ലോകം ക്രിക്കറ്റ് ആവേശത്തിലാണ്. ലോകകപ്പ് മത്സരത്തില്‍ ഇന്ന് നടക്കാന്‍ ഇരിക്കുന്ന ദക്ഷിണാഫ്രിക്ക ഇന്ത്യ പോരാട്ടത്തിന് മുന്നോടിയായി നടത്തിയ പത്രസമ്മേളനം മാധ്യമ പ്രവര്‍ത്തകര്‍ ബഹിഷ്‌കരിച്ചു. മുതിര്‍ന്ന ടീം അംഗങ്ങളോ ഇന്ത്യന്‍ ക്യാപ്റ്റനോ പത്രസമ്മേളനത്തില്‍ പങ്കെടുക്കാതിരുന്നതില്‍ പ്രതിഷേധിച്ചാണ് മാധ്യമ പ്രവര്‍ത്തകരുടെ ബഹിഷ്‌കരണം. പത്രസമ്മേളനത്തില്‍ മുതിര്‍ന്ന താരങ്ങള്‍ക്ക് പകരം മൂന്ന് നെറ്റ് ബൗളര്‍മാരാണ് പങ്കെടുക്കാന്‍ എത്തിയത്.

ആവേഷ് ഖാന്‍, ദീപക് ചാഹര്‍, ഖലീല്‍ അഹമ്മദ് എന്നീ നെറ്റ് ബൗളര്‍മാര്‍ പത്രസമ്മേളനത്തില്‍ എത്തിയത്. ഇതില്‍ ഇതില്‍ തന്നെ ആവേഷിനെയും, ചാഹലിനെയും ടീമില്‍ ആവശ്യമില്ലാത്തതിനാല്‍ തിരികെ വിടാന്‍ തീരുമാനിച്ചവരാണ്. 

മുതിര്‍ന്ന താരങ്ങളോ ക്യാപ്റ്റനോ പത്രസമ്മേളനത്തില്‍ വരാഞ്ഞതിന്റെ കാരണം മീഡിയ മാനേജരോട് ചോദിച്ചപ്പോള്‍, ലോകകപ്പ് മത്സരം ആരംഭിച്ചില്ലല്ലോ എന്നായിരുന്നു അദ്ദേഹം നല്‍കിയ മറുപടി. അതുകൊണ്ടു ക്യാപ്റ്റനോ, കോച്ചോ വരുന്നതില്‍ വല്യ കാര്യമില്ല എന്നും അദ്ദേഹം പറഞ്ഞു. ഇതില്‍ പ്രതിഷേധിച്ചാണ് മാധ്യമങ്ങള്‍ ബഹിഷ്‌കരിച്ചത്. 

2015ലെ ലോകകപ്പ് മത്സരത്തില്‍ ഇന്ത്യന്‍ ടീമും മാധ്യമങ്ങളുമായി പ്രശ്‌നം ഉണ്ടായിരുന്നു. കളിക്ക് ശേഷം ധോണി മാത്രം മാധ്യമങ്ങളോട് സംസാരിക്കാന്‍ എത്തുന്നതിലാരുന്നു അന്ന് പ്രധിഷേധം. അതാത് കളികളിലെ താരങ്ങളായിരുന്നു വാര്‍ത്താസമ്മേളനത്തില്‍ പങ്കെടുക്കേണ്ടിയിരുന്നത്.

വിവാദങ്ങള്‍ പുകയുമ്പോയും ആവേശത്തിന് കുറവില്ല. 36 വര്‍ഷങ്ങള്‍ക്കു മുമ്പ് കപിലിന്റെ ചെകുത്താന്മാര്‍ കുറിച്ച സുവര്‍ണ ചരിത്രം ആവര്‍ത്തിക്കാന്‍ 135 കോടി ജനതയുടെ പ്രാര്‍ഥനകളുമായി വിരാട് കോഹ്ലിയും സംഘവും ഇന്നിറങ്ങും.

2019 ക്രിക്കറ്റ് ലോകകപ്പിലെ തങ്ങളുടെ ആദ്യ മത്സരത്തില്‍ ഇന്ത്യ ഇന്നു ദക്ഷിണാഫ്രിക്കയെ നേരിടും. സതാംപ്ടണില്‍ ഇന്ത്യന്‍ സമയം വൈകിട്ട് മൂന്ന് മുതലാണ് മത്സരം. സ്റ്റാര്‍ സ്‌പോര്‍ട്‌സ് ഒന്ന്, രണ്ട് എന്നിവയില്‍ തത്സമയം.

ടൂര്‍ണമെന്റില്‍ മറ്റെല്ലാ ടീമുകളും ആദ്യ റൗണ്ട് മത്സരം പൂര്‍ത്തിയാക്കി രണ്ടാം റൗണ്ട് ആരംഭിച്ചപ്പോഴാണ് ഇന്ത്യ അങ്കം കുറിക്കുന്നത്. ആരാധകര്‍ കാത്തിരിക്കുന്ന ഇന്ത്യയുടെ മത്സരത്തിനു പക്ഷേ ഭീഷണിയുര്‍ത്തി ഇന്നലെ മുതല്‍ക്കേ സതാംപ്ടണിനു മുകളില്‍ കാര്‍മേഘങ്ങള്‍ ഉരുണ്ടുകൂടിയിട്ടുണ്ട്. ഇന്നു മഴയ്ക്കു സാധ്യതയുണ്ടെന്നാണ് കാലാവസ്ഥാ റിപ്പോര്‍ട്ട്.

ഐ.പി.എല്‍ തിരക്കുകള്‍ക്ക് ശേഷം നല്ല വിശ്രമത്തിന് ശേഷമാണ് ഇന്ത്യ കളത്തിലിറങ്ങുന്നത്. ടീമംഗങ്ങളെല്ലാം തന്നെ പൂര്‍ണമായും മത്സര സജ്ജരാണ്. പരുക്കുണ്ടായിരുന്ന കേദാര്‍ ജാദവ് ഇന്നലെ നെറ്റ്‌സിലെ ഏറെ നേരം പ്രാക്ടീസ് ചെയ്തത് ഇന്ത്യക്ക് ആഹഌദം പകരുന്നു.

ഇംഗ്ലണ്ടിലെ സാഹചര്യം പരിഗണിച്ച് ഇന്ന് മൂന്ന് പേസര്‍മാര്‍ കളിച്ചേക്കുമെന്നാണ് റിപ്പോര്‍ട്ടുകള്‍. ജസ്പ്രീത് ബുംറ, മുഹമ്മദ് ഷമി, ഭുവനേശ്വര്‍ കുമാര്‍ എന്നിവര്‍ ആദ്യ ഇലവനില്‍ ഇടം പിടിച്ചേക്കും. ഇവര്‍ക്കൊപ്പം പേസ് ആള്‍റഔണ്ടര്‍ എന്ന നിലയില്‍ ഹര്‍ദ്ദിക് പാണ്ഡ്യ കൂടിചേരും. 

മൂന്ന് പേസര്‍മാര്‍ കളിച്ചാല്‍ കുല്‍ദീപ്, ചഹല്‍ എന്നിവരില്‍ ഒരാള്‍ക്ക് പുറത്തിരിക്കേണ്ടിവരും. സന്നാഹത്തില്‍ ബാറ്റിങ്ങിലും ബൗളിങ്ങിലും തിളങ്ങിയ രവീന്ദ്ര ജഡേജ ആദ്യ ഇലവനില്‍ ഇടംപിടിക്കാന്‍ സാധ്യതയേറെയാണ്. നാലാം നമ്പറില്‍ കെ.എല്‍.രാഹുല്‍ തന്നെ കളിച്ചേക്കും. സന്നാഹ മത്സരത്തില്‍ സെഞ്ചുറി നേടിയ രാഹുല്‍ മിന്നുന്ന ഫോമിലാണ്. 

സന്നാഹ മത്സരങ്ങളില്‍ തിഴങ്ങാതിരുന്ന ഓപ്പണര്‍മാരായ രോഹിത് ശര്‍മയും ശിഖര്‍ ധവാനും ഇന്നു ഫോമിലേക്കുയരുമെന്നാണ് ഇന്ത്യയുടെ പ്രതീക്ഷ.