ലോകം ഖത്തറിലേയ്ക്ക്.. കിക്ക് ഓഫിന് ഇനി രണ്ട് വര്‍ഷം മാത്രം, പ്രചാരണത്തിന് പ്രത്യേക വിമാനം
ലോകം ഉറ്റു നോക്കുന്ന ഖത്തര്‍ ലോകകപ്പ് ഫുട്‌ബോള്‍ മാമാങ്കത്തിന് രണ്ട് വര്‍ഷം മാത്രം ബാക്കി നില്‍ക്കേ വന്‍ മുന്നൊരുക്കങ്ങളാണ് അണിയറയില്‍ അരങ്ങേറുന്നത്. മിഡിലീസ്റ്റും അറബ് ലോകവും ആതിഥ്യം വഹിക്കാനിരിക്കുന്ന ആദ്യത്തെ ലോകകപ്പ് ഫുട്ബാള്‍ ടൂര്‍ണമെന്റിന് 2022 നവംബര്‍ 21ന് അല്‍ഖോറിലെ അല്‍ ബെയ്ത് സ്‌റ്റേഡിയത്തില്‍ ആരവമുയരുമ്പോള്‍, ഫിഫയുടെ ചരിത്രത്തിലെ തന്നെ ഏറ്റവും മഹത്തായ ടൂര്‍ണമെന്റിനാണ് ലോകം സാക്ഷ്യം വഹിക്കാന്‍ പോകുന്നത്. ഒരു ദിവസം തന്നെ ഒന്നിലധികം മത്സരങ്ങള്‍ കാണാന്‍ ഫുട്ബാള്‍ പ്രേമികള്‍ക്ക് അവസരം നല്‍കുന്ന ചരിത്രത്തിലെ ആദ്യത്തെ ലോകകപ്പാണ് വരാനിരിക്കുന്നത്.
ലോകകപ്പിനെ വരവേല്‍ക്കുന്നതിനായി രാജ്യത്തുടനീളം ദ്രുത ഗതിയിലുള്ള വികസന പ്രവര്‍ത്തനങ്ങളാണ് നടന്നു വരുന്നത്. 90 ശതമാനത്തോളം പ്രവര്‍ത്തനങ്ങളും പൂര്‍ത്തിയായതായാണ് സംഘാടകര്‍ നല്‍കുന്ന വിവരം. എജുക്കേഷന്‍ സിറ്റി സ്റ്റേഡിയം, വക്‌റ അല്‍ ജനൂബ് സ്റ്റേഡിയം, ഖലീഫ സ്റ്റേഡിയം എന്നിവയുടെ പണികള്‍ പൂര്‍ത്തിയായതായും അല്‍ റയ്യാന്‍, അല്‍ബെയ്ത് സ്റ്റേഡിയം, തുമാമ സ്റ്റേഡിയം എന്നിവ അവസാന ഘട്ട നുറുക്കു പണികളില്‍ ആണെന്നും സംഘാടകര്‍ അറിയിച്ചിട്ടുണ്ട്. കണ്ടെയ്‌നര്‍ സ്‌റ്റേഡിയമെന്നറിയപ്പെടുന്ന റാസ് അബൂ അബൂദ് സ്റ്റേഡിയം, കലാശ പോരാട്ടം നടക്കുന്ന ലുസൈല്‍ സ്റ്റേഡിയം എന്നിവയുടെ നിര്‍മാണം 2021ലും പൂര്‍ത്തിയാകും.
ഫുട്‌ബോളിന്റെ പ്രചാരണ ഭാഗമായി പ്രത്യേക വിമാനവും ഖത്തര്‍ എയര്‍വേയ്‌സ് പുറത്തിറക്കി. ദോഹയില്‍ നിന്നും സൂറച്ചിലേയ്ക്ക് സര്‍വീസ് നടത്തുന്ന വിമാനത്തില്‍ ലോകകപ്പിന്റെ ഔദ്യോഗിക എംബ്ലവും നിറവും ആലേഖനം ചെയ്തിട്ടുണ്ട്. വിമാനം ശനിയാഴ്ച ദോഹ വിമാനത്താവളത്തില്‍ പറന്നിറങ്ങി. കൂടുതല്‍ വിമാനങ്ങള്‍ ഉടന്‍ തന്നെ ലോകകപ്പിന്റെ നിറമണിയുമെന്നും ഖത്തര്‍ ലോകകപ്പിന്റെ ഔദ്യോഗിക എയര്‍ലൈന്‍ പങ്കാളി എന്ന നേട്ടം സ്വന്തമായതിന്റെ സന്തോഷം പുതുക്കുക കൂടി ലക്ഷ്യമാക്കിയാണ് ഈ നടപടിയെന്നും കമ്പനി സിഇഒ അക്ബര്‍ അല്‍ ബേക്കിര്‍ പറഞ്ഞു. 2021 മാര്‍ച്ചോടെ തന്നെ ലോകത്തിന്റെ 125 ഭാഗങ്ങളിലേയ്ക്ക് ഖത്തര്‍ എയര്‍വേയ്‌സ് വിമാനങ്ങള്‍ സര്‍വീസ് നടത്തും. 2020 ല്‍ 58 മില്യണ്‍ യാത്രക്കാരെ സ്വീകരിക്കുക എന്നതാണ് ലക്ഷ്യമെന്നും അക്ബര്‍ കൂട്ടിച്ചേര്‍ത്തു.
https://www.facebook.com/Malayalivartha
