ദുബൈയില്‍ മരണപ്പെട്ട കൊല്ലം സ്വദേശിയുടെ വിവരങ്ങള്‍ ശേഖരിച്ചു നല്‍കാന്‍ പ്രയത്നിച്ച കേരള പൊലീസ് അടക്കമുള്ളവര്‍ക്ക് നന്ദി പറഞ്ഞ് പ്രവാസി സാമൂഹിക പ്രവര്‍ത്തകന്‍ അഷ്റഫ് താമരശ്ശേരി രംഗത്ത് എത്തിയിരിക്കുകയാണ്. ആഴ്ച്ചകളായി ദുബൈ പൊലീസ് മോര്‍ച്ചറിയില്‍ സൂക്ഷിച്ചിരുന്ന കൊല്ലം നിലമേല്‍ സ്വദേശി സൈഫുദ്ദീന്‍റെ ബന്ധുക്കളുടെ വിവരങ്ങള്‍ തേടി അഷ്റഫ് താമരശ്ശേരി കഴിഞ്ഞ ദിവസം ഫേസ്ബുക്കില്‍ പോസ്റ്റ് കുറിച്ചിരുന്നു..

ഇതിനുപിന്നാലെ ഈ പോസ്റ്റ് ശ്രദ്ധയില്‍പ്പെട്ട സൈഫുദ്ദീന്‍റെ സൗദിയിലുള്ള സഹോദരനും അബൂദാബിയിലുള്ള അളിയനും അഷ്റഫ് താമരശ്ശേരിയെ ബന്ധപ്പെടുകയും ചെയ്തു. കൂടാതെ ചുരുങ്ങിയ സമയം കൊണ്ട് വ്യക്തിയെ തിരിച്ചറിയുന്നതിന് കേരള പൊലീസിന്‍റെ പ്രവര്‍ത്തനവും സഹായിച്ചു. മൃതദേഹം നാട്ടിലെത്തിക്കാനുള്ള നടപടിക്രമങ്ങള്‍ ഊര്‍ജിതമാക്കിയതായി അഷ്റഫ് താമരശ്ശേരി അറിയിച്ചു.

അഷ്റഫ് താമരശ്ശേരിയുടെ ഫേസ്ബുക്ക് പോസ്റ്റ്:

നന്ദി...... സഹോദരങ്ങളെ, ഒറ്റ രാത്രികൊണ്ട് തന്നെ ആളെ തിരിച്ചറിഞ്ഞു.... ദുബൈയില്‍ മരണപ്പെട്ട് ആഴ്ച്ചകളായി മൃതദേഹം പൊലീസ് മോര്‍ച്ചറിയില്‍ സൂക്ഷിച്ചിരുന്ന വ്യക്തിയെ തിരിച്ചറിയാതിരുന്നതിനെ തുടര്‍ന്ന് ഈ വിവരം വ്യക്തമാക്കി ഞാന്‍ ഇന്നലെ രാത്രി ഇട്ട പോസ്റ്റ് അടിസ്ഥാനമാക്കി ഊണും ഉറക്കവുമൊഴിച്ച്‌ പ്രവര്‍ത്തിച്ച സഹോദരങ്ങള്‍ക്ക് നന്ദി.

നേരം വെളുക്കുന്നതിന് മൂന്നേ ആളിനെ തിരിച്ചറിഞ്ഞു കൊല്ലം നിലമേല്‍ സ്വദേശി സൈഫുദ്ധീന്‍ ആണ് ഇദ്ദേഹം. ഏറെകാലം സൗദിയിലായിരുന്ന സൈഫുദ്ധീന്‍ ഏതാനും വര്‍ഷം മുന്‍പാണ് യു.എ.ഇയില്‍ എത്തിയത്‌. അടുത്തിടെ സഹോദരി മരണപ്പെട്ടത് അറിയിക്കാന്‍ ബന്ധുക്കള്‍ ശ്രമിച്ചെങ്കിലും ആളെ കിട്ടിയിരുന്നില്ല. ഭാര്യയും രണ്ടു മക്കളുമാണ് ഉള്ളത്. പോസ്റ്റ് കണ്ട സൗദിയിലുള്ള സഹോദരന്‍ പറഞ്ഞ് അബൂദാബിയിലുള്ള ഇദ്ദേഹത്തിന്‍റെ അളിയന്‍ ബന്ധപ്പെട്ടിരുന്നു.

ചുരുങ്ങിയ സമയം കൊണ്ട് വ്യക്തിയെ തിരിച്ചറിയുന്നതിന് വേണ്ടി സഹായിച്ച കേരള പൊലീസിനും പോസ്റ്റ് ആളുകളിലേക്ക് എത്തിക്കുന്നതിന് സഹകരിച്ച എന്‍റെ സുഹൃത്തുക്കള്‍ക്കും അകമഴിഞ്ഞ നന്ദി. മൃതദേഹം ഉടനെ തന്നെ നാട്ടിലെത്തിക്കാനുള്ള നടപടിക്രമങ്ങള്‍ ഇന്ന് രാവിലെതന്നെ ആരംഭിച്ചു കഴിഞ്ഞു.