ്യക്തമാണ്. പണം വാങ്ങിയ വയോധികയെ ചോദ്യം ചെയ്താല്‍ പലതും പുറത്തുവരും. പാലക്കാട്ടെ സാരി വിതരണവും ശോഭയ്ക്ക് കുരുക്കായി മാറുകയാണ്.

പണം നല്‍കിയ സംഭവവുമായി ബന്ധപ്പെട്ട ആലപ്പുഴ ജില്ല കളക്ടറുടെ നിര്‍ദേശപ്രകാരം അന്വേഷണം റിട്ടേണിങ് ഓഫീസര്‍ പാലക്കാട് ആര്‍ഡിഒ അന്‍വര്‍ സാദത്തിനാണ് ശോഭ സുരേന്ദ്രന്‍ മൊഴി നല്‍കിയിരിക്കുന്നത്. പാലക്കാട് ടൗണ്‍ നോര്‍ത്ത് പൊലീസ് ഇന്‍സ്പെക്ടര്‍ കെ അബ്ദുള്‍ ജലീലാണ് അന്വേഷണ ഉദ്യോഗസ്ഥന്‍. കഴിഞ്ഞ ദിവസം പണം കൈപ്പറ്റിയ വയോധികയുടെ മൊഴിയെടുക്കുകയും വീഡിയോ ദൃശ്യങ്ങള്‍ ഉള്‍പ്പെടെ പരിശോധിക്കുകയും ചെയ്തിരുന്നു. കഴിഞ്ഞ ബുധനാഴ്ചയാണ് കണ്ണാടി പഞ്ചായത്തിലെ തരുവക്കുറുശിയില്‍ ശോഭ സുരേന്ദ്രനൊപ്പം കാറിലെത്തിയ യുവതി വോട്ടര്‍ക്ക് 5,000 രൂപ നല്‍കിയത്.

വീഡിയോ ദൃശ്യങ്ങള്‍ പുറത്തുവന്നതോടെ ജില്ലാ കലക്ടറുടെ നിര്‍ദേശപ്രകാരം തിരഞ്ഞെടുപ്പ് ഫ്‌ലയിങ് സ്‌ക്വാഡ് സ്ഥലത്തെത്തി വോട്ടറുടെ മൊഴി രേഖപ്പെടുത്തിയിരുന്നു. പണം വിതരണം കേരളമെമ്പാടും ബിജെപിക്ക് തിരിച്ചടിയായതായാണ് പാര്‍ട്ടിതല വിലയിരുത്തല്‍. ശോഭ പാലക്കാട്ട് തോല്‍ക്കുമെന്നു മാത്രമല്ല ബിജെപിയുടെ സാധ്യതാ മണ്ഡലങ്ങളിലെല്ലാം വോട്ടു നഷ്ടത്തിന് പാലക്കാട് സംഭവം ഇടയാക്കിയെന്നും ബിജെപി നിലയിരുത്തുന്നു. ഇതിനു പിന്നാലെയാണ് പാലക്കാട്ടെ വോട്ടര്‍ക്ക് പണം നല്‍കിയ സ്ത്രീക്ക് പിന്നില്‍ ബിന്ദു ആണെന്ന് ആരോപിക്കുന്ന ശോഭ, ബിന്ദുവിനെ അടിച്ച് പണിക്കുറ്റം തീര്‍ക്കുമെന്നാണ് ഫോണ്‍ സന്ദേശത്തില്‍ പറയുന്നത്.

വോട്ടര്‍ക്ക് പണം നല്‍കിയ സ്ത്രീ വന്നത് ആലപ്പുഴ റജിസ്‌ട്രേഷനിലുള്ള കാറിലാണെന്നും ബിന്ദുവിനെ കോടതി കയറ്റുമെന്നും സംസ്ഥാന അധ്യക്ഷന് പരാതി നല്‍കുമെന്നും ശോഭ പറയുന്നു. അത്തരത്തില്‍ ശോഭയെ ആലപ്പുഴയിലെ നേതാവായ ബിന്ദു ചതിച്ചതാണെന്ന് ശോഭ വിശ്വസിക്കുന്നു. ഫോണിലൂടെ സഭ്യമല്ലാത്ത ഭാഷയില്‍ സംസാരിക്കുക മാത്രമല്ല തന്നെയും ഭര്‍ത്താവിനെയും അപായപ്പെടുത്തുമെന്ന് ഭീഷണിപ്പെടുത്തുകയും ചെയ്തതായി ആലപ്പുഴ ജില്ലാ പോലീസ് മേധാവിക്ക് ഓണ്‍ലൈനായി പരാതിയില്‍ ബിന്ദു വ്യക്തമാക്കുന്നു.

കഴിഞ്ഞ ലോക്‌സഭാ തെരഞ്ഞെടുപ്പില്‍ ശോഭാ സുരേന്ദ്രന്‍ ആലപ്പുഴയില്‍നിന്ന് മത്സരിച്ചിരുന്ന കാലം മുതല്‍ നിലനില്‍ക്കുന്ന കടുത്ത വിഭാഗീയതയുടെ തുടര്‍ച്ചയാണ് ഇപ്പോഴത്തെ സംഭവവികാസങ്ങള്‍.
ആലപ്പുഴ ബി.ജെ.പി പ്രവര്‍ത്തകയെ ശോഭ സുരേന്ദ്രന്‍ ഭീഷണിപ്പെടുത്തുന്ന ഫോണ്‍ സംഭാഷണം പുറത്തുവിട്ട് പരാതി നല്‍കിയ ബിന്ദു വിനയകുമാറിനെതിരെ പുറത്താക്കുകയും അസഭ്യം പറഞ്ഞ ശോഭാ സുരേന്ദ്രനെ അകത്തിരുത്തുകയും ചെയ്തതിലെ അനീതിയെയാണ് പാര്‍ട്ടി പ്രവര്‍ത്തകര്‍ ചോദ്യം ചെയ്യുന്നത്. ശോഭയെ പാര്‍ട്ടി നേതൃത്വത്തിന് ഭയമാണെന്നും ശോഭയെക്കുറിച്ച അന്വേഷിക്കാന്‍ ഒരു നേതാവും തയാറല്ലെന്നും ബിന്ദു വിനയകുമാര്‍ പറഞ്ഞിരുന്നു.

പാലക്കാട് വോട്ടിന് നോട്ട് വിവാദത്തില്‍ പണമെത്തിച്ചത് ബിന്ദുവാണെന്നും ശോഭ ആരോപിച്ചിരുന്നു. തുടര്‍ന്നാണ് ബിന്ദുവിനെ ഭീഷണിപ്പെടുത്തുന്ന ഓഡിയോ പുറത്തുവിട്ടത്. ശോഭ സുരേന്ദ്രന്‍ പക്ഷത്തെ എതിര്‍ത്തതിന്റെ വൈരാഗ്യമാണ് വോട്ടിന് പണം നല്‍കിയെന്ന കേസിലേക്ക് വലിച്ചിഴക്കാന്‍ കാരണമെന്ന് ബിന്ദു പറയുന്നു.

ബിജെപിയില്‍ ശോഭയുടെ പക്ഷത്തേക്ക് ചേര്‍ക്കാന്‍ ശ്രമിച്ചപ്പോള്‍ അതിന് തയാറാകാതെ ഇരുന്നതാണ് തന്നോടുള്ള ശത്രുതക്ക് കാരണം. തെരഞ്ഞെടുപ്പിന് മുമ്പ് ശോഭ സുരേന്ദ്രന്‍, സ്വന്തം പക്ഷക്കാരെ തിരുകി കയറ്റുന്നു എന്നാരോപിച്ച് ബിന്ദു ഫേസ്ബുക്ക് കുറിപ്പിട്ടിരുന്നു. ഇത് പിന്നീട് ബി.ജെ.പി നേതൃത്വം ഇടപെട്ട് പിന്‍വലിപ്പിക്കുകയായിരുന്നു. സഭ്യമല്ലാത്ത ഒരുപാടു ആരോപണങ്ങളും അധിക്ഷേപങ്ങളും ശോഭ സുരേന്ദ്രന്‍ വനിതാ നേതാവിനെതിരെ ഉന്നയിച്ച സാഹചര്യത്തിലും ശോഭയ്‌ക്കെതിരെ നടപടിയുണ്ടായില്ല.