ഗൾഫിൽ കുടുങ്ങിയവരെ നാട്ടിലെത്തിക്കുന്നതിൽ അടിയന്തിര ചികിത്സ ആവശ്യമുള്ളവർക്ക്​ മുൻഗണന നൽകുമെന്നായിരുന്നു ​ ഇന്ത്യൻ വിദേശകാര്യ വകുപ്പും മസ്​കത്ത്​ ഇന്ത്യൻ എംബസിയും അറിയിച്ചിരുന്നത്​. ഇപ്പോഴും പറഞ്ഞു കൊണ്ടിരിക്കുന്നതും . എന്നാൽ ശരീരം തളർന്ന്​ ഒമാനിലെ ഇബ്രിയിൽ താമസ സ്​ഥലത്ത്​ കഴിയുന്ന എറണാകുളം പാനായിക്കുളം സ്വദേശി താഹിറിന്​ ഇൗ മാനദണ്ഡം ബാധകമായില്ല.എംബസി ആ അഭ്യർത്ഥന ചെവികൊള്ളുന്നു പോലുമില്ല.

എംബസിയിലും നോർക്കയിലും രജിസ്​റ്റർ ചെയ്​ത്​ പലകുറി ബന്ധപ്പെട്ടെ ങ്കിലും ഒരു ടെലിഫോൺകോൾ പോലും തേടിയെത്തിയില്ല എന്ന് താഹിർ പറയുന്നു . ലോക്​ഡൗൺ നിലനിൽക്കുന്നതിനാൽ മസ്​കത്ത്​ ഗവർണറേറ്റിന്​ പുറത്ത്​ നിന്നുള്ളവരെ പരിഗണിക്കേണ്ടതില്ലെന്ന തീരുമാനത്തിലാണ്​ ഒമ്പതിന്​ കൊച്ചിക്ക്​ പോയ ഒമാനിൽ നിന്നുള്ള ആദ്യ വിമാനത്തിൽ നിന്ന്​ ഇദ്ദേഹത്തെ ഒഴിവാക്കിയതെന്നാണ്​ സൂചന. അതേസമയം സലാലയിൽ ജോലിക്കിടെയുണ്ടായ അപകടത്തിൽ കണ്ണിന്​ പരിക്കേറ്റയാളെ കൊച്ചി വിമാനത്തിൽ കൊണ്ടുപോവുകയും ചെയ്​തിരുന്നു.

എന്തായാലും അടുത്ത വിമാന ഷെഡ്യൂൾ ഇതുവരെ പ്രഖ്യാപിക്കാത്തതിനാൽ എന്ന് നാടണയാനാകുമെന്നറിയാതെ രോഗ കിടക്കയിൽ കഴിയുകയാണ്​ താഹിർ.
കഴിഞ്ഞ 23 വർഷമായി ഇബ്രിയിലെ സ്വദേശിയുടെ വീട്ടിൽ പാചകക്കാരനായും ഡ്രൈവറായും ജോലി ചെയ്​തുവരുകയാണ്​ ഇദ്ദേഹം. കഴിഞ്ഞ ഏപ്രിൽ ഏഴിനാണ്​ അമിത രക്​തസമ്മർദത്തെ തുടർന്ന്​ സ്വകാര്യ ആശുപത്രിയിലും പിന്നീട്​ ഇബ്രി ആശുപത്രിയിലും പ്രവേശിപ്പിക്കുന്നത്​. കോവിഡ്​ ഭീതി നിലനിൽക്കുന്നതിനാൽ കാര്യമായ ചികിൽസ ലഭിച്ചില്ല.നാട്ടിലെത്തിയാൽ പ്രിയപെട്ടവരുടെ കരുതലെങ്കിലും തനിക്കു തുണയാകുമെന്നു കരുതി ഈ പാവം.

തുടർന്ന്​ ഒമ്പതാം തീയതിയോടെ രക്​തസമ്മർദം അൽപം കുറഞ്ഞപ്പോൾ ഡിസ്​ചാർജ്​ ചെയ്യുകയും ചെയ്​തു. തുടർന്ന്​ താമസ സ്​ഥലത്തേക്ക്​ കൊണ്ട​ുപോയി. സംസാരിക്കാൻ ബുദ്ധിമുട്ടുള്ള താഹിറിന്​ ആരുടെയെങ്കിലും സഹായമുണ്ടെങ്കിൽ മാത്രമാണ്​ നടക്കാൻ സാധിക്കുകയുമുള്ളൂ. തൊഴിലുടമ നൽകിയിട്ടുള്ള മുറിയിൽ തന്നെയാണ്​ താമസം. ഭക്ഷണവും തൊഴിലുടമ എത്തിച്ച്​ നൽകും. ഇബ്രിയിൽ ജോലി ചെയ്​തിരുന്ന ജ്യേഷ്​ഠ​​​െൻറ മകനാണ്​ പരിചരണത്തിനായി ഉള്ളത്​. കഴിഞ്ഞ മാർച്ച്​ 30ന്​ വിസ കഴിഞ്ഞ്​ നിൽക്കുകയാണ്​ ഇദ്ദേഹം. അടുത്ത വിമാനത്തിൽ പോകാൻ അവസരം ലഭിച്ചാൽ താഹിറിന്​ തുണയായി ഇദ്ദേഹത്തിനും പോകാൻ കഴിയും.

ഭാര്യയും രണ്ട്​ കുട്ടികളുമാണ്​ ഇദ്ദേഹത്തിന്​ ഉള്ളത്​. രണ്ട്​ പതിറ്റാണ്ട്​ നീണ്ട പ്രവാസജീവിതത്തിനിടയിൽ ഭൂരിഭാഗം പ്രവാസികളെയും പോലെ ബാക്കി വെക്കാൻ ഒന്നുമില്ലാത്ത ഈ മനുഷ്യന് തുടർ ചികിത്സക്കായി എന്ത്​ ചെയ്യുമെന്നറിയാത്ത ആശങ്കയുമുണ്ട്​. അതോടൊപ്പം പിറന്നമണ്ണിൽ തിരിച്ചെത്താനാവില്ലെ എന്ന വേദനയും.